Skagafjörður

Hið árlega stúlknamót Tindastóls, ÓB-mótið, fer fram um helgina. Mótið er ætlað stúlkum úr 6. flokki og er leikinn fimm manna bolti á laugardegi og sunnudegi.

Fjórðu deildar lið Tindastóls mætti þriðju deildar liði Hvíta riddarans í Fótbolta.net bikarnum í gærkvöldi en leikið var í Malbiksstöðinni að Varmá (!?). Það vantaði engin smápeð í lið Tindastóls en Dom, Domi og Konni voru fjarri góðu gamni. Eftir nokkuð trausta Sikileyjarvörn fyrstu 45 mínúturnar var markalaust að loknum fyrri hálfleik en endatafl Tindastólspilta reyndist glatað, riddarar Mosfellinga gengu á lagið og mátuðu gestina nokkuð létt. Lokatölur 4-0.

Nú á vordögum lauk framkvæmdum við höfnina á Hofsósi. Framkvæmdin hefur aukið kyrrð og öryggi hafnarinnar til muna sem smábátahafnar, að sögn Sigfúsar Inga Sigfússonar, sveitarstjóra Skagafjarðar. Það voru Víðimelsbræður sem unnu verkið að undangengnu útboði sem Vegagerðin stóð fyrir. Verklok voru í apríl 2023.

Það var nágrannaslagur á Þórsvellinum í gærkvöldi þegar Stólastúlkur heimsóttu lið Þórs/KA í Bestu deild kvenna. Lið Akureyringa hefur löngum verið liði Tindastóls erfitt og lítið gengið að krækja í stig gegn þeim. Á því varð engin breyting í gærkvöldi en eftir markaþurrð fyrsta klukkutímann þá opnuðust flóðgáttir í vörn gestanna eftir að heimastúlkur náðu forystunni. Lokatölur 5-0.

Nú er þjóðhátíðardagur okkar Íslendinga nýliðinn en stofnun lýðveldis 17. júní árið 1944 markaði endalok sambands Danmerkur og Íslands sem staðið hafði í aldir. Þetta sjálfstæði, sem við nú varðveitum, fékkst ekki bara af því bara, og okkur ber að gæta þess í hvívetna, menningu okkar og tungu. Þó að það virðist langt síðan sá atburður átti sér stað eru enn um fimmtán þúsund manns sem byggja landið, sem annað hvort fæddust á því ári eða fyrr. Um síðustu áramót voru 1.857 sem fæddust 1944 og eru því 79 ára á þessu ári.

Að undanförnu hefur sveitarfélagið Skagafjörður kynnt tillögu að deiliskipulagi fyrir íbúðarbyggð við Sveinstún á Sauðárkróki. Gert er ráð fyrir 38 lóðum í Sveinstúni fyrir allt að 84 íbúðum í einbýlis-, par-, rað- og fjölbýlishúsum. Nú er hægt að skoða kynningarmyndband á heimasíðu Skagafjarðar þar sem Björn Magnús Árnason, landfræðingur hjá Stoð verkfræðistofu, fer yfir það helsta í tillögunni og er sjón sögu ríkari.

Varmhlíðingurinn Rúnar Birgir Gíslason lauk nú á dögunum námskeiði til að verða tæknifulltrúi FIBA (e. FIBA Technical Delegate), en FIBA stendur fyrir Alþjóða körfuknattleikssambandið.

Á vef Stjórnarráðsins kemur fram að Willum Þór Þórsson heilbrigðisráðherra hafi úthlutað tæpum 1,1 milljarði króna úr Framkvæmdasjóði aldraðra en hlutverk sjóðsins er að stuðla að uppbyggingu og efla öldrunarþjónustu um allt land. Norðurland vestra frítt við framlag úr sjóðnum.

Steinn Leó Sveinsson, sviðsstjóri veitu- og framkvæmdasviðs, kynnti stöðu á framkvæmdum við leik- og grunnskóla í Varmahlíð á fundi fræðslunefndar Skagafjarðar fyrir helgi. Auk þess hann fór yfir stöðu framkvæmda við aðrar skólabyggingar í sveitarfélaginu en í ferli eru viðhaldsframkvæmdir bæði við Árskóla og Grunnskólann austan Vatna á Hofsósi.

Liðið er skipað þeim Hildi Hebu Einarsdóttur, Önnu Karen Hjartardóttur, Tómasi Bjarka Guðmundssyni, Brynjari Má Guðmundssyni og Unu Karen Guðmundsdóttur. Þjálfari þeirra er Atli Freyr Rafnsson.