Rauð viðvörun tekur gildi um kl. 10 – Foktjón á Norðurlandi vestra
Rauð veðurviðvörun tekur gildi á ný hér á Norðurlandi vestra kl. 10 og stendur til kl. 15 í dag. Vegagerðin ítrekar að ökutæki sem taka á sig mikinn vind eiga alls ekki að vera á ferli milli landshluta í dag. Margir vegir eru á óvissustigi og geta því lokað með stuttum fyrirvara. Vegfarendur eru beðnir að fylgjast vel með aðstæðum og vera tilbúnir að breyta ferðaplönum.
Sem stendur er slydda eða hundslappadrífa á Sauðárkróki en samkvæmt veðurkorti Veðurstofunnar er örlítið hlýrra vestan Skaga og þar rignir því á láglendi. Öxnadalsheiðin er lokuð sem stendur vegna óveðurs og varað er við krapa á Vatnsskarði og éljagangi. Éljagangur er á Þverárfjalli en þar er nú stillt.
Skil ganga síðan yfir Norðurland vestra þegar nær dregur hádegi, hitinn hækkar um tíu gráður og stífur sunnanvindur lætur til sín taka í 2-3 tíma á svæðinu og gengur yfir frá vestri til austurs. Um hádegi er spáð 28 m/sek á Holtavörðuheiði og ekki ólíklegt að heiðinni verði lokað fyrir umferð meðan mesti hvellurinn gengur yfir.
Rauð veðurviðvörun var ríkjandi á mest öllu landinu í gærkvöldi og fram á nótt og var gert ráð fyrir illviðri og miklum vindi. „Tilkynnt var um nokkur foktjón í gær og nótt, en búast má við því að í birtingu komi meira í ljós. Rúða sprakk í íbúðarhúsi í grennd við Húnavelli, þak losnaði af útihúsum í Miðhópi, bekkir fuku í grennd við Hofsós og dúkur körfuboltavallarins við Árskóla fauk af. Björgunarsveitir voru í öllum tilvikum ræstar út til aðstoðar við borgarana,“ segir á síðu Lögreglunnar á Norðurlandi vestra.
Í veðurspám var bent á að hvassast yrði við fjöll og flestir þekkja sitt nágrenni og vita hvar blæs mest í vissum vindáttum. Á vef RÚV.is er sagt frá því að næst öflugasta vindhviðan sem mældist á láglendi í gær, 58,1 m/sek, hafi verið á veðurmæli við Stafá í Sléttuhlíð í Skagafirði, skammt frá Reykjarhóli. Sem kemur fáum sem til þekkja á óvart.
Frétt uppfærð kl. 9:45.
Fleiri fréttir
-
Flugvél tókst á loft í Skagafirði
feykir.is Skagafjörður, Lokað efni 06.02.2025 kl. 11.05Það er kannski ekki merkileg frétt alla jafna að flugvél taki á loft í Skagafirði en í illviðrinu síðasta sólarhringinn þá tókst sýningarvél, sem staðsett var á túninu neðan Samgöngusafnsins í Stóragerði, á loft og endaði á hvolfi.Meira -
Framkvæmdir við nýja frystigeymslu á Eyrinni hafnar
feykir.is Skagafjörður, Lokað efni 06.02.2025 kl. 11.00FISK Seafood og Kaupfélag Skagfirðinga hafa ráðist í framkvæmdir á Eyrinni á Króknum en þar stendur til að reisa nýja frystigeymslu sem nýtist þá bæði FISK Seafood og Kjötafurðastöð KS. Að sögn Jóns Kristins Guðmundssonar, verkefna- og þróunarstjóra hjá FISK Seafood, þá var hafist handa þann 15. nóvember sl. að taka frost og aftengja gamlar frystigeymslur sem fyrir voru á svæðinu þar sem ný geymsla mun rísa. „Strax í kjölfarið var farið að rífa þær byggingar og lauk því verki í byrjun janúar. Þessar byggingar voru reistar árið 1949 samkvæmt fasteignaskrá,“ segir Jón Kristinn.Meira -
Grillaður hunangssilungur og heimagerður frómas | Matgæðingar vikunnar
feykir.is Skagafjörður, Í matinn er þetta helst, Lokað efni 06.02.2025 kl. 10.44Matgæðingar vikunnar í tbl. 18, 2024, voru Árni Gunnarsson og Elenóra Jónsdóttir á Sauðárkróki. Árni er frá Flatatungu í Akrahreppi, hinum forna, og eru foreldrar hans Gunnar heitinn Oddsson, bóndi í Flatatungu, og Helga Árnadóttir, húsfreyja, en Helga er fædd og uppalin á Akranesi. Árni ólst upp í firðinum fagra en flutti til Reykjavíkur eftir stúdentspróf til að nema sagnfræði við HÍ og síðar Háskólann í Bielefeld í Þýskalandi og vann þar sem blaða- og fréttamaður með náminu. Elenóra er fædd og uppalin í Reykjavík en foreldrar hennar voru Jón Sigurðsson og Guðfinna Erla Jörundsdóttir.Meira -
Rokkkór Húnaþings vestra hnyklar vöðvana
feykir.is Skagafjörður, Austur-Húnavatnssýsla, Vestur-Húnavatnssýsla, Listir og menning 06.02.2025 kl. 08.35Vikuna 22.-29. mars nk. mun Rokkkórinn úr Húnaþingi vestra fara á stjá með þrenna tónleika. Já, það er ekki bara farið suður á höfuborgarsvæðið 22. mars, heldur líka austur í Skagafjörð fimmtudaginn 27. mars og svo heima á Hvammstanga 29. mars. Síðustu helgina í apríl mun kórinn svo halda vestur í Búðardal og koma fram á Jörfagleðinni. Það er því nóg fyrir stafni hjá kórnum á næstunni en hafa æfingar staðið yfir með hléum frá því um haustið 2023.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.