Skagafjörður

Ég rak augun í mjög svo athyglisverða frétt á Hringbraut í vikunni með yfirskriftinni - Gísli Marteinn setti Twitter á hliðina: „Veit einhver hvað við erum að fara drepa mörg lömb næstu vikurnar?“ Að vonum fékk sjónvarpsmaðurinn og borgarfulltrúinn fyrrverandi mikil viðbrögð við færslu sinni á Twitter enda gildishlaðin í topp.

Króksarinn brottflutti, Hulda Jónasar, hefur verið ötul við að færa landsmönnum gullkorn liðinna ára í formi sönglaga gamalla tíma. Of langt mál er að nefna alla þá tónleika sem hún hefur staðið fyrir en nú er komið að því að heiðra eina ástsælustu söngkonu þjóðarinnar, Helenu Eyjólfsdóttur föstudaginn 21. október í Hofi á Akureyri og laugardaginn 29. október í Salnum Kópavogi.

Föstudagur er í uppáhaldi hjá mörgum og sumir svífa vængjum þöndum inn í helgina. Það lítur út fyrir að það megi gefa helginni gott start með því að kíkja á kvöldopnum á Gránu milli kl. 20-22 í kvöld. Þar skapa turtildúfurnar Fúsi Ben og Vordísin notalega stemmingu með lifandi tónaflóði á meðan ljósamyndasýningin Aðalgatan í áranna rás streymir áfram endalaust.

Það er skammt stórra högga á milli hjá lægðum haustsins en spáð er miklum norðanhvelli snemma á sunnudagsmorgun svo allir landshlutar eru ýmist litaðir gulum eða appelsínugulum viðvörunum en allt frá Ströndum að Glettingi á Austurlandi, ásamt miðhálendi er appelsínugult ástand, annað gult. Á Ströndum og Norðurlandi vestra tekur viðvörunin gildi kl 8 á sunnudagsmorgun og linnir ekki fyrr en upp úr klukkan tvö aðfararnótt mánudags.

Í gær var lokið við að strengja vír í aparólu sem staðsett er syðst og neðst í Túnahverfinu á Króknum svo loks gefst krökkum kostur á að leika sér í tækinu sem staðið hefur þráðlaust í sumar.

Á morgun, laugardaginn 8. október, verður haldinn fyrirlestur í Húsi frítímans í boði Heilsueflandi samfélag – Skagafjörður, þar sem Sigurjón Ernir Sturluson, íþróttafræðingur og þjálfari, mun deila reynslu sinni af leit hans að leiðum til að hámarka sína eigin heilsu.

Hrefna Jóhannesdóttir, skógfræðingur á Silfrastöðum í Blönduhlíð í Skagafirði, hefur verið ráðin í stöðu sviðstjóra skógarþjónustu hjá Skógræktinni. Tekur hún við stöðunni 1. desember. Á heimasíðu Skógræktarinnar kemur fram að tíu umsóknir hafi borist í starfið, sem auglýst var í liðnum mánuði.

Fundur um nýja nálgun í vegagerð var haldinn á Hvammstanga sl. þriðjudagskvöld en þar kynnti Haraldur Benediktsson, alþingismaður, tillögu um flýtingu framkvæmda vegagerðar um Vatnsnes. Auk erindis Haraldar, fjallaði Gísli Gíslason, nýsköpunarsetrinu Breið á Akranesi og fv. stjórnarformaður Spalar, um samstarf um samgönguframkvæmdir.

Eins og Feykir sagði frá í síðasta blaði mun Leikfélag Sauðárkróks færa haustverkefnið sitt, Skilaboðaskjóðuna eftir Þorvald Þorsteinsson, upp á svið Menningarhússins Miðgarðs í Varmahlíð, en miklar framkvæmdir standa nú yfir í Bifröst sem vonir stóðu til að yrðu yfirstaðnar fyrir áætlaðan frumsýningardag.

Í skýrslu sem Húsnæðis- og mannvirkjastofnun (HMS) gaf út sl. mánudag um stöðu slökkviliða á Íslandi má ráða að hún sé frekar bágborin hjá flestum stöðvum á Norðurlandi vestra. Í landshlutanum eru rekin fjögur slökkvilið; Brunavarnir Skagafjarðar, Slökkvilið Skagastrandar, Brunavarnir Austur-Húnvetninga og Brunavarnir Húnaþings vestra.