Gervigrasvöllur að fæðast á Króknum
Nú er unnið hörðum höndum við að klára gerð gervigrasvallar á íþróttasvæðinu á Sauðárkróki og eru þau ófá handtökin, hjá úrvalsliði iðnaðarmanna, sem unnin hafa verið þar í vetur, vor og nú í byrjun sumars. Margir hafa haft gaman af að fylgjast með framgangi mála en unnið hefur verið við völlinn og umhverfi hans hvenær sem færi hefur gefist á þessum tíma. Nú í vikunni var lokið við að leggja gúmmilag á völlinn og styttist því í að gervigrasið græna og væna líti dagsins ljós.
Framkvæmdir við völlinn hófust 17. október síðastliðinn eða um viku áður en vetur gekk formlega í garð. Daginn áður höfðu reyndar ungir knattspyrnuiðkendur tekið fyrstu skóflustungurnar en þann 17. voru stóreflis vinnuvélar mættar til leiks og grasinu af miðvelli íþróttasvæðisins var rutt af og vinnusvæðið afmarkað.
Fyrir lok októbermánaðar var búið að steypa undirstöður fyrir flóðlýsingu og áfram var unnið í undirlagi vallarins og slegið upp fyrir vegg við austurenda vallarins og þeim byggingum sem þurfti að reysa utan um hitakerfi vallarins. Í lok nóvember var frostið 18 gráður en hvergi var slegið af og þann 19. desember var verið að steypa. Það frysti og hlýnaði til skiptis og völlurinn stundum frosinn og stundum á floti.
Ómar Bragi Stefánsson, fyrrum formaður knattspyrnudeildar Tindastóls, hefur verið duglegur að mynda og segja frá framkvæmdum á FB-síðu stuðningsmanna knattspyrnudeildar Tindastóls og myndirnar sem hér fylgja eru allar frá honum fengnar. Eftir talsverða vetrartíð fyrstu mánuði ársins fóru framkvæmdir við völlinn aftur á fullt í byrjun mars. Þann 26. apríl skrifar Ómar: „Það má segja að allt sé á fleygiferð á íþróttasvæðinu okkar ... Verið er að jafna völlinn undir hitalagnir. Reikna má með að í næstu viku verði hafist handa að leggja hitalagnirnar sem eru alls 36 km að lengd. Sú vinna tekur væntanlega um tvær vikur. Þá þarf að setja sand yfir það og síðan kemur grasið. Það styttist í að þetta verði klárt.“
Veðrið hefur ekki beinlínis leikið við iðnaðarmennina síðan en svæðið er þó allt að verða hið glæsilegasta. Malbikað hefur verið við vallarhús og umhverfi þess tekið í gegn, flóðljósin eru komin upp, búið er að þökuleggja þau sár sem mynduðust í kringum völlinn og helluleggja og komin er myndarleg háreyst girðing við austurenda vallarins til að tryggja að andstæðingar Tindastóls skjóti ekki á bílana á Skagfirðingabrautinni. Þá er verið að undirbúa malbikun á bílastæðum sunnan vallarsvæðisins, eða svokölluð kennarastæði við Árskóla.
En nú styttist í að allt verði klárt og einhverjir bíða sennilega spenntir eftir að sjá gervigrasmotturnar dúkka upp og mynda fagurgræna vin sem verður í blóma allt árið um kring og ætti að bylta aðstöðu til knattspyrnuiðkunar og -æfinga í Skagafirði. Bjartsýnustu menn vona að völlurinn verði klár 17. júní en stefnt er á að nota hann á Landsbankamótinu sem verður síðustu helgina í júní.
Myndirnar hér að neðan, sem teknar voru af Ómari Braga, eru í nokkurn veginn réttri tímaröð.
Fleiri fréttir
-
Miðflokkurinn opnar kosningaskrifstofu á Sauðárkróki
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 22.11.2024 kl. 15.49Miðflokkurinn opnar kosningaskrifstofu á Mælifelli ,Aðalgötu 7 Sauðarkroki, laugardaginn 23. nóvember kl. 20.00. Allir eru velkomnir.Meira -
Flutti frá Eyjum gosnóttina
feykir.is Skagafjörður, Austur-Húnavatnssýsla, Vestur-Húnavatnssýsla 22.11.2024 kl. 10.02Eyjólfur Ármannsson er oddviti Fólks flokksins í Norðvesturkjördæmi. Eyjólfur er fæddur í Vestmannaeyjum, sonur hjónanna Guðjóns Ármanns Eyjólfssonar frá Vestmannaeyjum og fv. skólastjóra Stýrimannaskólans í Reykjavík og Aniku Jónu Ragnarsdóttur, húsmóður og sjúkraliða. Hann er þriðji í röð fjögurra systkina. Gosnóttina flutti fjölskyldan frá Eyjum til Reykjavíkur þegar hann var þriggja og hálfs og ólst hann þar upp.Meira -
Mynd Óskars Páls, Árnar þagna, sýnd í Króksbíó
feykir.is Skagafjörður, Listir og menning, Lokað efni 22.11.2024 kl. 09.00Óskar Páll Sveinsson ætlar að koma á heimaslóðir og bjóða Skagfirðingum í bíó. Næstkomandi mánudag kl. 20. sýnir hann í Sauðárkróksbíói heimildamyndina Árnar þagna sem fjallar um áhrif sjókvíaeldis á laxi á lífríki og afkomu fjölskyldna í sveitum Íslands og Noregs sem hafa byggt lífsafkomu sína á hlunnindum af sjálfbærum stangveiðum í margar kynslóðir.Meira -
Þjóðarsátt um landbúnað til framtíðar | Guðmundur Hrafn Arngrímsson skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 22.11.2024 kl. 08.30Landbúnaður og matvælaframleiðsla er elsta athafnasemi íbúa landsins og önnur af mikilvægustu atvinnugreinum þjóðarinnar, ásamt sjávarútvegi. Landbúnaður er í senn undirstaða byggðar í landinu, gríðarlega mikilvægur fyrir fæðuöryggi þjóðarinnar og lífstíll þeirra sem hann stunda. Þess vegna er mikilvægt að um landbúnað og matvælaframleiðslu ríki þjóðarsátt.Meira -
Á sterka minningu um boltaleik með langafa sínum
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 21.11.2024 kl. 16.33Ólafur Adolfsson er oddviti Sjálfstæðisflokksins í Norðvestur kjördæmi. Ólafur er í sambandi með Margréti Birgisdóttur lyfjafræðingi og á hann tvö uppkomin börn, tvö barnabörn og tvö stjúpbörn. Ólafur er alinn upp í Ólafsvík og hefur auk þess átt heima um skemmri eða lengri tíma á Akranesi, í Reykjavík og á Sauðárkróki og er í dag með lögheimili á Akranesi. Hann er lyfjafræðingur og lyfsali, á og rekur fjórar lyfjabúðir sem eru staðsettar á Akranesi, í Borgarnesi, í Ólafsvík og í Vesturbæ Reykjavíkur.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.