Íþróttir

Eftir góðan sigur gegn liði sameinaðra Sunnlendinga (Hamar/Þór Þ) í 1. deild kvenna í körfubolta um síðustu helgi voru Stólastúlkur tæklaðar gróflega í parket í dag þegar fjallgrimmir en góðir gestir úr Njarðvík mættu í Síkið okkar. Heimastúlkur sáu ekki til sólar, frekar en aðrir Skagfirðingar síðustu dagana, og máttu þola stórt tap. Lokatölur 39-77.

Þegar ekið er frá Sauðárkróki til Egilsstaða tekur ferðin, sem er 385 kílómetra löng, ríflega fjóran og hálfan tíma ef við gerum ráð fyrir að meðalhraðinn sé 84 kmh. Ef meðalhraðinn er 96 kmh, sem er nota bene ekki löglegur hraði, tekur ferðalagið fjóra tíma. Þá gerum við ráð fyrir að það sé búið að fylla rútuna af bensíni áður en lagt er af stað.

Nú á dögunum fór fram val í íþróttamanni, liði og þjálfara ársins í Skagafirði en um er að ræða samstarfsverkefni UMSS og Sveitarfélagsins Skagafjarðar. Frjálsíþróttakappinn Ísak Óli Traustason var valinn Íþróttamaður ársins, kvennalið Tindastóls í knattspyrnu var valið lið ársins og þjálfarar þess, gamla tvíeykið, Guðni Þór Einarsson og Jón Stefán Jónsson, voru valdir þjálfarar ársins.

Gengið var frá samningum sl. sunnudag við nýtt þjálfarateymi kvennaliðs Tindastóls í knattspyrnu sem mun spila í efstu deild í fyrsta sinn í sumar. Teymið skipa þeir Guðni Þór Einarsson og Óskar Smári Haraldsson. Guðni, sem er Króksari, hefur þjálfað kvennalið Tindastóls síðustu þrjú ár í félagi við Jón Stefán Jónsson sem ekki gat haldið áfram þjálfun Stólastúlkna. Guðni fær nú gamlan Tindastólsfélaga til liðs við sig, Óskar Smára, sem líkt og fyrirliði Tindastólsliðsins er frá Brautarholti. Feykir lagði nokkrar spurningar fyrir þá félaga eftir undirskrift samninga í Húsi frítímans.

Síðastliðinn sunnudag skrifuðu tíu heimastúlkur undir samninga við knattspyrnudeild Tindastóls. Stúlkurnar skrifuðu undir í Húsi frítímans á Króknum á sama tíma og þjálfarateymið gekk frá sínum samningum. „Ég er gríðarlega sáttur við að búið sé að klára þessar undirskriftir við leikmenn og þjálfara og stefnum við á að klára samninga við restina af hópnum á allra næstu dögum,“ sagði Rúnar Rúnarsson, formaður knattspyrnudeildar Tindastóls, í samtali við Feyki.

Það var boðið upp á háspennu í Síkinu í gær þegar Njarðvíkingar heimsóttu Tindastólsmenn í 3. umferð Dominos-deildarinnar. Því miður þá héldu heimamenn áfram að vera ósannfærandi þrátt fyrir að hafa á að skipa flottum leikmönnum sem virðast enn ekki hafa áttað sig á að það þarf að spila varnarleik til að vinna leiki. Framlengt var í Síkinu og svo virtist sem Antanas Udras hefði tryggt Stólunum sigur þegar tæpar tvær sekúndur lifðu leiks. Njarðvíkingar eru hins vegar með Loga Gunnars í sínu liði og þá er leikurinn ekkert búinn fyrr en lokaflautið gellur. Hann setti þrist í andlitið á heimamönnum um leið og leiktíminn rann út. Lokatölur 107-108.

Lið Tindastóls spilaði fjórða leik sinn í 1. deild kvenna í körfubolta í gær þegar þær tóku á móti liði Hamars/Þórs Þ í fyrsta leik liðanna að lokinni langri kófpásu. Lið Tindastóls náði undirtökunum strax í byrjun þar sem mikill hraði og dugnaður einkenndi leik liðsins. Grunnurinn að sigri Stólastúlkna var lagður í fyrri hálfleik en lokatölurna voru 70–45.

Það er ekki nóg með að körfuboltinn hafi farið í gang í vikunni því Pepsi Max lið Tindastóls (stelpurnar) í fótbolta spilaði í gærkvöldi sinn fyrsta leik á árinu. Leikið var í Boganum á Akureyri gegn b-liði Þórs/KA en þetta var opnunarleikur Kjarnafæðismótsins. Stólastúlkur gerðu tvö mörk um miðjan fyrri hálfleik og þrátt fyrir mýmög tækifæri tókst ekki að bæta við fleiri mörkum.

Í nóvember sl. var tilkynnt hverjir fengu þann heiður að vera valdir í landsliðshóp fyrir komandi verkefni hjá Frjálsíþróttasambandi Íslands. Tveir Skagfirðingar eru í þeim hópi, Ísak Óli Traustason og Sveinbjörn Óli Svavarsson. Kapparnir tveir úr Skagafirðinum eru þrautreyndir á keppnisvellinum og hafa ósjaldan staðið á verðlaunapalli.

Skiðasvæði Tindastóls opnaði fyrir almenning á slaginu tvö miðvikudaginn 13. janúar eftir langa og stranga kófpásu. Óhætt er að fullyrða að marga hafa verið farið að klæja í skíðahanskana og beðið spenntir eftir skíðaleyfi. Núverandi reglugerð setur þó skíðafólki talsverðar takmarkanir en heimilt að opna skíðasvæðið með 25% afköstum eða aðeins 225 manns.