V-Húnavatnssýsla

Söngvakeppni nemendafélags Fjölbrautaskóla Norðurlands vestra fer fram á morgun, miðvikudaginn 6. desember. Á stokk stíga nemendur skólans og mun sigurvegarinn verða fulltrúi skólans í Söngkeppni framhaldsskólanna árið 2024. Keppnin verður haldin á sal skólans, húsið opnar kl. 19:30 og dagskráin byrjar kl. 20:00. Miðaverð er 1.000 kr.

Já sæll, 19 dagar til jóla og ég ekki enn byrjuð á jólagjöfunum.... þetta reddast er það ekki:) Allavega ætla ég ekki að stressa mig á þessu því það er alþjóðlegi heitapottadagurinn í dag og því um að gera að skella sér í pottinn hvort sem það er heima hjá sér eða í sundlauginni. En það er líka alþjóðlegi súkkulaðiköku dagurinn og það væri góð hugmynd að fá sér eina slæsu með rjóma þegar þú ert búin í pottinum:) Munum að njóta en ekki þjóta í desember:)

Á heimasíðu Landssambands Hestamannafélaga (Ihhestar.is) segir að Hekla Katharína Kristinsdóttir, landsliðsþjálfari U-21 landsliðsins í hestaíþróttum, sé búin að velja fyrsta úrtak í landsliðshóp sinn fyrir starfsárið 2024, alls 18 knapa. Voru þau Guðmar Hólm Ísólfsson frá Hestamannafélaginu Þyt og Þórgunnur Þórarinsdóttir frá Hestamannafélaginu Skagfirðingi valin í hópinn en framundan eru heilmikil verkefni því landsliðshópurinn starfar yfir allt árið. Hápunktur komandi árs er þátttaka á Norðurlandamótinu í Herning í Danmörku 8.- 11. ágúst næstkomandi og lokahópur Íslands á mótið verður kynntur í sumar.

Það var líf og fjör í Húnabyggð í gær þegar aðventugleðin var haldin í fallegu en köldu veðri fyrir framan félagsheimilið á Blönduósi. Sveitarstjórinn, Pétur Arason, las jólaminninguna þegar krummi stal jólunum. Edda Hlíf Hlífarsdóttir, sóknarprestur í Húnavatnsprestakalli, var með hugvekju.

Þann 16. nóvember sl. kom út bókin Hekla en sú bók er með uppskriftum að hekluðum leikföngum fyrir yngstu kynslóðina og má þar finna uppskriftir af svani, einhyrningi, blómálfi, jólakúlum og margt fleira. Þær henta bæði byrjendum og lengra komnum og er það Elsa Harðardóttir, 34 ára Seyðfirðingur sem býr í Hafnarfirði, sem á heiðurinn af þessari bók.

Í dag er 4. desember og aðeins 20 dagar til jóla... þetta þýtur áfram en í dag er alþjóðlegi sokkadagurinn og smákökudagurinn. Þá er um að gera að fara í litríka sokka og baka svona eins og eina sort af jólasmáköku til að jappla á yfir imbakassanum í kvöld með fætur upp í loft í litríku sokkunum sínum:) Eigið dásamlegan dag:)

RARIK verður í viðhaldsvinnu í aðveitustöðinni við Laxárvatn og þarf að taka spennir úr sambandi sem mun hafa þær afleyðingar að víðtækt rafmagnsleysi verður í Húnabyggð, Skagaströnd, Skagabyggð og í hluta af Húnaþingi vestra. Viðhaldsvinnan hefst að kvöldi þriðjudagsins 5. desember kl. 23:00 og ætti rafmagn að vera komið á kl. 04:00 aðfaranótt miðvikudagsins 6. desember.

Það verður Jólamarkaður hjá Skagabyggð í Skagabúð sunnudaginn 3. desember milli kl. 14 og 17. Þar mun Merete vera með kjötafurðirnar frá Hrauni á Skaga eins og t.d. kæfu, ærhakk, grafið ærfillé og tvíreykt hangikjöt og margt fleira. Kofareykta hangikjötið verður svo tilbúið til afhendingar þann 12. desember og hægt verður að smakka og panta það á sunnudaginn á markaðinum. Einnig er hægt að panta í gegnum skilaboð á Facebooksíðunni þeirra Hraun á Skaga Eiderdown. Öll hjartanlega velkomin

Á heimasíðu Árskóla segir að ákveðið hafi verið að endurvekja hina skemmtilegu hefð sem Kokkakeppni 10. bekkjar Árskóla er eftir nokkurra ára hlé. Þar sem hópurinn í heimilisfræði er tvískiptur verður ein keppni á haustönn og önnur á vorönn. Keppni haustannarinnar var haldin 16. nóvember sl. og voru fjögur lið sem kepptu að þessu sinni.