Mannlíf

Á morgun, fimmtudaginn 14. desember kl. 17.00, kynnir Benedikt Lafleur glænýjan bókmenntaviðburð og áritar þýðingu sína Svar Soffíu í Safnahúsinu á Sauðárkróki. Benedikt segir að um bókmenntaviðburð sé að ræða og jafnvel að kynjaskandal aldarinnar sé að finna í bókinni og þarft innlegg í í #Metoo umræðuna.

Karlakórinn Lóuþrælar heldur jólatónleika í Barnaskólaum á Borðeyri á morgun, þriðjudaginn 12. desember, kl. 20:30 og Félagsheimilinu Hvammstanga, miðvikudaginn 13. desember, kl. 20:30

Aðventuhátíðir verða haldnar í mörgum kirkjum á svæðinu á morgun, sunnudaginn 10. desember. Einnig verða ljósin tendruð á jólatrénu á Blönduósi. Það verður gert að aflokinni aðventuhátíð í Blönduóskirkju, um klukkan 17:00. Sungin verða jólalög og þar sem veður og færð eru með besta móti er trúlegt að einhverjir af hinum uppátækjasömu sonum Grýlu láti sjá sig. Jólatréð sem prýða mun Blönduósbæ þessi jólin er fengið úr Gunnfríðarstaðaskógi hjá Skógræktarfélagi Austur-Húnvetninga og er 10 metra hátt sitkahvítgreni sem gróðursett var í skóginum um 1964.

Á sunnudaginn næstkomandi, þann 10. desember, heldur kvenfélag Hólahrepps sína árlegu aðventuhátíð á Hólum í Hjaltadal. Hátíðin er haldin í samvinnu við Hóladeild Skógræktarfélags Skagafjarðar sem verður með jólatrjáasölu á Hólum á sama tíma.

Jólatónleikar listasmiðjunnar Tónadans verða haldnir í Miðgarði á morgun, miðvikudaginn 6. desember kl. 17:00. Tónadans, listasmiðja fyrir börn og ungmenni, var formlega stofnuð á vordögum 2017 en tók til starfa síðastliðið haust og er afrakstur hugmynda og þróunarvinnu Kristínar Höllu Bergsdóttur og Jóhönnu Marínar Óskarsdóttur. Hafði listasmiðjan verið draumur þeirra um nokkra hríð og ákváðu þær að skella verkefninu af stað á þessu ári. Báðar eru þær menntaðir hljóðfæraleikarar og tónlistarkennarar auk þess að vera við nám við Háskólann á Bifröst. Kristín Halla hefur séð um reksturinn í vetur þar sem Jóhanna er búsett á Bifröst en Kristín Halla segist hafa fengið til liðs við sig frábærar listakonur þær Helgu Rós Indriðadóttur óperusöngkonu sem stjórnar barnakórnum og þær Ólöfu Ólafsdóttur og Ragndísi Hilmarsdóttur danskennara sem kenna jassballett.

Nú um helgina verður Skagfirðingum boðið upp á sannkallaða tónlistarveislu þegar Sönglögin standa fyrir aðventutónleikunum Hátíð í bæ, annars vegar á Hofsósi í kvöld og hins vegar í Miðgarði á laugardagskvöld. Sérstakur gestur á tónleikunum verður stórsöngvarinn geðþekki, Pálmi Gunnarsson, sem á stóran sess í hugum landsmanna þegar hugurinn leitar til ástsælustu jólalaganna. Þeir Einar Þorvaldsson og Stefán Gíslason, kennarar við tónlistarskóla Skagafjarðar, sem standa á bak við Sönglögin segja þeir hafi lengi haft hug á að fá Pálma til að koma fram á tónleikum með þeim en hann hafi alltaf verið uppbókaður á þessum tíma svo nú sé loksins langþráðu marki náð.

Árshátíð yngra stigs Varmahlíðarskóla, sem frestað var vegna veðurs fyrir viku, verður haldin í dag kl. 16:30 í Menningarhúsinu Miðgarði. 1. og 2. bekkur ætla að sýna íþróttaálfasprell en nemendur 3.-6. bekkjar munu gefa áhorfendum innsýn í Ævintýralandið þar sem gömlu, góðu ævintýrin verða fléttuð saman á óvæntan hátt. Að lokinni sýningu verða kaffiveitingar í Miðgarði. Höfundur Ævintýralandsins er Ásthildur Cesil Þórðardóttir.

Það verður jólastemning á Hvammstanga í dag. Í félagsheimilinu verður jólamarkaður milli klukkan 11:00 og 17:00 og kl. 17:00 verða ljósin á jólatrénu við félagsheimilið tendruð. Þá mun Elínborg Sigurgeirsdóttir leika létt jólalög, krakkar úr grunnskólanum syngja og Sveinbjörg Rut Pétursdóttir flytur ávarp. Boðið verður upp á heitt kakó og piparkökur og ef vel stendur á á heimilinu hjá Grýlu gömlu verða einhverjir jólasveinar sendir til byggða með góðgæti í poka handa börnunum.

Í dag, laugardaginn 25. nóvember, verður opið hús í listamiðstöðinni Nesi á Skagaströnd þar sem listamenn nóvembermánaðar munu sýna verk sín. Opið verður frá klukkan 16 til 18 en milli klukkan 16:30 og 17:15 fer fram samspil leiklistar og persneskrar fiðlu, kvikmyndasýning, upplestur úr skáldsögu og kynning á rannsókn á bæjarskipulagi Skagastrandar. Klukkan 17:30 verður tónlist, ljóð og sjónlistasýning í kaffistofunni Einbúastíg 2.

Á morgun föstudag munu nemendur Fjölbrautaskóla Norðurlands vestra frumsýna leikritið Bugsy Malone í leikstjórn Guðbrands Ægis Ásbjörnssonar. Bugsy Malone er fjölskylduleikur sem fjallar um ævintýri „gangstersins“ Bugsy Malone á bannárunum í Chicago uppúr 1930.