Mannlíf

Þátturinn „Ostsee report“, eða Eystrasalts tíðindi í lauslegri þýðingu, verður sýndur á Norðurþýsku ríkissjónvarpsstöðinni NDR í dag kl. 16:00, eða kl. 18:00 að þýskum tíma. Þátturinn er klukkutíma langur og hefur verið mánaðarlega á dagskrá NDR í rúm 30 ár. Í honum er fjallað er um fólk í Norður Evrópu; Íslandi, Svíþjóð, Finnlandi, Noregi og Rússlandi svo dæmi séu nefnd og er um að ræða einskonar „Landa“ þeirra Þjóðverja. Að þessu sinni er að hann að stórum hluta tekinn upp í Skagafirði.

Byggðasafn Skagfirðinga hefur verið tilnefnt til Íslensku safnaverðlaunanna 2016, ásamt Listasafni Reykjavíkur – Ásmundarsafns og sýn­ing­arinnar Sjón­ar­horns. Íslensku safnaverðlaunin er viðurkenning veitt annað hvert ár íslensku safni fyrir framúrskarandi starfsemi. Tilkynnt var um tilnefningarnar í Safnahúsinu við Hverfisgötu í gær, þegar Alþjóðlegi safnadagurinn á Íslandi var haldinn hátíðlegur.

Ólafur Jónsson á Hellulandi í Skagafirði var á dögunum sæmdur gullmerki Kiwanis í tilefni af 60 ára afmæli sínu. Ólafur hefur unnið frábært og óeigingjarnt starf fyrir kiwanisklúbbin Drangey, sem og á landsvísu.

Formenn 10. bekkjar í Árskóla á Sauðárkróki, Róbert Smári Gunnarsson og Alexandra Ósk Guðjónsdóttir afhentu nýlega Ívari Elí Sigurjónssyni, fimm ára flogaveikum dreng á Sauðárkróki, 110 þúsund krónur úr bekkjarsjóði 10. bekkjar. Eins og Feykir hefur greint frá glímir hefur Ívar Elí í nærri tvö ár glímt við alvarlega flogaveiki og þarf á næstunni að fara til Boston til rannsókna og lækninga.

Ármann Reynisson er fæddur árið 1951 og hefur tekið virkan þátt í menningar- og viðskiptalífi á Íslandi allt frá því hann snéri heim frá Englandi að loknu námi við London School of Economics. Feykir hafði samband við Ármann og fékk að heyra aðeins um hans bakgrunn og þá list að skrifa vinjettur, sem hefur undið upp á sig frá því að fyrsta bókin kom út árið 2001.

Fyrstu tvö bindi Dalalífs hafa nú verðið endurútgefin hjá Forlaginu, á 70 ára útgáfuafmæli skáldkonunnar. Er þetta í fjórða sinn sem þetta höfuðverk Guðrúnar kemur út. Fyrsta bindið skipar nú fjórða sætið a metsölulista Eymundsson en annað bindið sjötta sætið.

Heiðurtónleikar Prince verða haldnir í Eldborgarsal Hörpu um aðra helgi, laugardaginn 21. maí. Hljómsveitin sem þar kemur fram ásamt söngvaranum Seth Sharp er m.a. skipuð ungum gítarleikara frá Sauðárkróki, Reyni Snæ Magnússyni.

Nú eru síðustu forvöð að sjá Sæluvikusýningu Leikfélags Sauðárkróks, fullkomið brúðkaup. Aðsókn hefur verið með ágætum og góður rómur gerður að sýningunni, að sögn Sigurlaugar Dóru Ingimundardóttur, formanns Leikfélagsins.

Hin árlega Jónsmessuhátíð á Hofsósi verður að þessu sinni haldið dagana 17.-18. júní. Að sögn Kristjáns Jónssonar, sem situr í Jónsmessunefnd, er undirbúningur í fullum gangi. Dagskrá verður með hefðbundnu sniði og segir Kristján að fótboltaaðdáendur þurfi engu að kvíða því hægt verði að fylgjast með leik Íslands og Ungverjalands á EM í Höfðaborg.

Nemendur í leiklistarvali í 8.-10.bekk í Höfðaskóla á Skagaströnd settu á dögunum upp söngleikinn Mamma mia í leikstjórn Ástrósar Elísdóttur. Sýningin, sem var ríflega klukkustundar löng, byggir á sama handriti og sú sem nú nýtur mikilla vinsælda á fjölum Borgarleikhússins. Er þar um að ræða glænýja og frábæra þýðingu Þórarins Eldjárn.