A-Húnavatnssýsla

Tveir togara FISK Seafood voru mættir til löndunar á öðrum degi ársins að afloknu jólafríi. Alls lönduðu Drangey SK2 og Málmey SK1 um 190 tonnum og var uppstaða aflans þorskur og karfi.

Allmörg ár eru síðan sýnilegur og jafnframt fjölmennur hópur fólks setti svip sinn á Sauðárkrók. En þá fór um bæinn, holt, heiðar og nær sveitir hópur fólks, í hvers lags veðri, hlaupandi eða gangandi og hélt oftar en ekki til við Sundlaug Sauðárkróks. Þetta var Skokkhópurinn, sem varð til með samvinnu íþróttakennara í bænum og var virkni hópsins mikil, til lengri tíma.

Byggðasafn Skagfirðinga heldur áfram að toppa sig í gestafjölda. Í áramótakveðju safnsins var sagt frá því að starfsfólkið hefði tekið á móti 69.060 manns á árinu sem nú er liðið. Svo það er óhætt að segja að þau hafi haft í nægu að snúast hjá Byggðasafninu. Þetta eru 5.893 gestum fleira en heimsóttu safnið í fyrra en þá voru 63.167 manns sem komu í heimsókn.

Feykir stóð fyrir vali á Manni ársins á Norðurlandi vestra nú yfir jólin og lauk kosningu á hádegi á nýársdag. Valið stóð á milli átta aðila og var hægt að kjósa á Feykir.is eða senda inn atkvæði á skrifstofu Feykis. Alls voru það 1640 sem kusu og varð niðurstaðan sú að Karólína í Hvammshlíð, hvunndagshetja og baráttukona, reyndist öruggur sigurvegari, fékk 47% atkvæða og telst því vera Maður ársins 2023 á Norðurlandi vestra.

Nýtt ár er gengið í garð og deilur um gæði Áramótaskaups Sjónvarpsins fóru nokkuð hraustlega af stað en urðu síðan að láta í minni pokann þegar forseti Íslands, Guðni Th. Jóhannesson, lýsti því yfir í nýársávarpi sínu að hann hygðist ekki gefa kost á sér í forsetakosningum nú í júní og mun því aðeins sitja í embætti tvö kjörtímabil. Þetta virtist koma landsmönnum talsvert á óvart enda venjan sú að menn dvelji lengur á Bessastöðum.

Tón-lystin hefur áður tekið fyrir tvær dömur í hljómsveitinni Skandal, þær Ingu Suska frá Blönduósi og Sóleyju Sif frá Skagaströnd, en nú er komið að þriðja og síðasta Norðvestlendingnum í þessari efnilegu fimm stúlkna hljómsveit. Röðin er því komin að Sólveigu Erlu Baldvinsdóttur frá Tjörn í Skagabyggð að tækla Tón-lystina en hún er fædd árið 2006, spilar á þverflautu og stundar nám við Menntaskólann á Akureyri líkt og aðrir meðlimir Skandals.

Á nýársdegi er það Erla María Lárusdóttir innanhúshönnuður sem gerir upp árið 2023. „Ég starfa hjá Vinnumálastofnun, sit í sveitarstjórn á Skagaströnd, tek að mér verkefni í innanhússhönnun og rek menningar- og samveruhúsið Bjarmanes ásamt Evu Guðbjartsdóttur,“ svarar Erla María þegar Feykir forvitnast um hvað hún sé að bralla. Sumir hafa bara fullt að gera.

Feykir óskar lesendum sínum, sem og landsmönnum öllum, gleðilegs nýs árs og þakkar fyrir árið sem var að líða undir lok.

Knattspyrnusamband Íslands hefur frá stofnun afhent heiðursmerki við sérstök tilefni, en heiðursmerki KSÍ úr silfri er veitt þeim einstaklingum sem unnið hafa vel og dyggilega að eflingu knattspyrnuíþróttarinnar í áratug eða lengur. Sagt er frá því á Aðdáendasíðu Kormáks að á fundi orðunefndar 20. desember 2023 voru þrír bakhjarlar Kormáks Hvatar sæmdir þessu heiðursmerki, fyrstir allra úr röðum Umf. Kormáks.

Björgvin Brynjólfsson býr í Vogahverfinu í Reykjavík en er alla jafna einn alharðast stuðningsmaður Kormáks/Hvatar í fótboltanum og einn af spekingunum á bak við aðdáendasíðuna. Þá er kappinn formaður meistaraflokksráðs liðsins en er að auki gæðastjóri hjá Vegagerðinni. Þar sem hann fékk óvart sendan spurningalista sem fylgdi nokkurra ára gömlu ársuppgjöri hefur Feykir upplýsingar um að Björgvin er sporðdreki „...með öllum tilheyrandi kostum og löstum.“ Þau þrjú orð sem honum finnst lýsandi fyrir árið eru; árangur uppferð og hamingjja – sem segir manni að árið hans hafi verið vel yfir meðallagi.