Úrbeinað lambalæri, grafinn ærvöðvi og eplakaka
Það eru bændurnir á Brúnastöðum í Fljótum, Hjördís Leifsdóttir og Jóhannes Ríkarðsson sem eiga uppskriftir Feykis þessa vikuna. Sem sannir sauðfjárbændur bjóða þau upp á afurð úr þeim geiranum að undanskildum eplunum.
Forréttur:
Grafinn ærvöðvi
Veljið vöðva úr hrygg eða innanlæri. Vöðvinn má ekki vera of þykkur, 3 – 4 cm er fínt. Blandið síðan saman timian, basilikum, oregano, rosmarin, sinnepsfræi, dillfræ, grófu salti, rósapipar og svörtum pipar, einni matskeið af hvoru, í mortéli og myljið vel. Vöðvanum velt upp úr kryddblöndunni, pakkað vel inn í plast og geymdur í ískáp í ca. tvo sólarhringa. Sett í frysti og sneitt í mjög þunnar sneiðar hálffrosið.
Sósa:
1 dl balsamedik, 1dl hlynsíróp og 2,5 dl púrtvín soðið niður um ca. helming við vægan hita. Smakkað til með timian, blóðberg og örlitlu salti. Kælt. Valhnetur, heslihnetur og furuhnetur saxaðar smátt og ristaðar og settar út í sósuna rétt fyrir notkun. Kjötsneiðarnar settar ofan á snittubrauð ásamt sósunni, salati að smekk og sykurmelónu.
Aðalréttur:
Úrbeinað lambalæri að hætti Hjördísar
Lambalæri úrbeinað og skipt í nokkra parta, sem mest eftir vöðvunum. Kryddað með Eðalkryddi, Ítalskri hvítlauksblöndu og Lamb Islandia frá Pottagöldrum. Geymt í kæli yfir nótt. Mikilvægt er að kjötið hafi náð sem næst stofuhita þegar það er annaðhvort steikt á pönnu eða sett á grillið. Ef kjötið er steikt á pönnu er það sett í heitan ofn í smá stund, en það þarf að passa vel að kjötið sé ekki ofeldað. Borið fram með bökuðum kartöflum, ofnsteiktu grænmeti og villisveppa-gráðostasósu.
Ofnsteikt grænmeti:
Sætar kartöflur, brokkoli, blómkál, kúrbítur og rauðlaukur skorið í bita. Velt upp úr olíu og kryddað með Ítalskri hvítlauksblöndu frá Pottagöldrum. Sett í eldfast mót og bakað í ofni við hægan hita þar til það er gegnsteikt.
Sósa:
1 pakki villisveppir, ½ l rjómi, 1 stk gráðostur, ½ piparostur. Meðhöndlið sveppina samkvæmt leiðbeiningum á pakka. Steikið á pönnu, bætið rjómanum við ásamt ostunum. Hitið þar til hæfilega þykkt.
Eftirréttur:
Eplakaka
- 100 gr brætt smjör
- 3 dl haframjöl
- 1,5 dl sykur
- 2 eggjarauður
- 1,5 msk hveiti
- 1 tsk lyftiduft
Öllu blandað saman og sett í botninn á eldföstu móti. Bakað í 20 mín við 175°C. Epli afhýdd og skorin í báta. Soðin mjúk og vatninu hellt af. Raðað ofan á botninn. 2 eggjahvítur stífþeyttar ásamt 100 gr af sykri og settar ofan á eplin. Bakað við 150°C þar til eggjahvíturnar hafa náð gullbrúnum lit. Borið fram heitt ásamt þeyttum rjóma eða vanilluís.
Verði ykkur að góðu!
Áður birt í 14. tbl. Feykis 2010
Fleiri fréttir
-
Hressandi að skella sér í sjósund
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 17.15Ingibjörg Davíðsdóttir er oddviti Miðflokksins frá bænum Arnbjargarlæk í Þverárhlíð í Borgarbyggð, fædd á Akranesi 1970 og á einnig ættir að rekja til Breiðafjarðareyja, Reykhóla og Múla á Barðaströnd. Ingibjörg á eina uppkomna dóttur og á heima í sveitinni og Garðabæ. Hún er sendiherra og stjórnarformaður Íslenska fæðuklasans. Hefur starfað í utanríkisþjónustunni í ríflega 25 ár, meðal annars sem sendiherra Íslands í Noregi, ráðgjafi forsætisráðherra í utanríkismálum ásamt því að starfa í sendiskrifstofum Íslands í Genf, Vínarborg og London. Ingibjörg tók sér leyfi frá utanríkisþjónustunni í fyrra og stofnaði Íslenska fæðuklasann.Meira -
Það sem maður veitir athygli vex og dafnar
feykir.is Skagafjörður, Listir og menning, Lokað efni 23.11.2024 kl. 12.09Það er margt í mörgu, sagði einhver einhverntímann, og hitti þar mögulega naglann rækilega á höfuðið. Greinarskrifari rak nýlega augun í viðburði í sveitinni sem komu honum svolítið spánskt fyrir sjónir; Kakóstund og 9D BreathWork. Það er Þóra Kristín Þórarinsdóttir frá Frostastöðum í Blönduhlíðinni sem stendur að baki þessum viðburðum. Það var ekkert vit í öðru en að kynna sér málið aðeins og senda Þóru nokkrar spurningar og rétt að byrja á því að spyrja hvað hún sé að gera þessa dagana.Meira -
Ætlaði að verða prestur
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 11.37Eldur Smári er oddviti Lýðræðisflokksins í Norðvesturkjördæmi og er fæddur á Sauðárkróki í nóvember 1979. Foreldrar hans eru Edda Lilja Hjalta-dóttir, frá Keflavík og Kristinn Jónas Björnsson frá Nýjabæ á Hofsósi. Hann er giftur Stuart Grahame Deville sem fæddur er í Lower Hutt á Nýja-Sjálandi. Þeir giftu sig í Ráðhúsinu í Kaupmannahöfn 2019. Þeir eru barnslausir en miklir dýravinir.Meira -
Afmælisveisla Hvatar er einmitt í dag!
feykir.is Austur-Húnavatnssýsla, Mannlíf, Lokað efni 23.11.2024 kl. 09.45Félagar í Ungmennafélaginu Hvöt á Blönduósi fagna í dag stórafmæli félagsins en í dag eru nákvæmlega 100 ár og tveir dagar frá stofnun þess árið 1924. Af þessu tilefni verður afmælishátíð í Íþróttamiðstöðinni á Blönduósi og hefst dagskráin kl. 13:00 og verður margt til gamans gert.Meira -
Eflum ferðaþjónustu í Norðvesturkjördæmi | Heiðdís Rós Eyjólfsdóttir skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 23.11.2024 kl. 09.45Ferðaþjónustan hefur verið ein af leiðandi ástæðum fyrir vaxtaþrótti íslensks samfélags undanfarin ár og eftirspurn eftir íslenskri ferðaþjónustu hefur vaxið af miklum krafti þótt jarðhræringarnar á Reykjanesskaga hafi leitt til ákveðinnar hnignunar. Þrátt fyrir allt hefur fjöldi erlendra ferðamanna á fyrstu níu mánuðum ársins verið lítillega yfir fjölda síðasta árs en fjöldi gistinátta hefur hins vegar dregist saman. Eins og kemur fram í þjóðhagsspá Hagstofunnar í nóvember er búist við því að fjöldi erlendra ferðamanna haldist stöðugur á næsta ári í 2,3 milljónum.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.