Í [skagfirsku] poppi er þetta helst
Það má kannski halda því ögn fram að það hafi verið pínu skagfirsk slagsíða á Vinsældalista Rásar 2 síðustu vikur. Þannig sat um skeiða tengdadóttir Skagafjarðar, Salka Sól, makindalega á toppi listans með lagið Sólin og ég. Næst fyrir neðan var KUSK og bankaði á dyr Sölku Sólar en hin hálfskagfirska Kolbrún Óskarsdóttir gaf í byrjun sumars út notalegt bossanóva sumarlag sem hún syngur á sænsku og kallar einmitt Sommar.
Þá var Malen [Áskelsdóttir] komin ansi hátt á listann með lagið sitt hugljúfa, i don't know what i saw in you, en hæst fór það í sjötta sæti. Lagið hennar Right?, sem RAVEN söng með henni, náði í annað sætið á lista Rásar 2 fyrr á árinu. Malen tjáði Feyki að hún væri að klára nýtt lag sem kemur vonandi út fyrr en síðar og svo plata einhverntímann.
Ef við viljum aðeins teygja á þessum skagfirsku tengingum þá rekur Dr. Gunni ættir til Skagafjarðar en hann var á listanum ásamt Salóme Katrínu með lagið Í bríeríi, Svavar Knútur bjó nokkur ár í Skagafirði en hann er með lagið Refur á listanum og Billie Eilish er úr Blönduhl.... nei, djók.
Í vor gaf Sigvaldi Helgi Gunnarsson út EP-streymið Up North þar sem fjögur lög voru sungin á ensku og eitt á hinu ylhýra, lagið Hamingja sem rataði einmitt inn á Vinsældalista Rásar 2. Lögin frumsamin og tónlistina má sennilega segja vera kántrýskotið popp. Þá sagði Feykir frá því nýlega að Ingi Sigþór Gunnarsson hafi á dögunum gefið út lagið Fyrir þig.
Skoraði á sjálfa sig að semja á sænsku
Þar sem KUSK, Kolbrún Óskarsdóttir ( Óskarssonar læknis Jónssonar og Aðalheiðar Arnórs) hefur nú setið dágóðan tíma í öðru sæti listans var tilvalið að spyrja hana aðeins út í lagið. Hvers vegna ætli hún hafi ákveðið að syngja á sænsku?
„Ég bjó stóran hluta af æskuárunum mínum í Stokkhólmi í Svíþjóð og er því mjög kunnug þessum sænsku sumrum,“ segir Kolbrún. „Ég fór svo aftur til Svíþjóðar í frí með fjölskyldunni síðasta sumar og uppgötvaði þá að ég hafði svolítið gleymt því hvernig það væri að upplifa sænskt sumar. Ég skoraði því á sjálfa mig að skrifa lag á sænsku sem gæti fangað þessa sumartilfinningu. Úr varð svo þetta litla bossa nova lag.“
Eru Svíar ekkert að forvitnast um lagið; að lag á sænsku með íslenskum flytjanda sé við toppinn á vinsældalista Rásar 2? „Þegar lagið kom fyrst út hélt ég að fólk í Svíþjóð myndi hlusta á það meira en það gerði. Í fyrstu var þetta eiginlega allt vinafólk mitt og fjölskyldurnar frá Stokkhólmi sem lögðu við hlustir. En það kom mér svo verulega á óvart þegar ég kíkti inn á Apple Music að þar hafði lagið verið sett inn á “Midsommar” playlista og fengið fjöldann allann af spilunum. Einnig hef eg fengið mörg hrós frá fólki sem hefur heyrt í mér í útvarpinu undanfarið og verið hrifið af sænskunni jafnvel þótt það talar sænsku sjálft eða ekki, en það er náttúrulega Rás 2 mikið að þakka.
Ertu að túra eitthvað í sumar? „Ég er soldið að taka því rólega í tónleikunum í sumar og er aðallega að ferðast smá um Ísland að spila. Við Óviti spiluðum til dæmis á Vagninum á Flateyri í fyrsta skiptið um daginn í góðum félagskap. Svo hélt ég mína fyrstu útgáfutónleika í lok júní til að fagna útgáfunni á plötunni RAMMAR. Þangað mætti múgur manns og ég gæti ekki ímyndað mér betri fyrstu útgáfutónleika. Framundan liggur leiðin aðallega í það að fara að semja meiri tónlist með öðrum manneskjum, vinna með nýju fólki og semja lög fyrir aðra sem mig hefur lengi langað að gera,“ segir Kolbrún að lokum.
