Kjúklingaréttur og syndsamlega góð skyrterta
Það er hún Jóhanna Helga Sigtryggsdóttir sem ætlar að bjóða okkur upp á girnilegar kræsingar þessa vikuna. Jóhanna býr á Hvammstanga en er ættuð af Vatnsnesi og úr Víðidal. Hún vinnur á leikskólanum Ásgarði og einnig í félagsmiðstöðinni Órion. Uppáhaldsmatur Jóhönnu er jólamaturinn, svínakjöt, brúnaðar kartöflur og meðlæti en hún segist hafa mjög gaman af matseld og að prufa alls konar uppskriftir. „Mér finnst gaman að elda góðan mat og bjóða vinum og ætla að vera duglegri við það í ár í nýja húsinu mínu,“ segir Jóhanna. Þátturinn birtist í 24. tbl. Feykis í júní 2017.
AÐALRÉTTUR
Kjúklingaréttur með piparosti, hvítlauk og pestó
4-5 kjúklingabringur
4 hvítlauksrif, söxuð smátt
½ l matreiðslurjómi
1 piparostur (þessir hringlaga)
1 krukka rautt pestó
Aðferð:
Léttsteikið hvítlaukinn í um það bil ½ -1 msk af smjöri. Bætið þá matreiðslurjóma, piparosti og rauðu pestó, saman við. Bræðið ostinn.
Brúnið kjúklingabringurnar á annarri pönnu, á báðum hliðum og setjið síðan í eldfast mót. Hellið sósunni yfir bringurnar og látið inn í 175°C heitan ofn í um hálftíma eða þar til kjúklingabringurnar eru fulleldaðar.
Með þessu borða ég ferskt salat og franskar kartöflur eða sætar kartöflur bakaðar í ofni.
EFTIRRÉTTUR
Syndsamlega góð Daimskyrterta
Botn:
1 Lu Bastogne kex pakki
80–100 g íslenskt smjör
Aðferð:
Brjótið kexið niður í matvinnsluvél og setið hana á fullt þar til kexið er orðið vel mulið. Næst klípið þið smjörið út í, gott að hafa það í u.þ.b. 10-15 mín. á eldhúsborðinu áður en það er sett út í svo það mýkist aðeins. Ég þrýsti síðan botninum í formið og setti vel upp með hliðunum til þess að búa til skál og fylli síðan upp í með ostafyllingunni. Skellið botninum inn í kæli á meðan þið útbúið fyllinguna svo hann nái að harðna.
Fylling:
250 ml rjómi
400 g vanilluskyr
1 tsk vanillusykur
80 g hvítar súkkulaðiperlur frá Nóa Síríus, bræddar
40 g karamellupipp, brætt
2 stór Daim, smátt söxuð
Aðferð: Byrjið á því að þeyta rjómann og bætið síðan vanilluskyrinu saman við. Á meðan rjóminn er að þeytast er hvíta súkkulaðið brætt í potti við vægan hita og látið kólna aðeins áður en því er bætt út í fyllinguna. Bræðið karamellupipp við vægan hita og bætið smá rjómagusu út í, bætið út í fyllinguna. Síðast fara vanillusykurinn og Daimið út í, blandið því vel saman við. Hellið fyllingunni ofan í botninn og kælið í ísskápnum í smá tíma áður en skreytt er.
Skreyting:
60 g karamellupipp + smá rjómi
2 tsk sýróp
smá niðurskorið Daim.
Fleiri fréttir
-
Hressandi að skella sér í sjósund
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 17.15Ingibjörg Davíðsdóttir er oddviti Miðflokksins frá bænum Arnbjargarlæk í Þverárhlíð í Borgarbyggð, fædd á Akranesi 1970 og á einnig ættir að rekja til Breiðafjarðareyja, Reykhóla og Múla á Barðaströnd. Ingibjörg á eina uppkomna dóttur og á heima í sveitinni og Garðabæ. Hún er sendiherra og stjórnarformaður Íslenska fæðuklasans. Hefur starfað í utanríkisþjónustunni í ríflega 25 ár, meðal annars sem sendiherra Íslands í Noregi, ráðgjafi forsætisráðherra í utanríkismálum ásamt því að starfa í sendiskrifstofum Íslands í Genf, Vínarborg og London. Ingibjörg tók sér leyfi frá utanríkisþjónustunni í fyrra og stofnaði Íslenska fæðuklasann.Meira -
Það sem maður veitir athygli vex og dafnar
feykir.is Skagafjörður, Listir og menning, Lokað efni 23.11.2024 kl. 12.09Það er margt í mörgu, sagði einhver einhverntímann, og hitti þar mögulega naglann rækilega á höfuðið. Greinarskrifari rak nýlega augun í viðburði í sveitinni sem komu honum svolítið spánskt fyrir sjónir; Kakóstund og 9D BreathWork. Það er Þóra Kristín Þórarinsdóttir frá Frostastöðum í Blönduhlíðinni sem stendur að baki þessum viðburðum. Það var ekkert vit í öðru en að kynna sér málið aðeins og senda Þóru nokkrar spurningar og rétt að byrja á því að spyrja hvað hún sé að gera þessa dagana.Meira -
Ætlaði að verða prestur
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 11.37Eldur Smári er oddviti Lýðræðisflokksins í Norðvesturkjördæmi og er fæddur á Sauðárkróki í nóvember 1979. Foreldrar hans eru Edda Lilja Hjalta-dóttir, frá Keflavík og Kristinn Jónas Björnsson frá Nýjabæ á Hofsósi. Hann er giftur Stuart Grahame Deville sem fæddur er í Lower Hutt á Nýja-Sjálandi. Þeir giftu sig í Ráðhúsinu í Kaupmannahöfn 2019. Þeir eru barnslausir en miklir dýravinir.Meira -
Afmælisveisla Hvatar er einmitt í dag!
feykir.is Austur-Húnavatnssýsla, Mannlíf, Lokað efni 23.11.2024 kl. 09.45Félagar í Ungmennafélaginu Hvöt á Blönduósi fagna í dag stórafmæli félagsins en í dag eru nákvæmlega 100 ár og tveir dagar frá stofnun þess árið 1924. Af þessu tilefni verður afmælishátíð í Íþróttamiðstöðinni á Blönduósi og hefst dagskráin kl. 13:00 og verður margt til gamans gert.Meira -
Eflum ferðaþjónustu í Norðvesturkjördæmi | Heiðdís Rós Eyjólfsdóttir skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 23.11.2024 kl. 09.45Ferðaþjónustan hefur verið ein af leiðandi ástæðum fyrir vaxtaþrótti íslensks samfélags undanfarin ár og eftirspurn eftir íslenskri ferðaþjónustu hefur vaxið af miklum krafti þótt jarðhræringarnar á Reykjanesskaga hafi leitt til ákveðinnar hnignunar. Þrátt fyrir allt hefur fjöldi erlendra ferðamanna á fyrstu níu mánuðum ársins verið lítillega yfir fjölda síðasta árs en fjöldi gistinátta hefur hins vegar dregist saman. Eins og kemur fram í þjóðhagsspá Hagstofunnar í nóvember er búist við því að fjöldi erlendra ferðamanna haldist stöðugur á næsta ári í 2,3 milljónum.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.