Sautján nýburagjafir gefnar í Húnaþingi vestra í fyrra

Gjöfin sem nýburar sveitarfélagsins fá. Mynd tekin af hunathing.is
Gjöfin sem nýburar sveitarfélagsins fá. Mynd tekin af hunathing.is

Á vef Húnaþings vestra segir að frá árinu 2023 hefur nýbökuðum foreldrum í sveitarfélaginu verið færð lítil gjöf til að bjóða nýfædda íbúa velkomna í heiminn og voru 17 gjafir gefnar á árinu 2024.

Upphaflega var um tilraun að ræða en viðtökurnar hafa verið góðar og þessi siður mælst afar vel fyrir. Verður honum því fram haldið á árinu 2025 og ekki nóg með það heldur verður bætt í gjöfina. Mun hún nú samanstanda af samfellu, slefsmekk, ullarlambúshettu frá 66N, bók úr bókaflokknum 100 fyrstu orðin, bókinni fyrstu mánuðirnir - ráðin hennar Önnu ljósu eftir Önnu Eðvaldsdóttur og Sylvíu Rut Sigfúsdóttur, bleijupakka, snuði, ásamt sýnishornum af vörum sem henta vel fyrir nýburann og brjóstagjöfina.

"Með gjöfinni viljum við halda áfram að undirstrika áherslu okkar á fjölskylduvænt samfélag. Hér í sveitarfélaginu er afar gott umhverfi fyrir barnafjölskyldur og viljum við með þessu halda áfram að styrkja það umhverfi enn frekar. Við vonum að gjöfin komi að góðum notum og hlökkum til að taka vel á móti börnum sem koma í heiminn í sveitarfélaginu á árinu." segir Unnur Valborg Hilmarsdóttir sveitarstjóri.

Athugasemdir eru á ábyrgð þeirra sem þær skrá.

Feykir áskilur sér þó rétt til að eyða ummælum sem metin verða sem ærumeiðandi eða ósæmileg.

Smelltu hér til að tilkynna óviðeigandi athugasemdir.

Fleiri fréttir