Fréttir

Það verður hátíðarstemning á Sauðárkróki í dag, laugardaginn 2. desember, þegar jólaljósin verða tendruð á jólatrénu á Kirkjutorgi við hátíðlega athöfn. Áður en kemur að þeim ljúfa viðburði bjóða Rotarýfélagar gestum og gangandi í árlegt jólahlaðborð í íþróttahúsinu á Króknum og hefst veislan kl. 12 á hádegi.

Stólastúlkur sigla nú með himinskautum í 1. deild kvenna í körfunni og í kvöld gerðu þær sér lítið fyrir og lögðu topplið KR í parket. Það var ekki boðið upp á neina lognmollu í Síkinu því leikurinn varð grjótharður naglbítur þar sem úrslitin réðust í framlengingu. Vesturbæjarliðið leiddi með einu stigi þegar ein og hálf mínúta var eftir en síðustu sex stigin voru Stólastúlkna sem fögnuðu innilega í leikslok. Lokatölur 91-86 og með sigrinum komst lið Tindastóls upp að hlið KR á toppi deildarinnar.

Byggðasafn Skagfirðinga býður öll velkomin í Glaumbæ sunnudaginn 3. desember kl. 16-18. Útgáfuhóf bókarinnar Vetrardagur í Glaumbæ og sýningaropnun samnefndrar sýningar verða í Áshúsi þar sem hægt verður að skoða bókina og virða fyrir sér teikningar og málverk eftir Jérémy Pailler.

Á Facebook-síðu Unglingaráðs Körfuknattleiksdeildar Tindastóls segir að eftirtaldir leikmenn Tindastóls hafa verið valdnir í æfingahópa yngri landsliða KKÍ. Um er að ræða leikmenn liða U15, U16, U18 drengja og stúlkna auk U20 karla og kvenna.

Hin árlega Friðarganga Árskóla fór fram í morgun en þá mynda nemendur skólans keðju á kirkjustígnum frá kirkju og upp á Nafir að ljósakrossinum. Ljósker er látið ganga milli nemendanna sem láta friðarkveðju fylgja með og þegar ljóskerið er komið að enda mannlegu keðjunnar er ljósið kveikt á krossinum við mikinn fögnuð viðstaddra. 

Út er komin hjá Bókaútgáfunni Hólum stórmerk bók um fyrsta sjúkraflugmanninn á Íslandi, Björn Pálsson. Jóhannes Tómasson skráði. Björn Pálsson var frumkvöðull í sjúkraflugi á Íslandi. Hann vann marga hetjudáðina og var kallaður „bjargvættur landsbyggðarinnar“ en hann var oft eina lífsvon sjúkra og slasaðra úti á landi. Hann fór í loftið þótt veðurútlitið væri allt annað en gott til flugs, svo ekki sé nú minnst á lendingarstaðina sem sumir voru varla meira en "lófastærð". Þetta er vægast sagt einstök lesning um einstakan mann og ekki seinna vænna að halda minningu hans á lofti, en Björn lést í flugslysi fyrir 50 árum og var þá ekki sjálfur við stýrið.

Meistaraflokkur kvenna spilar í kvöld við KR í 1. deildinni og er nokkuð ljóst að þetta verður hörkuleikur því hér mætir Tindastóll toppliði deildarinnar. Leikurinn byrjar kl. 19:15 og því tilvalið að mæta aðeins fyrr og splæsa á sig eins og einum hammara fyrir leikinn svo orkulevelið sé í botni til að hvetja stelpurnar áfram. Koma svo Tindastólsfólk nú fyllum við Síkið fyrir stelpurnar okkar.

Í dag, 1. desember, eru 23 dagar til jóla. Feykir ætlar að telja niður í jólin og í leiðinni birta skemmtilegar Elf on a shelf hugmyndir sem fólki hefur dottið í hug að gera. Er það ekki bara skemmtilegt:)

Það voru ánægðir krakkar sem gengu út úr 1. bekk í Varmahlíðarskóla í gær því félagar úr Kiwanisklúbbnum Drangey, ásamt fylgdarkonu úr lögreglunni, komu færandi hendi með endurskinsvestin góðu sem eiga eftir að koma að góðum notum, ekki síst í svartasta skammdeginu. 

Tindastólsmenn heimsóttu Þorlákshöfn í kvöld í Subwaydeildinni. Ekki varð ferðin til fjár því Þórsarar voru sprækir sem lækir og léku á alsoddi megnið af leiknum. Átján stigum munaði í hálfleik en Stólarnir bitu frá sér í þriðja leikhluta. minnkuðu muninn í sex stig en þá settu heimamenn í rallýgírinn og sendu Íslandsmeisturunum fingurkoss um leið og þeir spóluðu yfir þá. Lokatölur 96-79 og Stólarnir því enn með tíu stig að loknum níu umferðum.