Sumarleg hádegismáltíð
Matgæðingar í tbl 30 voru hjónin Guðrún Lára Magnúsdóttir og Guðni Þór Ólafsson á Melstað í Miðfirði í Húnaþingi vestra. Guðrún Lára er leikskólastjóri á Hvammmstanga og Guðni Þór er sóknarprestur í Melstaðarprestakalli.
„Ég hef gaman af því að elda mat og bjóða gestum heim,“ segir Guðrún Lára. „Það kemur í minn hlut á heimilinu að elda en Guðni er liðtækur og leggur sitt af mörkum, þá sérstaklega þegar kemur að því að ganga frá eftir matinn. Nú stendur sumarfríið yfir hjá mér í leikskólanum og því tilvalið að bjóða upp á sumarlega hádegismáltíð og ekki verra ef hægt væri að borða úti í garði. Svo er það loka punkturinn, gulrótarkaka úr glænýjum gulrótum. Hér í nágrenni við okkur er verið að rækta grænmeti og ávexti sem hægt er að kaupa og eða vera í áskrift. Við erum þakklát fyrir að geta keypt ferskar vörur og þess vegna veljum við þessar uppskritir. Það er mikilvægt að skapa góða stemningu við matarborðið. Matmálstími er ein af bestu stundum dagsins þar kemur fjölskyldan saman og á samveru og samtal um það sem liggur á hjarta yfir góðum mat. Það er tilvalið að nýta matargerð og frágang sem fjölskyldusamveru þar sem allir hafa hlutverk og geta tekið þátt, óháð aldri. Njótið sumarsins og verði ykkur að góðu.“
RÉTTUR 1
Salat með jarðarberjum
300 g jarðarber
1 salathöfuð
4 msk. sítrónusafi
1 tsk. sykur (eða annað sætuefni)
Sósa:
2 dósir hrein jógúrt (360 g)
3 msk. sítrónusafi
2 tsk. sykur (eða annað sætuefni)
1 tsk. græn piparkorn, mulin
Aðferð:
Blandið saman 2 msk. af sítrónusafa og einni af sykri. Skolið af jarðarberjunum og skerið i tvennt og látið þau liggja í sítrónuleginum. Rífið niður salatið og hellið 2 tsk. af sítrónusafa yfir þau.
Sósa: Hrærið saman jógúrt, sítrónusafa, sykri og piparkornum. Fallegt er að raða heilum salatblöðum í hring inn í skálinni og setja rifið salatið í miðjuna. Leggið jarðarberin ofan á og hellið sósunni yfir rétt áður en borið er fram.
RÉTTUR 2
Fiskisúpa fyrir 5-6 manns
2 dósir Hunts orginal garlic
3 bollar vatn
½ bolli laukur
½ bolli gulrætur
½ bolli sellerí
½ bolli paprika
½ - 1 kjúklingateningur
1 msk. púðursykur
250 g rækjur, þorskur (vel þann fisk sem ég á í frystikistunni)
Aðferð:
Allt grænmetið er skorið niður. Soðið í 20- 30 mínútur og er fiskurinn settur út í undir lok suðutímans.
RÉTTUR 3
Haframjölsbrauð með súpunni
12 dl hveiti
2½ dl haframjöl, gróft
2 tsk. sykur
2 tsk. gróft salt
5 tsk. þurrger, eitt bréf
4 dl léttmjólk, volg
1 dl súrmjólk
1½ dl matarolía
Aðferð:
Blandið saman þurrefnum, hrærið saman volgri mjólkinni, súrmjólk og olíu og setjið út í þurrefnin.
Látið deigið hefast á hlýjum stað í eina klukkustund. Hnoðið vel og skiptið deiginu í tvennt og búið til tvær þykkar pylsur. Látið hefast í 30 mínútur. (Hægt er að pensla yfir brauðin með sundurslegnu eggi og strá haframjöli yfir). Bakið á neðstu rim við 200°C í 30 mínútur.
RÉTTUR 4
Gulrótarkaka
2 dl olía
200 g púðursykur
4 egg
175 g hveiti
1 tsk. lyftiduft
1 tsk. matarsóti
½ tsk. salt
2 tsk. kanill
400 g gulrætur
1 bolli rúsínur
250 g hnetur
Aðferð:
Allt sett í skál og hrært saman, sett í eitt form og bakað við 180°C í 30-60 mínútur. Einnig er hægt að setja deigið í tvö form, þá eru kökurnar þynnri.
