Mannlíf

Í þessari viku hafa nemendur í 8.-10. bekk Höfðaskóla á Skagaströnd verið í list- og verkgreinaviku þar sem áherslan hefur verið á textíl. Fram kemur í föstudagspistli á heimasíðu skólans að nemendur hafi staðið sig mjög vel en þau hafa lært listasögu, farið í Textílmiðstöðina í Húnabyggð og tekið snið og saumað sér náttbuxur.

Húnaþing vestra og Heilbrigðisstofnun Vesturlands á Hvammstanga eru þátttakendur í þróunarverkefni sem gengur út á að samþætta félags- og heilbrigðisþjónustu fyrir eldra fólk í heimahúsum. Fram kemur í frétt á heimasíðu Húnaþings vestra að opinn kynningarfundur um verkefnið verði haldinn mánudaginn 15. apríl kl. 16:15-17:00 í Félagsheimilinu Hvammstanga.

Árshátíð yngsta- og miðstigs Varmahlíðarskóla var haldin í Menningarhúsinu Miðgarði fimmtudaginn 21. mars síðastliðinn þar sem börnin sýndu fyrir fullum sal og stóðu sig öll með stakri prýði. Það hefur svo sannarlega sýnt sig og sannað hvað það er mikils virði að byrja strax að þjálfa börn í að koma fram í sýningum sem þessum. Sem skilar sér svo í glæsilegum sýningum í eldri bekkjunum og jafnvel alla leið í framhaldsskólann.

Skagfirðingar stimpla sig rækilega inn í menningarlíf Reykvíkinga þessa komandi helgi. Geirmundur Valtýsson heldur upp á 80 ára afmælið með tvennum tónleikum í Hörpu á laugardag en kvöldið áður verða félagarnir Arnar Freyr Frostason og Helgi Sæmundur Guðmundsson, Úlfur Úlfur, með útgáfutónleika í Gamla bíói en það er víst löngu uppselt á þá. Fyrsta viðtalið við þá félaga var í Feyki 25. ágúst 2011 og það ár kom út platan Föstudagurinn langi sem innihélt smelli á borð við Ég er farinn og Á meðan ég er ungur. Þeir slógu síðan algjörlega í gegn með plötunni Tvær plánetur þar sem mátti finna Brennum allt og 100.000. Restin er saga. Feykir sendi nokkrar spurningar á Helga Sæmund í tilefni af tónleikunum nú rétt fyrir páska.

Páskaskemmtun körfuknattleiksdeildar Tindastóls verður í íþróttahúsinu á Króknum í kvöld (laugardag) en þá verður boðið upp á alvöru skrall til styrktar Stólunum. Það verða DJ Ingi Bauer, Úlfur Úlfur og Emmsjé Gauti sem munu annast fjörið.

Það kyngdi niður hvítagullinu á skíðasvæði Tindastóls í Tindastólnum í lok síðustu viku og útlit fyrir ævintýradaga nú um páskahelgina fyrir þá sem vilja renna sér á skíðum eða brettum í bestu brekkunni. Að sögn Sigurðar Haukssonar svæðisstjóra þá verður efri lyftan að öllum líkindum opnuð á morgun, miðvikudag, ef veður leyfir en opnunartímar á svæðinu þessa vikuna og um helgina eru frá kl. 11-16.

Húnahornið segir af því að stjórnarfundur var haldinn þann 21. mars hjá Hollvinasamtökum Heilbrigðisstofnunarinnar á Blönduósi. Eftir fundinn mætti stjórn Styrktarsjóðs A-Hún, þau Valgarður Hilmarsson formaður, Erla Ísafold Sigurðardóttir og Sigríður Eddý Jóhannesdóttir, og færðu samtökunum rausnarlega gjöf, kr: 500.000, upp í kaup á þrekhjóli fyrir skjólstæðinga 3. og 4. hæðar spítalans.

Ingibjörg Axelsdóttir starfsmaður landvinnslu FISK Seafood á Sauðárkróki hefur lagt stígvélin á hilluna eftir farsælan starfsferil hjá fyrirtækinu. Haldið var kaffisamsæti að þessu tilefni í kaffistofu landvinnslunnar og þar voru Ingu færðar þakkir fyrir vel unnin störf og óska samstarfsmenn og stjórnendur fyrirtækisins henni alls hins besta.

Sveinbjörg Rut Pétursdóttir tók við sem nýr formaður Ungmennsambands Vestur-Húnvetninga (USVH) á héraðsþingi sambandsins í liðinni viku. Hún tekur við af Guðrúnu Helgu Magnúsdóttur, sem setið hefur í formannsstólnum síðastliðin fjögur ár. Ekki voru gerðar lagabreytingar á þinginu en lögð fram breytingartillaga ásamt nýrri tillögu um nefndarstörf og voru þær báðar samþykktar.

Karólínu í Hvammshlíð þarf nú varla að kynna fyrir fólki. Og þó, hún er vissulega fædd og uppalin í sveit í Þýskalandi þar sem nágrannar hennar áttu kind sem Karólína notaði eins og flestir notast við hesta. Það má því segja að Karólína sé fædd „dýrakona“ og þó uppruninn sé þýskur er hún íslenskari en margir Íslendingar. Nú er hún búin að búa lengur á Íslandi heldur en í Þýskalandi svo nú tölum við um hana sem Íslending. Eftir framhaldsskóla, þegar Karólóna var 19 ára gömul, nánar tiltekið árið 1989, kom hún fyrst til Íslands. „Þegar ég lenti í Keflavík voru engin göng eða neitt, maður kom bara strax undir beran himinn. Ég man ennþá þegar ég kom út úr flugvélinni, þetta loft, það var eins og tært vatn og ég vissi bara strax að þetta væri landið mitt og það hefur ekkert breyst. Ísland er landið mitt. Ég hef litla sem enga tengingu til Þýskalands lengur,“ segir Karólína.