Hvíti riddarinn mátaði Stólana í Mosfellsbænum
Ævintýri Tindastólspilta í úrslitakeppni 4. deildar varð bæði stutt og dapurlegt en liðið féll út við fyrstu hindrun. Það var kannski óheppni að dragast á móti liði Hvíta riddarans úr Mosfellsbæ sem er öflugur andstæðingur en þegar komið er í úrslitakeppnina er ekkert gefið. Sá Hvíti vann fyrri leik liðanna sem fram fór á Króknum, 1–2, eftir jafnan leik en í kvöld voru þeir einfaldlega betri og unnu leikinn 4-1 og einvígið þar með 6-2 og sendu Stólana í frí sem er síður en svo kærkomið.
Það var ljóst eftir fyrri leikinn að Stólarnir máttu ekki gera mörk mistök í kvöld því andstæðingurinn var með gæði fram á við og varnarleikurinn mjög skipulagður. Varnarleikur Tindastóls hefur hins vegar ekki verið nógu sterkur í sumar og liðið fengið á sig of mörg keimlík mörk þar sem andstæðingurinn hefur sloppið í gegnum vörnina og komist á auðan sjó. Sú saga hélt áfram í kvöld því Eiður Andri Thorarensen slapp í gegnum vörnina á 21. mínútu og gerði fyrsta mark leiksins. Bæði lið fengu færi til að skora áður en Patrekur Orri Guðjónsson bætti við öðru marki Hvíta riddarans á 31. mínútu. Anton gerði vel í marki Tindastóls og kom í veg fyrir að heimamenn bættu við marki fyrir hlé. Staðan því 2-0 í hálfleik og ljóst að Stólarnir þurftu að skora þrjú mörk til að komast áfram.
Donni gerði breytingu í hálfleik, tók Falcon út af og skellti Ingva Hrannari upp á topp og skipti í þriggja manna vörn vitandi það að liðið þurfti að setja kraft í sóknina. Draumurinn varð hins vegar að martröð á 57. mínútu þegar Patrekur bætti við öðru marki sínu í leiknum en að þessu sinni úr víti. Kolfinnur Ernir Kjartansson gerði síðan fjórða mark heimamanna á 85. mínútu áður en Benedikt Gröndal lagaði stöðuna fyrir Stólana með laglegu marki á 90. mínútu.
Ekki einfalt mál að klóra sig upp úr 4. deildinni
Það var svo sem vitað fyrir fram að það er bölvað basl að komast í gegnum úrslitakeppni 4. deildar en það var að sjálfsögðu stefnan hjá Stólunum. Auk þess sem varnarleikurinn var ekki nógu traustur þá var það skarð fyrir skildi þegar Spánverjinn Basi yfirgaf Stólana í sumar því ekki náðist að krækja í nógu góða leikmenn í hans stað í framlínu liðsins.
„Þetta var slakur leikur af okkar hálfu því miður,“ sagði svekktur Donni þjálfari þegar Feykir spurði hann hvað honum hefði fundist um leikinn. „Strákarnir reyndu allt hvað þeir gátu en það gekk því miður bara ekkert upp hjá okkur. Hvíti riddarinn var einfaldlega betri varnarlega og sóknarlega i þessu einvígi. En þetta er ákveðinn lærdómur fyrir okkur alla og við munum halda áfram og leggja enn harðar að okkur til að komast upp um deild að ári,“ sagði Donni.
Það er því annað ár í 4. deild framundan en nú með breyttu fyrirkomulagi því 5. deildinni verður bætt við næsta sumar og Tindastóll því ekki lengur í neðstu deild – sem er auðvitað frábært!
Fleiri fréttir
-
Enskunemar sóttu Harry Potter heim
feykir.is Skagafjörður, Austur-Húnavatnssýsla, Vestur-Húnavatnssýsla, Listir og menning, Lokað efni 24.11.2024 kl. 11.12Í vetur lagði hópur nemenda frá Fjölbrautaskóla Norðurlands vestra af stað í heillandi ævintýraferð inn í heim enskra bókmennta og breskrar menningar, allt í gegnum linsu hinna ástsælu Harry Potter sagna.Meira -
Nörd sem elskar að spila tölvuleiki
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 24.11.2024 kl. 10.19Ugla Stefanía Kristjönudóttir Jónsdóttir er oddviti Pírata í Norðvestur kjördæmi. Ugla er frá Stóra-Búrfelli í Svínadal í Austur-Húnavatnssýslu. Þar sem hún er fædd og uppalin ásamt bræðrum sínum. Hún flutti á Akureyri til að fara í menntaskóla og síðar suður í háskóla. Bjó í Bretlandi um tíma en er núna búsett fyrir sunnan – með annan fótinn heima í sveit. Eins og er þá er hún sjálfstætt starfandi og starfar við fræðslu og ráðgjöf í tengslum við jafnréttismál og sinnir líka fræðslu t.d. hjá Samtökunum ‘78.Meira -
Hressandi að skella sér í sjósund
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 17.15Ingibjörg Davíðsdóttir er oddviti Miðflokksins frá bænum Arnbjargarlæk í Þverárhlíð í Borgarbyggð, fædd á Akranesi 1970 og á einnig ættir að rekja til Breiðafjarðareyja, Reykhóla og Múla á Barðaströnd. Ingibjörg á eina uppkomna dóttur og á heima í sveitinni og Garðabæ. Hún er sendiherra og stjórnarformaður Íslenska fæðuklasans. Hefur starfað í utanríkisþjónustunni í ríflega 25 ár, meðal annars sem sendiherra Íslands í Noregi, ráðgjafi forsætisráðherra í utanríkismálum ásamt því að starfa í sendiskrifstofum Íslands í Genf, Vínarborg og London. Ingibjörg tók sér leyfi frá utanríkisþjónustunni í fyrra og stofnaði Íslenska fæðuklasann.Meira -
Það sem maður veitir athygli vex og dafnar
feykir.is Skagafjörður, Listir og menning, Lokað efni 23.11.2024 kl. 12.09Það er margt í mörgu, sagði einhver einhverntímann, og hitti þar mögulega naglann rækilega á höfuðið. Greinarskrifari rak nýlega augun í viðburði í sveitinni sem komu honum svolítið spánskt fyrir sjónir; Kakóstund og 9D BreathWork. Það er Þóra Kristín Þórarinsdóttir frá Frostastöðum í Blönduhlíðinni sem stendur að baki þessum viðburðum. Það var ekkert vit í öðru en að kynna sér málið aðeins og senda Þóru nokkrar spurningar og rétt að byrja á því að spyrja hvað hún sé að gera þessa dagana.Meira -
Ætlaði að verða prestur
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 11.37Eldur Smári er oddviti Lýðræðisflokksins í Norðvesturkjördæmi og er fæddur á Sauðárkróki í nóvember 1979. Foreldrar hans eru Edda Lilja Hjalta-dóttir, frá Keflavík og Kristinn Jónas Björnsson frá Nýjabæ á Hofsósi. Hann er giftur Stuart Grahame Deville sem fæddur er í Lower Hutt á Nýja-Sjálandi. Þeir giftu sig í Ráðhúsinu í Kaupmannahöfn 2019. Þeir eru barnslausir en miklir dýravinir.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.