Vísnakeppni Safnahúss Skagfirðinga
Nú er vor í lofti og víða farinn að sjást aur á afvegum. Einu sinni boðaði það byrjun Sæluviku og svo verður um ókomin ár. Nú sem fyrr leitum við til ykkar vísnasmiðir um land allt og förum þess á leit að þið botnið nokkra fyrriparta. Ég efast ekki um árangurinn.
Það er Safnahús Skagfirðinga sem sér um og drífur áfram þennan dagskrárlið Sæluviku sem mun verða fimmtugur á næsta ári. Reglur eru sem fyrr afar skýrar og einfaldar, í fyrsta lagi að botna fyrirfram gefna fyrriparta og í öðru lagi að semja vísu um tiltekið efni. Ekki er nauðsynlegt að botna alla fyrripartana og í góðu lagi að senda inn einungis eina vísu. Nauðsynlegt er þó að þátttakendur haldi sig við ferskeytluformið. Fyrripartarnir eru að þessu sinni eins og við öll, hver með sínu innihaldi,eftir fulltrúa tveggja kynslóða. Verður spennandi að sjá frá ykkur afraksturinn.
Léttur vetur liðinn hjá,
ljúfir dagar bíða.
Fari ég um fjallasvið
fjarri dagsins önnum.
Virðing þingsins vísast eykur
væl um föt og tapparaus.
Lóusöngur, lækjarhjal
lífsins gátu tóna
Orðin bjóða upp í dans
ætlar þú að hlýða
Margt er að gerast í henni Verslu eins og karlinn sagði en víst væri gaman að fá vísur frá ykkur um stöðuna í heimsmálunum þar sem Trump leikur á lyklaborð og tollskrár.
Veitt verða tvenn peningaverðlaun, annars vegar fyrir besta botninn og hins vegar fyrir bestu vísuna. Ítrekað er, að ekki er nauðsynlegt að allir fyrripartar séu botnaðir og leyfilegt er að senda eingöngu eina vísu.
Vísur og botnar verða að hafa borist Safnahúsi Skagfirðinga Faxatorgi 55, Sauðárkróki í síðasta lagi á miðnætti 16. apríl n.k. Nauðsynlegt er að vísurnar séu merktar dulnefni, en rétt nafn og símanúmer fylgi með í lokuðu umslagi merktu dulnefninu. Einnig er hægt að senda vísur og botna á netfangið bokasafn@skagafjordur.is verður þá viðkomandi gefið dulnefni, ef það fylgir ekki með, áður en vísurnar fara til dómnefndar. Úrslit verða tilkynnt við setningu Sæluviku Skagfirðinga, Safnahúsinu á Sauðárkróki sunnudaginn 27. apríl kl. 13:00.
Fleiri fréttir
-
Ísmóti Neista á Svínavatni aflýst
feykir.is Austur-Húnavatnssýsla 19.03.2025 kl. 15.08Fyrirhuguðu ísmóti á Svínavatni hefur verið aflýst vegna aðstæðna í umhverfi mótssvæðisins en hlýindi undanfarinna daga hafa sett strik í reikninginn.Meira -
Kleinubakstur til að safna fyrir æfingaferð á USA CUP
feykir.is Skagafjörður 19.03.2025 kl. 14.43Sú hefð hefur skapast hjá 3. flokki, hjá Knattspyrnudeild Tindastóls, að ferðast erlendis í æfingaferð. Þetta árið er komið að 3. flokki karla og munu drengirnir ásamt fararstjórum ferðast til Minneapolis þann 13. júlí nk. Þar munu þeir taka þátt í USA CUP sem er risastórt knattspyrnumót með u.þ.b. 16.000 keppendum. Gist er á heimavistum háskóla á svæðinu og mun þeim gefast tækifæri til að skoða sig aðeins um á meðan á mótinu stendur. Af þessu tilefni hafa þeir verið í fjáröflun frá síðasta vori, þeir hafa selt krydd, aðstoðað við flutninga, selt blóm, sett upp fyrir jólahlaðborð Rótarý og nú er komið að kleinubakstri.Meira -
Skagfirski kammerkórinn fagnar 25 ára afmæli
feykir.is Skagafjörður, Lokað efni 19.03.2025 kl. 13.00Skagfirski kammerkórinn fagnar 25 ára afmæli sínu á þessu ári. Kórinn var stofnaður 6. janúar árið 2000 af fámennum hópi Skagfirðinga í stofunni á Syðstu-Grund. Þeirra á meðal var Sveinn Arnar Sæmundsson organisti og kórstjóri sem stjórnaði kórnum til ársins 2002.Meira -
Bláa boðinu frestað !
feykir.is Skagafjörður, Austur-Húnavatnssýsla, Vestur-Húnavatnssýsla 19.03.2025 kl. 12.10Vegna óviðráðanlegra orsaka verðum við að fresta bláa boðinu sem átti að vera miðvikudaginn 27. mars að Löngumýri.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.