A-Húnavatnssýsla

Á heimasíðu Grunnskóla austan Vatna segir að textasamkeppnin Fernuflug var haldin meðal íslenskra grunnskólanema í 8. - 10. bekk í septembermánuði og voru sendir inn 1.200 textar. Það er gaman að segja frá því að textar frá tveimur nemendum GaV voru valdir til birtingar á mjólkurfernum MS en alls verða birtir 48 textar.

Meistaraflokkur karla tók á móti Val sl. föstudagskvöld og var bæði geggjuð mæting og stemning í Síkinu sem minnti helst á úrslitaeinvígið í vor. Fyrir leikinn voru Helga Rafni Viggóssyni þökkuð störf hans fyrir fèlagið og fékk treyjan hans sinn stað uppi í rjáfri en hann hefur spilað hvorki meira né minna en 22 tímabil fyrir félagið. Geri aðrir betur. Farið verður yfir feril Helga Rafns í kynningarblaði Körfuknattleiksdeildar Tindastóls, Stóllinn 2023/2024, sem kemur út á næstu vikum og verður dreift í öll hús á Króknum. 

Meistaraflokkur kvenna spilaði sinn fyrsta heimaleik í Síkinu sl. laugardag þegar þær fengu ungmennaflokk Stjörnunar í heimsókn. Lokatölur voru 85-65 fyrir Stólastúlkum og náðu þær þar með í sinn fyrsta sigur í vetur.

Laugardagskvöldið 28. október, fyrsta vetrardag, viðraði vel í Skagafirði og náði Elvar Már Jóhannsson þessari fallegu mynd af deildarmyrkvanum sem átti sér stað milli kl.19:35 og 20:53. Deildarmyrkvi var að þessu sinni lítill en þegar mest var hylur skuggi jarðar 6% af tunglskífunni. Tunglið lítur þá út eins og tekinn hafi verið örlítill biti úr syðsta hluta þess og náði myrkvinn hámarki um 20:15. Síðast varð tunglmyrkvi fyrsta vetrardag, þann 27. október, árið 1901 og var þá deildarmyrkvi líka, ekkert ósvipaður þeim sem sást á laugardaginn.

Í fréttatilkynningu frá Steinull kemur fram að Eyþór Fannar Sveinsson hafi verið ráðin í starf Sölu- og markaðsstjóra hjá Steinull hf. Starfið var auglýst um miðjan september og sá Hagvangur um umsóknir og ráðningarferlið í samráði við Steinull og alls bárust 12 umsóknir um starfið. 

Eitt skimunarsýni frá bænum Stórhóli í Húnaþingi vestra reyndist jákvætt fyrir riðu. Um er að ræða sýni úr einni tveggja vetra á, en sýni eru tekin úr öllu fullorðnu fé sem sent er til slátrunar og þau rannsökuð með tilliti til riðu. Ekki hafði borið á sjúkdómseinkennum hjá kindinni eða hjá öðrum kindum á bænum. Riða greindist síðast á bænum árið 2006 en á nágrannabæ árið 2021. Bærinn Stórhóll tilheyrir Húna- og Skagahólfi og er undirbúningur fyrir áframhaldandi aðgerðir kominn í gang.

Sigurbjörg Kristrún eða Kristrún eins og hún er oftast kölluð er fædd og uppalin í Skagafirði og hefur búið þar nánast allt sitt líf. Kristrún hefur unnið á Heilbrigðisstofnuninni á Sauðárkróki í um 30 ár og unnið við hin ýmsu störf þar. Hún útskrifaðist sem sjúkraliði 1996 og svo sem hjúkrunarfræðingur árið 2000, Kristrún segir að hún hefði ekki getað valið betri starfsvettvang því þetta er fjölbreytt og afar gefandi starf.

Matgæðingar vikunnar í tbl. 6 voru Þyrey Hlífarsdóttir og Dagur Þór Baldvinsson í Víðiholti. Þau eiga þrjú börn, Evu Rún, Hlífar Óla og Baldvin Orra. Þyrey og Dagur eru bæði Skagfirðingar, Þyrey frá Víðiholti og Dagur frá Sauðárkróki. Þyrey er kennari í Varmahlíðarskóla og Dagur er hafnarstjóri Skagafjarðarhafna. Á þeirra heimili er mikið eldað af mat og höfum við gaman af því að halda matarboð og fá fjölskyldu og vini til okkar í mat. „Ef ég myndi segja að við hjónin værum jafn dugleg að elda þá væri það bara alls ekki satt. Við getum orðað það þannig að annað okkar er meira fyrir að elda matinn og hitt gerir meira af því að borða matinn,“ segir Þyrey.

Á heimasíðu northiceland.is segir að uppskeruhátíð ferðaþjónustunnar á Norðurlandi hafi farið fram í gær, fimmtudaginn 26. október, og hafa þau ferðaþjónustufyrirtæki sem eru aðilar í Markaðsstofu Norðurlands kost á að fara í þessa ferð. Uppskeruhátíðin er haldin á hverju hausti og markmiðið að skoða nýtt svæði á hverju ári. Að þessu sinni var Austur-Húnavatnssýsla fyrir valinu og fyrirtæki innan svæðisins heimsótt sem fá í leiðinni tækifæri til að kynna sig og sína starfsemi og mynda ný tengslanet innan ferðþjónustunnar. Farið var í heimsóknir til ýmissa fyrirtækja í Vatnsdal, á Skagaströnd og á Blönduósi. Auk þess voru áhugaverðir staðir skoðaðir, til dæmis nýr útsýnisstaður í Vatnsdalshólum og Þrístapar þar sem Magnús frá Sveinsstöðum sagði eftirminnilega frá síðustu aftökunni á Íslandi. 

Nú er öðru viðburðaríku og annasömu sumri lokið hjá Byggðasafni Skagfirðinga. Frá og með 21. október lauk formlegum opnunartímasafnsins en verður það áfram opið eftir samkomulagi í vetur. Nú skiptir starfsfólk safnsins um gír og fer að huga að haustverkum, faglegu innra starfi og láta sig hlakka til að standa fyrir skemmtilegum viðburðum fyrir nærsamfélagið.