Fleiri fréttir
-
Hressandi að skella sér í sjósund
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 17.15Ingibjörg Davíðsdóttir er oddviti Miðflokksins frá bænum Arnbjargarlæk í Þverárhlíð í Borgarbyggð, fædd á Akranesi 1970 og á einnig ættir að rekja til Breiðafjarðareyja, Reykhóla og Múla á Barðaströnd. Ingibjörg á eina uppkomna dóttur og á heima í sveitinni og Garðabæ. Hún er sendiherra og stjórnarformaður Íslenska fæðuklasans. Hefur starfað í utanríkisþjónustunni í ríflega 25 ár, meðal annars sem sendiherra Íslands í Noregi, ráðgjafi forsætisráðherra í utanríkismálum ásamt því að starfa í sendiskrifstofum Íslands í Genf, Vínarborg og London. Ingibjörg tók sér leyfi frá utanríkisþjónustunni í fyrra og stofnaði Íslenska fæðuklasann.Meira -
Það sem maður veitir athygli vex og dafnar
feykir.is Skagafjörður, Listir og menning, Lokað efni 23.11.2024 kl. 12.09Það er margt í mörgu, sagði einhver einhverntímann, og hitti þar mögulega naglann rækilega á höfuðið. Greinarskrifari rak nýlega augun í viðburði í sveitinni sem komu honum svolítið spánskt fyrir sjónir; Kakóstund og 9D BreathWork. Það er Þóra Kristín Þórarinsdóttir frá Frostastöðum í Blönduhlíðinni sem stendur að baki þessum viðburðum. Það var ekkert vit í öðru en að kynna sér málið aðeins og senda Þóru nokkrar spurningar og rétt að byrja á því að spyrja hvað hún sé að gera þessa dagana.Meira -
Ætlaði að verða prestur
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 11.37Eldur Smári er oddviti Lýðræðisflokksins í Norðvesturkjördæmi og er fæddur á Sauðárkróki í nóvember 1979. Foreldrar hans eru Edda Lilja Hjalta-dóttir, frá Keflavík og Kristinn Jónas Björnsson frá Nýjabæ á Hofsósi. Hann er giftur Stuart Grahame Deville sem fæddur er í Lower Hutt á Nýja-Sjálandi. Þeir giftu sig í Ráðhúsinu í Kaupmannahöfn 2019. Þeir eru barnslausir en miklir dýravinir.Meira -
Afmælisveisla Hvatar er einmitt í dag!
feykir.is Austur-Húnavatnssýsla, Mannlíf, Lokað efni 23.11.2024 kl. 09.45Félagar í Ungmennafélaginu Hvöt á Blönduósi fagna í dag stórafmæli félagsins en í dag eru nákvæmlega 100 ár og tveir dagar frá stofnun þess árið 1924. Af þessu tilefni verður afmælishátíð í Íþróttamiðstöðinni á Blönduósi og hefst dagskráin kl. 13:00 og verður margt til gamans gert.Meira -
Eflum ferðaþjónustu í Norðvesturkjördæmi | Heiðdís Rós Eyjólfsdóttir skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 23.11.2024 kl. 09.45Ferðaþjónustan hefur verið ein af leiðandi ástæðum fyrir vaxtaþrótti íslensks samfélags undanfarin ár og eftirspurn eftir íslenskri ferðaþjónustu hefur vaxið af miklum krafti þótt jarðhræringarnar á Reykjanesskaga hafi leitt til ákveðinnar hnignunar. Þrátt fyrir allt hefur fjöldi erlendra ferðamanna á fyrstu níu mánuðum ársins verið lítillega yfir fjölda síðasta árs en fjöldi gistinátta hefur hins vegar dregist saman. Eins og kemur fram í þjóðhagsspá Hagstofunnar í nóvember er búist við því að fjöldi erlendra ferðamanna haldist stöðugur á næsta ári í 2,3 milljónum.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.