Kakan er kæld og sett á krem:
100 g rjómaostur
50 g smjör
125 g flórsykur
1 tsk. vanilludropar
Gott er að bera fram rjóma með kökunni.
Guðrún Lára og Guðni skoruðu á Jennifer Tryggvadóttur á Hvammstanga sem er matgæðingurinn í tbl 33 sem kom út á miðvikudaginn.
Fleiri fréttir
-
Hressandi að skella sér í sjósund
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 17.15Ingibjörg Davíðsdóttir er oddviti Miðflokksins frá bænum Arnbjargarlæk í Þverárhlíð í Borgarbyggð, fædd á Akranesi 1970 og á einnig ættir að rekja til Breiðafjarðareyja, Reykhóla og Múla á Barðaströnd. Ingibjörg á eina uppkomna dóttur og á heima í sveitinni og Garðabæ. Hún er sendiherra og stjórnarformaður Íslenska fæðuklasans. Hefur starfað í utanríkisþjónustunni í ríflega 25 ár, meðal annars sem sendiherra Íslands í Noregi, ráðgjafi forsætisráðherra í utanríkismálum ásamt því að starfa í sendiskrifstofum Íslands í Genf, Vínarborg og London. Ingibjörg tók sér leyfi frá utanríkisþjónustunni í fyrra og stofnaði Íslenska fæðuklasann.Meira -
Það sem maður veitir athygli vex og dafnar
feykir.is Skagafjörður, Listir og menning, Lokað efni 23.11.2024 kl. 12.09Það er margt í mörgu, sagði einhver einhverntímann, og hitti þar mögulega naglann rækilega á höfuðið. Greinarskrifari rak nýlega augun í viðburði í sveitinni sem komu honum svolítið spánskt fyrir sjónir; Kakóstund og 9D BreathWork. Það er Þóra Kristín Þórarinsdóttir frá Frostastöðum í Blönduhlíðinni sem stendur að baki þessum viðburðum. Það var ekkert vit í öðru en að kynna sér málið aðeins og senda Þóru nokkrar spurningar og rétt að byrja á því að spyrja hvað hún sé að gera þessa dagana.Meira -
Ætlaði að verða prestur
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 11.37Eldur Smári er oddviti Lýðræðisflokksins í Norðvesturkjördæmi og er fæddur á Sauðárkróki í nóvember 1979. Foreldrar hans eru Edda Lilja Hjalta-dóttir, frá Keflavík og Kristinn Jónas Björnsson frá Nýjabæ á Hofsósi. Hann er giftur Stuart Grahame Deville sem fæddur er í Lower Hutt á Nýja-Sjálandi. Þeir giftu sig í Ráðhúsinu í Kaupmannahöfn 2019. Þeir eru barnslausir en miklir dýravinir.Meira -
Afmælisveisla Hvatar er einmitt í dag!
feykir.is Austur-Húnavatnssýsla, Mannlíf, Lokað efni 23.11.2024 kl. 09.45Félagar í Ungmennafélaginu Hvöt á Blönduósi fagna í dag stórafmæli félagsins en í dag eru nákvæmlega 100 ár og tveir dagar frá stofnun þess árið 1924. Af þessu tilefni verður afmælishátíð í Íþróttamiðstöðinni á Blönduósi og hefst dagskráin kl. 13:00 og verður margt til gamans gert.Meira -
Eflum ferðaþjónustu í Norðvesturkjördæmi | Heiðdís Rós Eyjólfsdóttir skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 23.11.2024 kl. 09.45Ferðaþjónustan hefur verið ein af leiðandi ástæðum fyrir vaxtaþrótti íslensks samfélags undanfarin ár og eftirspurn eftir íslenskri ferðaþjónustu hefur vaxið af miklum krafti þótt jarðhræringarnar á Reykjanesskaga hafi leitt til ákveðinnar hnignunar. Þrátt fyrir allt hefur fjöldi erlendra ferðamanna á fyrstu níu mánuðum ársins verið lítillega yfir fjölda síðasta árs en fjöldi gistinátta hefur hins vegar dregist saman. Eins og kemur fram í þjóðhagsspá Hagstofunnar í nóvember er búist við því að fjöldi erlendra ferðamanna haldist stöðugur á næsta ári í 2,3 milljónum.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.