Gunnar Ásgrímsson nýr formaður SUF

Gunnar Ásgrímsson nýr formaður SUF.MYND AÐSEND

Samband ungra Framsóknarmanna hélt 48. sambandsþing sitt á Sauðárkróki helgina 2.- 3. september síðastliðinn. Þar sat ungt Framsóknarfólk og vann öflugt málefnastarf ásamt því að kjósa sér nýja stjórn og nýjan formann, Gunnar Ásgrímsson sem var sitjandi varaformaður, var kosinn nýr formaður. Fráfarandi formaður Unnur Þöll Benediktsdóttir gaf ekki kost á sér áfram eftir tveggja ára formennsku.

Gunnar Ásgrímsson nýji formaðurinn, er 23 ára Skagfirðingur sem stundar nám í kennslufræðum við Háskóla íslands og starfar sem stuðningsfulltrúi í Háteigsskóla. Hann hefur verið virkur í félagsstarfi flokksins og innan sambandsins síðan 2018, og síðustu þrjú árin setið í framkvæmdastjórn SUF, fyrst sem ritari en síðustu tvö ár sem varaformaður undir formennsku fráfarandi formanns, Unnar Þallar.

“Ég hlakka mikið til komandi starfsárs, við erum með flotta stjórn sem ég hef mikla trú á, en það eru stór verkefni framundan í vetur. Það verður flokksþing hjá Framsókn í vor þar sem við í SUF munum svo sannarlega láta í okkur heyra, eins og á öðrum viðburðum flokksins síðustu ár. Helstu verkefnin munu því tengjast málefnastarfinu okkar en einnig má búast við fjölbreyttu viðburðastarfi hjá okkur. Það hefur heppnast vel að halda svokölluð Skuggaráðuneyti, þar sem ungt Framsóknarfólk fær að spjalla við ráðherrana okkar, en einnig þeir örfundir sem við höfum átt með þingmönnum og sveitarstjórnarfólki um hin ýmsu mál. Má því búast við miklu þetta ár og hvet ég því áhugasöm um að mæta á viðburði hjá okkur í vetur.” Segir Gunnar Ásgrímsson nýr formaður SUF.

Í nýja stjórn voru kjörin þau, Ágúst Guðjónsson, Berglind Sunna Bragadóttir, Díana Íva Gunnarsdóttir, Hafdís Lára Halldórsdóttir, Heiðdís Geirsdóttir, Hrafn Splidt Þorvaldsson, Inga Berta Bergsdóttir, Karel Bergmann Gunnarsson, Mikael Jens Halldórsson, Ólöf Rún Pétursdóttir, Skúli Bragi Geirdal og Urður Björg Gísladóttir

Í fréttatilkynningu frá SUF segir að mörg deilu- og hitamál voru rædd á þinginu, þar á meðal útlendingamál, samgöngusáttmáli, heilbrigðismál, menntamál og hvalveiðar. Hér fyrir neðan eru nokkrar af þeim ályktunum sem samþykktar voru á sambandsþinginu, en hægt verður að sjá allar ályktanir á samfélagsmiðlum og vefsíðu SUF (suf.is) á næstu dögum og vikum.

Innviði, umhverfi, orka og loftslag

• Ungt Framsóknarfólk vill að veiðar á hvölum verði lagðar af.
• Ungt Framsóknarfólk styður samgöngusáttmála Höfuðborgarsvæðisins enda felur sáttmálinn í sér bættar samgöngur fyrir alla ferðamáta sem minnka eiga tafir, stórefla almenningssamgöngur og draga úr mengun.
• Ungt Framsóknarfólk styður markmið stjórnvalda um kolefnishlutleysi og full orkuskipti eigi síðar en árið 2040 og verði þá óháð jarðefnaeldsneyti. Til að það markmið nái fram að ganga verður að auka framboð raforku í landinu og hvetur ungt Framsóknarfólk því ríkisstjórnina til þess að skoða frekari virkjunarkosti með sjálfbærni í huga.
• Ungt Framsóknarfólk vill að settar verði hömlur á hækkun leiguverðs húsnæðis í langtíma útleigu yfir fyrirfram ákveðið tímabil og samhliða verði þróun húsaleigubóta látin fylgja verðlagsþróun.

Heilbrigði og málefni eldra fólks

• Ungt Framsóknarfólk vill heimila blóðgjöf einstaklinga óháð kynhneigð og kynlífshegðun blóðgjafanna. Núverandi reglugerð er úrelt og útilokar stóran hóp hugsanlegra blóðgjafa ásamt því að hún er lituð af fordómum gagnvart hinsegin fólki
• Ungt Framsóknarfólk vill ókeypis getnaðarvarnir fyrir fólk yngra en 25 ára á Íslandi.

Efnahagur, utanríkismál, stjórnskipan, menning, mannréttindi og málefni innflytjenda

• Ungt Framsóknarfólk vill að þau fornu íslensku handrit sem eru enn í vörslu í Danmörku verði flutt heim. Meðal þeirra sjöhundruð handrita sem eru enn eftir í Danmörku eru Heimskringla Snorra Sturlusonar, Snorra-Eddu handrit og Reykjabók Njálu sem er elsta heillega handrit Njálu. Það er táknrænt fyrir hina íslensku þjóð að þessum menningararfi verði skilað.
• Ungt Framsóknarfólk hvetur stjórnvöld til þess að stytta og einfalda umsóknarferli fyrir dvalar- og atvinnuleyfi hérlendis.
• Ungt Framsóknarfólk telur brýnt að skýrt sé kveðið á um hvað taki við eftir að einstaklingi er synjað um alþjóðlega vernd og grunnþjónusta fellur niður.

Atvinna, menntun og börn

• Ungt Framsóknarfólk telur að viðurkenna þurfi leikskóla sem fyrsta skólastigið af löggjafanum.
• Ungt Framsóknarfólk telur að endurskoða þurfi stöðu dönskukennslu sem skyldufag í grunn- og framhaldsskólum.