Fréttir

Á heimasíðu erasmus.is segir að nýverið fór fram evrópsk verðlaunaafhending þar sem tólf íslenskir kennarar hlutu alls þrettán gæðamerki eTwinning. Gæðamerkið heitir eTwinning Quality Label og geta kennarar sótt um fyrir verkefni sín ár hvert. Þá fengu þrír skólar nafnbótina 'eTwinning skóli' og gengu í hóp þrettán skóla hér á landi sem hafa fengið viðurkenninguna. Álfhildur Leifsdóttir hefur verið, frá árninu 2018, eTwinning sendiherra á Íslandi en eTwinning er rafrænt skólasamfélag í Evrópu og var hún ein af þeim kennurum sem fengu viðurkenningu í þetta sinn.  

Á Facebook-síðu Körfuknattleiksdeildar Tindastóls segir að deildin sé búin að semja við bandaríska leikmanninn Jacob Callowa. Jabob er framherji og 203 cm á hæð og kemur frá liði KB Peja í Kósovó þar sem hann var með rétt tæp 15 stig í leik í deildinni þar og í evrópukeppninni. Jacob er þó flestu Tindastólsfólki kunnugur frá tíma sínum í Val tímabilð 21-22 þar sem Valsmenn tryggðu sér titilinn í lokaseríu gegn Tindastól.

Fimmta umferð í Kaffi Króks deildinni hjá Pílukastfélagi Skagafjarðar fór fram í síðustu viku og mættu 14 einstaklingar til leiks. Spilað var í þremur deildum að þessu sinni og var mótið spennandi að venju, en á endanum hafði Jón Oddur Hjálmtýsson sigur í fyrstu deildinni.

Það var margt um manninn og notaleg jólastemning í Húnabyggð á föstudaginn þegar jólaljósin voru tendruð á tréinu í gamla bænum fyrir framan Hillebrantshúsið. Dansað var í kringum jólatréið, jólasveinarnir komu, lifandi tónlist, grillaðir voru sykurpúðar yfir opnum eldi og ekki má gleyma að jólamarkaður var í Hillebrantshúsinu frá kl. 16-20 um kvöldið. Þar var einnig hægt að kaupa kaffi, súkkulaði og vöfflur. 

Karlakór Bólstaðarhlíðarhrepps heldur tónleika í félagsheimilinu á Hvammstanga í kvöld, mánudaginn 27. nóvember, kl. 20:30 og kostar miðinn 4.000 kr. 

Fyrsti þáttur af Jólastjarnan var sýndur laugardaginn sl. en Blönduósingar eiga einn fulltrúa í þessum þáttum sem heitir Sigrún Erla Snorradóttir. Í haust sendu 150 börn, 14 ára og yngri, inn myndband af sér syngja og komust aðeins tíu börn áfram. Sigrún Erla Snorradóttir var ein af þeim en hún er nemandi í 6. bekk í Húnaskóla og stundar einnig nám við söng í Tónlistarskóla Austur Húnavetninga. 

Um helgina spiluðu sameiginleg lið Tindastóll/Hvöt/Kormákur í 4.fl. karla á Stefnumóti KA um helgina. Send voru tvö lið, eitt í B-deildina og eitt í D-deildina. Spilaðir voru fimm leikir og var hver leikur 1x35 mínútur. Alls fóru 29 hressir strákar á mótið þar sem spilaður er 11 manna bolti og eru margir að stíga sín fyrstu skref á stórum velli á þessu móti. Allir stóðu sig vel og voru liðum sínum til mikillar fyrirmyndar.

Félags- og skólaþjónusta Austur Húnavatnssýslu og Alda Ingibergsdóttir undirrituðu sl. föstudag, 24. nóvember, tveggja ára samning. Samningurinn lýtur að sálfræðiþjónustu í leik- og grunnskólum í Austur Húnavatnssýslu ásamt samstarfi við barnavernd á svæðinu.

Laugardaginn næsta, 2. desember, er hið árlega jólahlaðborð Rotarýklúbbs Sauðárkróks en þessum viðburði var hleypt fyrst af stokki í upphafi aðventu árið 2013 og hefur fest sig í sessi sem ómissandi þáttur í jólaundirbúningi Skagfirðinga. Vel hefur verið mætt í öll skiptin sem hægt hefur verið að efna til veislu og eiga þeir von á um 600 manns í ár. Ekki má gleyma að það er frítt inn en fólk getur lagt fram frjáls framlög á staðnum. Að sögn Róberts Óttarssonar, forseta Rótarýklúbbs Sauðárkróks hefur undirbúningur gengið vel en framundan er að sjóða kjötið og skera, útbúa jafninginn og sósuna, dekka svo upp á föstudagskvöldinu, koma matnum í hús og þá kemur jólalyktin á Krókinn. 

Elvar Már Jóhannsson er einn af áhugaljósmyndurum Skagafjarðar en hann fór á smá ljósmyndarúnt um helgina og náði nokkrum myndum af haferni sem var að spóka sig á Kjalvegi. Þar sem þessi tiltekni haförn var með dökkan gogg gefur það til kynna að um ungan haförn sé að ræða.