Fréttir

Það fór ekki framhjá neinum að það hvessti duglega í vikunni og það um allt land. Víða varð tjón af völdum vindsins og þar má meðal annars nefna fagurbláa körfuboltavöllinn við Árskóla á Sauðárkróki. Að sögn Gunnars Páls Ólafssonar, verkstjóra Þjónustumiðstöðvar á Veitu- og framkvæmdasviði hjá sveitarfélaginu Skagafirði, varð foktjón á vellinum en talsvert af mottum brotnuðu þegar þær slitnuðu í sundur í veðurhamnum.

„Gefin hefur verið út rauð viðvörun til framherja annarra liða í 2. deild fyrir sumarið 2025.“ Þannig hefst tilkynning á Aðdáendasíðu Kormák og ástæðan fyrir rauðri viðvörun er sú að varnarjaxlinn Sergio Francisco Uolú hefur skrifað undir samning um að leika áfram með liði Kormáks/Hvatar nú í sumar.

Keppt var í slaktaumatölti í Meistaradeild Líflands í hestaíþróttum en mótið fór fram í Horse Day höllinni í Ingólfshvoli í Ölfusi. Á meðal þeirra sex sem komust í A-úrslit voru tveir knapar af Norðurlandi vestra en það voru Helga Una Björnsdóttir frá Syðri-Reykjum í Húnaþingi vestra og Eyrún Ýr Pálsdóttir frá Flugumýri í Skagafirði.

Matgæðingar vikunnar í tbl. 19, 2024, voru Tómas Pétur Heiðarsson og Agnes Ósk Gunnarsdóttir. Tómas er fæddur og uppalinn á Sauðárkróki en Agnes kemur frá Selfossi en flutti í Mosfellsbæinn á unglingsárunum. Tómas og Agnes kynntust árið 2007 þegar þau unnu bæði upp í Kárahnjúkum en það var ekki fyrr en árið 2019 sem Tómas náði loksins að draga Agnesi í fjörðinn fagra. Tómas starfar hjá Vörumiðlun og Agnes er hársnyrtir á Klippiskúrnum. Þau eiga saman þrjú börn, Fanneyju Emblu, fædda 2009, Orra Frey, fæddan 2012 og Köru Sjöfn, fædda árið 2019. Þau eiga einnig hundinn Tind sem er sex ára gamall Bichon Frise.  

Rauð viðvörun er í dag á Degi leikskólans og allt skólahald liggur niðri í Skagafirði. Leikskólinn minn er lokaður og hefur reyndar verið lítið um að börn hafi fengið að koma þangað síðustu daga vegna verkfalls. Vikurnar fyrir verkfall þurftum við líka að loka deildum og senda börn heim vegna manneklu. Þá þurftu kennarar og annað starfsfólk að hlaupa hraðar til að láta daginn ganga upp. Er það það sem við viljum? Náum við að vinna okkar faglega starf þannig? Náum við að horfa á þarfir hvers og eins og grípa þá sem þurfa meiri aðstoð? Nei, nei það getum við ekki og það er ekki það sem við viljum.

Undirbúningstímabil knattspyrnufólks hefst fyrir alvöru um helgina þegar Lengjubikarinn fer í gang. Þrjú lið af Norðurlandi vestra taka þátt í keppninni þennan veturinn; Bestu deildar lið Tindastólskvenna spilar í riðli 1 í A deild, Kormákur/Hvöt tekur aldrei þessu vant þátt í Lengjubikarnum en Dominic Furness þjálfari mætir til leiks með sína kappa í 1. riðli B deildar og þá mætir Konni með Tindastólspiltana í riðil 4 í B deild.

Það er kannski ekki merkileg frétt alla jafna að flugvél taki á loft í Skagafirði en í illviðrinu síðasta sólarhringinn þá tókst sýningarvél, sem staðsett var á túninu neðan Samgöngusafnsins í Stóragerði, á loft og endaði á hvolfi.

FISK Seafood og Kaupfélag Skagfirðinga hafa ráðist í framkvæmdir á Eyrinni á Króknum en þar stendur til að reisa nýja frystigeymslu sem nýtist þá bæði FISK Seafood og Kjötafurðastöð KS. Að sögn Jóns Kristins Guðmundssonar, verkefna- og þróunarstjóra hjá FISK Seafood, þá var hafist handa þann 15. nóvember sl. að taka frost og aftengja gamlar frystigeymslur sem fyrir voru á svæðinu þar sem ný geymsla mun rísa. „Strax í kjölfarið var farið að rífa þær byggingar og lauk því verki í byrjun janúar. Þessar byggingar voru reistar árið 1949 samkvæmt fasteignaskrá,“ segir Jón Kristinn.

Matgæðingar vikunnar í tbl. 18, 2024, voru Árni Gunnarsson og Elenóra Jónsdóttir á Sauðárkróki. Árni er frá Flatatungu í Akrahreppi, hinum forna, og eru foreldrar hans Gunnar heitinn Oddsson, bóndi í Flatatungu, og Helga Árnadóttir, húsfreyja, en Helga er fædd og uppalin á Akranesi. Árni ólst upp í firðinum fagra en flutti til Reykjavíkur eftir stúdentspróf til að nema sagnfræði við HÍ og síðar Háskólann í Bielefeld í Þýskalandi og vann þar sem blaða- og fréttamaður með náminu. Elenóra er fædd og uppalin í Reykjavík en foreldrar hennar voru Jón Sigurðsson og Guðfinna Erla Jörundsdóttir.

Rauð veðurviðvörun tekur gildi á ný hér á Norðurlandi vestra kl. 10 og stendur til kl. 15 í dag. Vegagerðin ítrekar að ökutæki sem taka á sig mikinn vind eiga alls ekki að vera á ferli milli landshluta í dag. Margir vegir eru á óvissustigi og geta því lokað með stuttum fyrirvara. Vegfarendur eru beðnir að fylgjast vel með aðstæðum og vera tilbúnir að breyta ferðaplönum.