Langþráður nýr björgunarbátur í Skagafjörðinn

Friðbjörn Ásbjörnsson, framkvæmdastjóri FISK Seafood og Hafdís Einarsdóttir formaður Skagfirðingasveitar.MYND AÐSEND

Sl. laugardag afhenti FISK Seafood Björgunarsveitinni Skagfirðingasveit nýjan björgunarbát að gjöf. Andvirði bátsins, sem hlotið hefur nafnið Aldan, er um 20 milljónir króna og boðar koma hans á Sauðárkrók byltingu í búnaði til sjóbjörgunar og sömuleiðis björgunarstörf á hinum mikilfenglegu en um leið viðsjárverðu vötnum héraðsins. Með tilkomu Öldunnar eru tveir öflugir harðbotna björgunarbátar beggja vegna í Skagafirðinum. Aldan er í vestri en að austanverðu er Skafti í eigu björgunarsveitarinnar Grettis.

 Segja má að Aldan hafi ekki komist alla leið í höfn fyrr en í annarri tilraun. Eins og sagt var frá í fjölmiðlum fyrir nokkrum misserum náði Skagfirðingasveit að öngla saman fyrir nýjum björgunarbáti með gríðarlega umfangsmiklu fjáröflunarstarfi. Með óvönduðum viðskiptaháttum í gegnum pöntunarferli bátsins var stórum hluta andvirðis hans stolið og eftir sat björgunarsveitin slypp og snauð. Traustur bakhjarl okkar, FISK Seafood á Sauðárkróki, sem styrkt hafði þessi endasleppu bátakaup af miklum rausnarskap, gekk þá fram fyrir skjöldu og lýsti því yfir að fyrirtækið myndi fjármagna nýjan björgunarbát að fullu. Þungu fargi var í einu vetfangi létt af stjórn sveitarinnar og fyrir það dýrmæta framlag viljum við þakka af miklum innileika.

Aldan var afhent okkur með formlegum hætti sl. laugardag að fjölmenni viðstöddu. Í ávarpi við það tækifæri gerði Friðbjörn Ásbjörnsson, framkvæmdastjóri FISK Seafood, mikilvægi björgunarsveitanna á Íslandi að umtalsefni og sagði m.a. „ ... að væntanlega státaði engin þjóð í heimi af stærri og öflugri björgunarsveitum sjálfboðaliða en einmitt Íslendingar. Það eru alls um 5.500 manns í 93 björgunarsveitum um land allt. Fjöldi þessara sjálfboðaliða sem svara neyðarkallinu á augabragði hvenær sem það berst er þannig talsvert meiri en sem nemur íbúafjöldanum í öllum Skagafirði. Útköllin þeirra eru u.þ.b. 1.500 á ári og þar af eru um tíu prósent, 150 útköll, vegna sjóbjörgunar. Og þá getur nærvera báta eins og Öldunnar skipt öllu máli.