Íþróttir

Lið Kormáks Hvatar spilaði fyrsta leikinn í D-riðli 4. deildar um liðna helgi en þá mættu þeir liði Léttra á Hertz-vellinum í Breiðholtinu. Áður en keppni hófst sendi Feykir nokkrar spurningar á Ingva Rafn Ingvarsson sem tók við þjálfun liðsins nú á vordögum eftir smá sviptingar á þjálfaramarkaðnum. Hann segir lið sitt fara fullt sjálfstrausts og tilhlökkunar inn í sumarið.

Þriðji leikurinn í einvígi Keflavíkur og Tindastóls fer fram í Keflavík á laugardag og hefst kl. 17:00. Keflvíkingar hafa unnið báða leikina hingað til og eiga möguleika á að sópa Stólunum út úr úrslitakeppninni en eflaust ætla strákarnir okkar að selja sig dýrt. Feykir lagði nokkrar spurningar fyrir Baldur Þór Ragnarsson þjálfara Tindastóls sem bendir stuðningsmönnum Stólanna á að gefast ekki upp. „Það er alltaf möguleiki á comebacki.“

Í kvöld mættust lið Breiðabliks og Tindastóls í Pepsi Max deild kvenna en Blikar eru núverandi Íslandsmeistarar. Það mátti því búast við erfiðum leik í Kópavoginum en Stólastúlkur börðust eins og ljón. Það var ekki fyrr en um stundarfjórðungur var eftir af leiktímanum sem Blikar brutu ísinn og gerðu eina mark leiksins. Lokatölur 1-0 og fyrsta tap Tindastóls í efstu deild staðreynd.

Skagfirðingurinn Rúnar Már Sigurjónsson varð á dögunum rúmenskur meistari með liði sínu CFR Cluj.

Lið Tindastóls og Keflavíkur mættust í Síkinu í gær í öðrum leik liðanna í átta liðum úrslitum Dominos-deildarinnar. Suðurnesjapiltarnir unnu fyrsta leikinn með átta stiga mun. Líkt og þá sýndu Tindastólsmenn seiglu í gærkvöldi, komu sterkir til leiks í síðari hálfleik og það var allt jafnt þegar aðeins fjórar mínútur voru eftir af leiknum. Þá reyndust gæði gestanna Stólunum ofviða og sérstaklega gekk illa að hemja Hörð Axel að þessu sinni. Lokatölur 74-86 og Keflvíkingar komnir með Stólana í skrúfstykki.

Þann 17. Maí úthlutaði Frjálsíþróttasamband Íslands (FRÍ) styrkjum úr afrekssjóði FRÍ. Tilgangur afrekssjóðs FRÍ er að styrkja það frjálsíþróttafólk sem hefur náð góðum árangri í sínum greinum, fyrir komandi keppnistímabil.

Nú er Golfsumarið að fara af stað og er Golfklúbbur Skagafjarðar (GSS) í óða önn að undirbúa sumarið uppi á Hlíðarendavelli. Ný störf hafa verið sköpuð og hefur Atli Freyr Rafnsson verið ráðinn íþróttastjóri og Karen Owolabi verslunar- og þjónustustjóri.

Lið Varmahlíðarskóla er komið áfram í úrslitakeppni Skólahreysti 2021 sem fer fram þann 29. maí næstkomandi.

Körfuboltabúðir Tindastóls verða haldnar dagana 9.-13. ágúst 2021 á Sauðárkróki. Búðirnar eru ætlaðar stelpum og strákum sem eru fædd árin 2005 til 2009. Á næstu dögum munu þjálfaranir sem verða í búðunum verða kynntir til leiks.Stefnt var að því að halda samskonar körfuboltabúðir í fyrra og var aðsókn framar vonum ... en að sjálfsögðu þurfti að fresta búðunum vegna Covid. Nú skal reynt á ný og hlakkar körfuboltafólk á Króknum til að sjá unga og spræka iðkendur mæta til leiks í ágúst.

Íslandsmeistaramót unglinga í badminton fór fram á Akranesi um helgina þar sem 168 keppendur frá níu félögum öttu kappi í einliðaleik, tvíliðaleik og tvenndarleik í U11-U19. Í fyrsta sinn sendi badmintondeild Tindastóls keppendur á mótið, systurnar Júlíu Marín, sem spilar í U11 og Emmu Katrínu í U13 og náðu þær frábærum árangri.