Mannlíf

Um síðustu mánaðamót lét Gísli Svan Einarsson af störfum hjá FISK Seafood eftir 35 farsæl ár í starfi. Á heimasíðu FISK Seafood segir að upphafið megi rekja til vorsins 1989 þegar Kaupfélagið fékk Gísla, sem þá var kennari við Samvinnuháskólann á Bifröst, til þess að koma norður og halda fyrirlestur um samskipti, þjónustulund og fleiri málefni. Mikil ánægja var meðal þeirra sem sóttu námskeiðið hjá Gísla og úr varð að Gísli var ráðinn í fullt starf hjá Kaupfélaginu í kaffipásu námskeiðsins.

Fjöldi skráninga í nýja Dansskóla Húnaþings vestra fór fram úr björtustu vonum. Alls eru 52 nemendur nú skráðir og því ljóst að þörfin fyrir dansskóla í Húnaþingi er greinilega mikil, segir á heimasíðu Menningarfélags Húnaþings vestra. „Það er sérstaklega ánægjulegt að fjöldi nemenda kemur frá nágrönnum okkar og vinum í austursýslunni. Dæmi er um að sumir nemendur séu að fara keyra 80 kílómetra, aðra leiðina, til að mæta,“ segir Sigurður Líndal formaður Menningarfélagsins.

Það var falleg stund að leik loknum hjá Stólastúlkum á laugardaginn þegar Donni tilkynnti stuðningsmönnum að Hannah Jane Cade hefði verið að spila sinn síðasta leik fyrir lið Tindastóls. Hún var að klára sitt annað tímabil á Króknum, fór með liðinu upp úr Lengjudeildinni síðasta sumar og spilaði stóra rullu í að halda liðinu í Bestu deildinni í sumar.

Félag eldri borgara í Húnaþingi vestra fékk góða heimsókn fyrir helgi þegar 43 félagar í Félagi eldri borgara í Borgarnesi og nágrenni komu í heimsókn. „Við buðum þeim upp á kjötsúpu, brauð og smjör ásamt kaffi og hjónabandssælu, segir í Facebook-færslu félagsins.

Á Fésbókarsíðu Fornverkaskólans var í síðustu viku sagt frá því að mikið hafi verið um dýrðir hjá skólanum í september. Tvö námskeið voru haldin í torfhleðslu, annað á Tyrfingsstöðum á Kjálka og hitt á Syðstu-Grund í Blönduhlíð.

Því hefur stundum verið haldið fram að vorið sé tími Pavels Ermolinski. Gærkvöldið var í það minnsta ekki að afsanna þá kenningu því ekki var nóg með að kappinn hlyti talsvert slæma útreið í Kappsmálum Sjónvarpsins, þá urðu meistarar Tindastóls, sem Pavel stýrir jú, að sætta sig við tap gegn liði Hattar frá Egilsstöðum í undanúrslitum Álborg SK88 mótsins sem fram fer í Borgarnesi.

„Já, jólatónleikarnir Jólin heima verða haldnir í Miðgarði laugardaginn 9. des. Þetta verður í fjórða skiptið sem þessi hópur blæs til jólatónleika en nú verður sú breyting að tvennir tónleikar fara fram sama dag, fjölskyldutónleikar um miðjan dag og síðan aðrir um kvöldið,“ segir jólatónleikahaldarinn Jóhann Daði Gíslason þegar Feykir spyr hvort það eigi að skella í Jólin heima enn og aftur.

Skemmtiþátturinn Kappsmál er enn á ný kominn í rennsli hjá Sjónvarpinu en þar eru þátttakendur grillaðir yfir hægum sjónvarpseldi um íslensku tunguna. Þjálfari karlaliðs Tindastóls í körfuknattleik, Pavel Ermolinski, verður í hópi þeirra sem verða grillaðir í kvöld en hann og félagi hans, Guðmundur Stephensen, mæta íþróttafréttakonum RÚV, snillingunum Eddu Páls og Helgu Margréti.

Fulltrúar frá Icelandic Roots samtökunum voru á ferð um Norðurland vestra í síðustu viku og afhentu minnisplatta bæði á Borðeyri og á Sauðárkróki til minningar um forfeður sína sem fóru vestur um haf í kringum aldamótin 1900. Sjálfboðaliðar Icelandic Roots, sem koma frá Norður-Ameríku, ferðast nú um Ísland til að fagna tíu ára afmæli samtakanna. Þeir heimsækja mikilvæga sögustaði, hitta félaga sem búsettir eru á Íslandi og setja upp minnisvarða um vesturfarana.

Það styttist í Laufskálaréttarhelgina, en það eru þeir Siggi Doddi, Adam Smári og Viggó Jónsson sem eru mennirnir á bak við stóra Laufskálaréttarballið sem haldið verður í Reiðhöllinni Svaðastöðum laugardaginn 30. september næstkomandi.