Fréttir

Árlega og vinsæla Myndagátan í jólablaði Feykis fór sem betur fer ekki úr blaðinu með Páli Friðrikssyni fráfarandi ritstjóra blaðsins. Hann er maðurinn á bak við gáturnar sem margir bíða árlega eftir að spreyta sig á og það er óhætt að segja að hvorki nýi blaðamaðurinn eða sá sem tók við ritstjórastólnum séu fær um að búa til myndagátu handa ykkur. Það var gaman að fara í gegnum lausnirnar og setja nöfnin í pott en alls bárust á fjórða tug réttra lausna.

Enn stendur fjölbýlishúsið sem byggt var við Freyjugötu á Sauðárkróki autt og hafa ýmsir velt fyrir sér hvar þau mál standa. Í ágúst í fyrra, eða fyrir tæpu einu og hálfu ári síðan, birti Feykir frétt þess efnis að verklok væru áætluð mánaðamótin þar á eftir og mátti skilja að stutt væri í að átta íbúðir hússins færu í leigu. Ekki gekk það eftir en samkvæmt heimildum Feykis er nú unnið að lokafrágangi íbúðanna og í kjölfarið verða þær auglýstar til leigu.

Það poppa ýmsir upp með hressa og skemmtilega leiki þegar líður að jólum og þar er Pósturinn engin undantekning. Þar á bæ hafa menn síðustu daga staðið fyrir leitinni að svakalegustu jólapeysunni og þátttakan var það góð að Póstmenn treystu sér ekki til að velja sigurvegara. Því fer nú fram kosning milli sjö þátttakenda um svakalegustu jólapeysuna. Að sjálfsögðu er Skagfirðingur í hópnum, Inga Heiða Halldórsdóttir frá Miklabæ í Óslandshlíðinni.

Skagastrandarstöllurnar Birgitta Rún Finnbogadóttir og Elísa Bríel Björnsdóttir, sem brilleruðu á fótboltavellinum í sumar, hafa verið valdar til æfinga með U-16 landsliði Íslands.

Textílmiðstöð Íslands hefur það fyrir árlega hefð að skrifa jólabréf þar sem sagt er frá verkefnum ársins og því sem framundan er. Hérna fyrir neðan má lesa annálinn frá þeim. 

Jólatónleikar Jólahúna verða haldnir í Félagsheimilinu á Hvammstanga í kvöld. Rannveig Erla skipuleggjandi tónleikanna segir að æfingar hafa gengið mjög vel og er spenningur fyrir tónleikum kvöldsins.

Á huni.is segir að sl. viku hafi stjórn Hollvinasamtakanna á Heilbrigðisstofnun Blönduóss afhent tvo björgunarstóla/flóttastóla til sjúkrahússins og eiga þeir eftir að koma sér afar vel ef rýma þarf húsnæðið í skyndi og ekki er hægt að nota lyfturnar í húsinu. Þá fengu Hollvinasamtökin einnig afhenta peningagjöf frá systkinunum á Hofi í Vatnsdal, þeim Ingunni, Páli, Hjördísi og Jóni, til minningar um móður þeirra frú Vigdísi Ágústsdóttur.

Föstudaginn 15. desember byrjaði kosning um jólalegasta húsið og jólalegustu götuna í Sveitarfélaginu Skagaströnd og er þetta í annað sinn sem þessi kosning fer fram. Í ár verður hins vegar sú breyting á að íbúum gefst kostur á að senda inn tilnefningar en í fyrra var dómnefnd sem stóð fyrir valinu. Hægt er að senda inn tilnefningar til miðnættis 26. desember 2023 og munu úrslitin birtast á heimasíðu sveitarfélagsins. íbúar á Skagaströnd eru hvattir til að skella sér á rúntinn og hlusta á ljúfa jólatóna á meðan ekið er um götur bæjarins til að meta hvað er jólalegasta húsið og mest skreytta gatan.

Rétt í þessu kom tilkynning um að glæsilega fuglaskoðunarhúsið á Spákonufellshöfða væri tilbúið til notkunar en Feykis sagði frá því í lok október að uppsetning á nýju fuglaskoðunarhúsi á Spákonufellshöfða væri í fullum gangi. Það er því um að gera að gera sér ferð og skoða þetta fallega hús sem Auður Hreiðarsdóttir hjá ESJA Architecture hannaði en það var reist af Verk Lausnum á Skagaströnd með stuðningi úr Framkvæmdasjóði Ferðamannastaða. 

Ég var að uppgötva að það eru aðeins 6 dagar til jóla.... Ég er reyndar búin að kaupa allar jólagjafirnar og byrjuð að pakka inn en allt annað er ég ekki byrjuð á að gera og mun eflaust ekki hafa tíma í að gera þetta árið. Jólin koma, því miður eða á maður að segja frekar sem betur fer, þó ég sé ekki búin að skúra og skrúbba alla veggina heima hjá mér, baka allar smákökusortirnar og allt annað sem fylgir jólunum sem ég man ekki núna því stressið er að yfirtaka heilann í mér. Eigum við nokkuð að leyfa því að koma og setja bara í uppgjafargírinn og stilla á þetta reddast allt saman:)