Hrikalega góð eplakaka

Þessa vikuna eru það Friðjón Bjarnason og Auður Aðalsteinsdóttir á Sauðárkróki sem bjóða okkur upp á uppskriftir vikunnar. -Við í matarhorninu ætlum að stinga upp á því að þið hvílið ykkur  á grillmatnum og prófið indælan fiskrétt í staðinn með krydduðum hrísgrjónum og fersku salati. En fyrst ætlum við að gefa ykkur uppskrift að túnfisksalati sem tilbreytingu frá hinu hefðbundna, og að endingu kemur svo uppskrift að hrikalega góðri eplaköku.

Túnfisksalat:

• 1 dós    túnfiskur í olíu (ora),( hellið olíunni af)
• 15 cm   selleristilkur, smátt saxaður
• 1/2-1 stk. epli rautt, smátt saxað
• 3 msk    majones
• 2 msk    súrmjólk
• örlítið salt, ef vill

Blandið þessu saman í skál, og berið fram með Ritz kexi.

Góður fiskréttur:

• 800 gr. af ferskum fiski, helst lúðu, steinbít og ýsu í bland. Sneiddur í litla bita.
• 150 gr. rækjur (lúxusrækjur frá Dögun) afþýddar.
• 1 stk     laukur, saxaður
• 1/2 dl    sellerírót, raspað
• 3 stk     hvítlauksgeirar, kreistir
• 1/2        rauð paprika, söxuð
• 2 msk   taílensk fiskisósa (fæst í Skaffó)
• 3 dl       matreiðslurjómi
• 1 tsk     sítrónusafi
• salt og pipar
• 3 msk   olía og smjörklípa til steikingar

Hitið olíu og smjör á pönnu og léttsteikið lauk, sellerírót, hvítlauk og papriku.  Hellið matreiðslurjómanum, fiskisósunni og sítrónusafanum yfir og hitið að suðu. Leggið þá fiskinn í sósuna og látið malla í 4-5 mín. eða þar til fiskurinn er soðinn, passið að ofsjóða ekki!  Saltið og piprið að vild, ef sósan er of sterk þá bætið aðeins meira af rjómanum og sítrónusafanum í.  Leggið svo rækjurnar að síðustu í sósuna og leyfið að hitna.

Hrísgrjón:

• 2 pokar Basmati grjón, sjóðið samkv. leiðb. á pakka.  Best er ef grjónin eru orðin köld. Sniðugt að nota rest frá gærdeginum.
• 1/2       laukur, saxaður
• 10 cm  selleristöng, saxað
• 2 stk    hvítlauksgeirar pressaðir
• 1/2 msk  karrý
• 3 msk   olía

Léttsteikið lauk, sellerí og hvítlauk í olíunni í potti.  Bætið karrýinu saman við og að lokum grjónunum í og hitið. Saltið örlítið.

Berið fiskréttinn fram með grjónunum og fersku salati.

Amerísk eplakaka:
Smyrjið 24 cm kökuform. og hitið ofninn í 175°

• 200 gr   smjör mjúkt
• 21/2 dl  sykur
• 3 stk    egg
• 4 dl      hveiti
• 1 tsk    lyftiduft
• 1 dl      rjómi
• 11/2 tsk vanilludropar
• 2 stk    epli skorin í bita
• 1-2 msk kanilsykur

Hrærið vel saman í hrærivél, smjör og sykur þar til það er orðið ljóst. Bætið við einu eggi í senn og hrærið vel á milli.   Blandið saman í skál hveiti og lyftidufti og hrærið varlega saman við deigið.  Bætið rjómanum og vanilludropum út í og hrærið deigið jafnt. Setjið blönduna í kökuformið og þrýstið eplabitunum ofan í. Endið svo á að dreifa kanilsykrinum yfir áður en kakan er sett í ofninn í 40-50 mín.  Berið kökuna fram volga með þeyttum rjóma eða ís.

Verði ykkur að góðu!