Höldum áfram góðu starfi í sveitarstjórn og nefnum

Samkvæmt málefnasamningi meirihluta Framsóknarflokks og Vinstri grænna í Skagafirði, sem birtur var í Feyki í síðustu viku er fyrsta verkefnið svohljóðandi  „ Áhersla verður lögð á að eiga gott samstarf við fulltrúa annarra flokka í sveitarstjórninni, starfsfólk sveitarfélagsins og íbúa Skagafjarðar“.   

Mikið var ég sammála  þegar ég las þetta því  eitt af stefnumálum Samfylkingarinnar fyrir fjórum árum, var að auka traust samfélagsins á Sveitarstjórninni ásamt því að standa vörð um ímynd sveitarfélagsins á vettvangi sveitarstórnar.  Jákvæðni, samstaða og vinnugleði skyldu einkenna störf sveitarstjórnar og að mínu mati gekk það eftir, það náðist góð samstaða allra flokka og ákveðið traust á milli fólks.  Lagt var upp með breytt verklag eins og að ákveða að Vinstri græn, sem náðu ekki inn fulltrúa í nefndir og ráð , hefði áheyrnarfulltrúa með málfrelsi og tillögurétt, það verklag skilaði sér vel  í allri umræðu og ákvörðunartöku, til hagsbóta fyrir íbúa sveitarfélagsins.

Mér var hugsað til þessa þegar ég sat fyrsta fund sveitarstjórnar í gær,  á dagskrá var tillaga frá Frjálslynda flokknum, Samfylkingu og Sjálfstæðisflokki, að þeim flokkum sem ekki hafa fengið kjörna fulltrúa í fastanefndir fengju að skipa áheyrnarfulltrúa í viðkomandi nefnd með málfrelsi og tillögurétt.

Meirihluti Framsóknar og Vinstri grænna, var þessu ekki sammála og lagði fram breytingartillögu þess efnis að einn áheyrnarfulltrúi yrði í nefndum og minnihlutinn skipti nefndum á milli sín.  þetta kom mér í opna skjöldu þar sem forseti sveitarstjórnar, Bjarni Jónsson VG, hafði haft samband fyrir helgi og sagt að meirihlutinn samþykkti áheyrnarfulltrúa allra flokka í nefndir.

Ekki góð byrjun á því að eiga gott samstarf við fulltrúa annarra flokka í sveitarstjórn þykir mér, enda var loftið rafmagnað á þessum fyrsta fundi og ekki góð byrjun á vinnu sveitarstjórnar og ekki góð byrjun á því að viðhalda þeim lýðræðislegu vinnubrögðum  sem við höfðum blessunarlega haft vit á að tileinka okkur í síðustu sveitarstjórn.

Það sem einn gerir vel gerir hópur enn betur

Það er ljóst, að núverandi sveitarstjórn þarf á komandi kjörtímabili, að taka margar erfiðar ákvarðanir sem snerta hag íbúa sveitarfélagsins, stofnana og starfsmanna. Slíkar ákvarðanir á að mínu mati að taka  í öflugu samstarfi allra flokka.  Samfylkingin leggur áherslu á að sveitarstjórnarfólk, hvar í flokki sem það stendur , starfi saman fyrir samfélagið.  Það eru fimm flokkar með kjörna aðild í sveitarstjórn og það eiga að vera fimm flokkar sem koma að nefndum og ráðum sveitarfélagsins annað er ólýðræðislegt og rangt.   Þetta er álíka  og að vera með  fimm menn í vinnu og láta einungis þrjá  þeirra vinna.

Náungakærleiki

Nú er lag,meirihlutinn hefur tök á því að breyta þessu með því að koma á  góðu samráði við fulltrúa minnihlutans fyrir næsta sveitarstjórnarfund og stuðla að auknum náungakærleik og markvissari vinnubrögðum.

Gréta Sjöfn Guðmundsdóttir, sveitarstjórnarfulltrúi Samfylkingarinnar  í Skagafirði