Íþróttir

Uppi varð fótur og fit í lok síðustu viku eftir að kvisast hafði út að grunur væri um veðmálasvindl tengt leik ÍR og Tindastóls í Dominos-deild karla sem fram fór sl. fimmtudag. Vísir.is greindi strax frá því að leikmenn Tindastóls lægju undir grun þó hvergi hafi komið fram einhver rökstuðningur varðandi það, aðeins að lið Tindastóls tapaði leiknum en það hefur reyndar komið fyrir áður að leikir hafi tapast í Breiðholtinu.

Frjálsíþróttasamband Íslands hefur birt nýjan úrvalshóp unglinga 15-19 ára en hann samanstendur af íþróttamönnum sem náðu viðmiðum á utanhússtímabilinu 2019. Á heimasíðu Frjálsíþróttasamband Íslands kemur fram að þeir sem ná viðmiðum á innanhússtímabilinu haust 2019 - vor 2020 bætast við hópinn í mars. Skagfirðingurinn Andrea Maya Chirikadzi er ein þessa úrvalsíþróttafólks.

Tindastóll og ÍR mættust í Síkinu í gær í leik þar sem lið Tindastóls gat tryggt stöðu sína á toppi 1. deildar kvenna fyrir jólafrí. Leikurinn var jafn og spennandi en það var lið ÍR sem leiddi nánast allan leikinn en Stólastúlkur voru hársbreidd frá því að stela sigrinum af Breiðhyltingum en lukkudísirnar voru ekki í liði Tindastóls á lokamínútunni. Lokatölur í skúffelsis ósigri voru 62-64.

Þar sem ekki er fært á AVIS skíðasvæðið í Tindastól þessa dagana verður áður auglýstum hittingi yngri skíðaiðkenda frestað til 28. desember klukkan 14:00. Áætlað er að þá verði búið að opna svæðið og þá tilvalið að skella sér á skíði líka.

Í hádeginu í dag mátti lesa fréttir þar sem sagt var að grunur væri um veðmálasvindl tengdum leik Tindastóls og ÍR sem fram fór í Reykjavík í gær. Kom fram í frétt Vísis.is að grunur beindist að leikmönnum Tindastóls en ekki ÍR. Staðfesti formaður KKÍ, Hannes S. Jónsson, að sambandið væri með málið til skoðunar. Körfuknattleiksdeild Tindastóls hefur nú sent frá sér yfirlýsingu um málið.

Sagt er frá því á Vísi í dag að KKÍ sé með veðmálasvindl í skoðun frá leik ÍR og Tindastóls í gær þar sem Tindastóll lét í minnipokann gegn gestgjöfum. Sagt er að sterkur orðrómur hafi farið á kreik í gærkvöldi um að maðkur væri í mysunni og heimildarmenn Vísis innan veðmálageirans haldi því fram að óeðlilega mikið hefði verið veðjað á leikinn.

Tindastólsmenn brutust í gær suður yfir snjóhuldar heiðar og alla leið í Breiðholtið þar sem baráttuglaðir Hellisbúar biðu eftir þeim. Það hafa oftar en ekki verið hörkuleikir á milli Stólanna og ÍR og sú varð raunin í gær en því miður voru það heimamenn sem reyndust sterkari að þessu sinni. Þeir höfðu frumkvæðið lengstum í leiknum og lið Tindastóls náði ekki nægilegu áhrifaríku áhlaupi á lokakafla leiksins til að snúa leiknum sér í vil. Lokatölur því 92-84 fyrir ÍR.

Stelpurnar í Meistaraflokki kvenna í körfuboltanum þurfa allan þann stuðning sem völ er á á morgun þegar þær mæta Haukum í Síkinu kl. 14:00. Lið Hauka, er eins og staðan er í dag, í 5. sæti í Dominosdeildinni og verður því gaman að sjá hvar stelpurnar okkar standa í þessum leik en þær eru á toppi 1. deildarinnar með 11 leikna leiki og 16 stig. Þær eru allar sem ein búnar að standa sig einstaklega vel í vetur undir stjórn Árna Eggerts og hvetjum við alla til að mæta og styðja stelpurnar til sigurs. Á meðan á leiknum stendur verður boðið upp á vöffluhlaðborð þar sem fólk getur borðað á sig gat af vöfflum og borgar aðeins 1000 kr. á mann fyrir.

Um síðustu mánaðarmót komu félagsgjöld inn í heimabanka félagsmanna Tindastóls á aldrinum 18-70 ára en um svokallaða valgreiðslu er þó að ræða. Á heimasíðu Tindastóls eru þeir félagar sem hafa tök á hvattir til að leggja félaginu lið og greiða félagsgjaldið, 3500 krónur.

Tindastóll og Álftanes mættust í Síkinu í kvöld í 16 liða úrslitum Geysisbikars karla. Lið gestanna er í 1. deildinni og þeir reyndust ekki mikil fyrirstaða, Stólarnir náðu ágætri forystu undir lok fyrsta leikhluta og voru 54-28 í hálfleik. Heldur hægðist á fjörinu í síðari hálfleik en lið Tindastóls vann alla leikhlutana og leikinn því örugglega 91-55.