Skagafjörður

Skagfirðingurinn Björn Sigurður Jónsson frá Fagranesi eða Böddi eins og hann er oftast kallaður skrifaði færslu á Facebooksíðu sína sem hefur heldur betur vakið athygli í samfélaginu, fyrir þær sakir sérstaklega að hann líkt og svo margir Íslendigar væri einfaldlega ekki á lífi í dag ef Reykjavíkurflugvöllur hefði ekki verið. Böddi byrjar færsluna sína á því að segja okkur sína hlið á því að vera í lífshættu. Blaðamaður spjallaði við Bödda í gær sem bar sig ótrúlega ,þrátt fyrir að vera búin að vera í ansi kröppum lífsdansi undanfarið.

Það hefur ekki farið fram hjá neinum umræðan um lokun austur/vestur flugbrautar á Reykjavíkurflugvelli þar sem tré í Öskjuhlíð eru orðin það hávaxin að þau ógna öryggi flugs um völlinn. Var brautinni lokað um síðustu helgi sem er afar bagalegt og þá sér í lagi vegna sjúkraflugs. Á fundi sínum í gær mótmælti sveitarstjórn Skagafjarðar harðlega því aðgerðarleysi sem átt hefur sér stað hjá Reykjavíkurborg með þeim afleiðingum að búið er að loka brautinni.

Matgæðingar vikunnar í tbl 32, 2024, voru þau Ragnheiður Matthíasdóttir og Halldór Halldórsson en það voru þau Lóa og Muggur sem skoruðu á þau hjón. Ragnheiður starfar sem deildarstjóri á yngsta stigi í Árskóla og Halldór er héraðsdómari á Sauðárkróki.

Skáksamband Íslands kom færandi hendi í Húnaskóla þriðjudaginn var en heimsóknin er liður í undirbúningi fyrir 100 ára afmæli Skáksambandsins sem verður þann 23. júní í Húnabyggð. Það voru þeir Gunnar Björnsson og Björn Ívar Karlsson sem komu fyrir hönd Skáksambandsins með tíu taflsett og tíu skákklukkur sem nemendur skólans geta nú notað í frítíma sínum í skólanum.

Húnaþing vestra óskar eftir myndum til að birta í kynningarefni, á heimasíðu og samfélagsmiðlum sveitarfélagsins. Markmið keppninnar er að auka flóru myndefnis sem birt er í skýrslum, fréttum og öðru á vegum Húnaþings vestra. Frestur til að senda inn er til 28. febrúar 2025 og er því um að gera að fara yfir bæði gamlar og nýjar myndir eða taka upp myndavélina og byrja að mynda strax í dag. 

Sjálfstæðisflokkurinn heldur landsfund um næstu mánaðamót. Það má búast við spennandi fundi enda munu Sjálfstæðismenn velja sér nýjan formann þar sem Bjarni Benediktsson hyggst ekki gefa kost á sér og hefur þegar látið af þingstörfum. Tveir frambjóðendur eru um hituna þegar hér er komið sögu en það eru þær Áslaug Arna Sigurbjörnsdóttir og Guðrún Hafsteinsdóttir.

Bændablaðið segir frá því að hagnaður Kjötvinnslunnar Esju gæðafæði, sem er í eigu Kaupfélags Skagfirðinga, var 290 milljónir króna í fyrra, samanborið við tæpar 146 milljónir króna árið á undan og hefur afkoma þess aldrei verið betri. Tekjur ársins 2023 námu 5,5 milljörðum króna og jukust um 1,2 milljarða frá árinu 2022..

Starfsfólk Vegagerðarinnar og verktakar vinnur nú að því að gera við holur og aðrar skemmdir sem hafa myndast á vegum víða um land eftir umhleypingasamt veður. Unnið er við erfiðar aðstæður, þar sem umferð ökutækja er mikil, jafnvel dimmt í veðri, mikil rigning og bleyta. Erfitt getur verið fyrir ökumenn að sjá fólk að störfum sem skapar hættu á slysum. Vegagerðin biður vegfarendur að sýna sérstaka varkárni og draga úr hraða þegar ekið er hjá viðgerðarsvæðum segir á heimasíðu Vegagerðarinnar. 

Jón Jökull Jónsson hefur verið ráðinn í starf umsjónarmanns verkstæðis á Veitu- og framkvæmdasviði hjá sveitarfélaginu Skagafirði og mun hefja störf í mars.

Árlega hefur Iðnaðarmannafélag Reykjavíkur haldið Nýsveinahátíð til heiðurs nýsveinum sem lokið hafa sveinsprófi með afburða árangri í sinni iðngrein. Skagfirðingurinn Heiðdís Líf Jóhannsdóttir hlaut á dögunum viðurkenningu fyrir afburða árangur í sinni Iðngrein – Framreiðslu. Það var frú Halla Tómasdóttir forseti Íslands sem afhenti viðurkenninguna.