Ýmist lamandi hiti eða svarta þoka :: Veður setur strik í smalamennsku
Um helgina fóru göngur og réttir víðast hvar fram á landinu og fara æði misjafnar fréttir af gangi mála sérstaklega á Norðurlandi. Sums staðar gekk allt eftir áætlunum en annars staðar hafði veður mikil áhrif og tafði framgöngu þeirra, þá einkum þoka sem umlék fjöll og dali um helgina eða sól og einmunablíða fyrir helgi.
Þannig háttaði til að vegna „óviðráðanlegra aðstæðna“, eins og tilkynnt var á heimasíðu Húnabyggðar, seinkaði réttum í Auðkúlurétt sl. laugardag. Að sögn Helga Páls Gíslasonar, fjallskilastjóra á Höllustöðum, var seinkunin tilkomin vegna of mikillar blíðu. „Þriðjudag, miðvikudag og fimmtudag vorum við í 20 stiga hita og logni nánast og þetta var farið að snúast um það að ná hvíld á skepnur og menn. Þær voru uppgefnar og þetta gekk hægt,“ sagði Helgi þegar Feykir sló á þráðinn til hans. Hann segir þó að honum hafi ekki fundist ganga illa, það hafi bara ekki verið nógu margir birtutímar í deginum.
„Þetta var fyrst og fremst þessi gríðarlegi hiti í þetta marga daga. Maður hefur alveg fengið heitan dag en þetta snerist um þetta orðið. Við komum degi seinna, hvíldum féð eina nótt en vorum komin um hádegi daginn eftir niður í rétt.“
Á Auðkúluheiði er lagt af stað með smalahross á sunnudagsmorgni, komið í Hveravelli kvöldið eftir og byrjað að smala á þriðjudegi. Helgi segir að komið sé með safnið niður í rétt á föstudagskvöldi við ljósaskiptin en nú hafi verið brugðið á það ráð að hvíla féð yfir nótt. „Aldrei lent í þessu áður. Ég ætla nú ekki að bölva sumrinu en ég kann á hitt,“ segir hann og á þá við að ganga í kaldara veðri. „Þetta er alveg nýtt fyrir manni, heiðskírt og glampandi sól. Bara smá gola hefði bjargað miklu fyrir okkur en henni var bara ekki til að dreifa á heiðinni hjá okkur núna.“
Þetta kemur allt saman
Þær göngur sem taka bara einn dag fóru flestar fram á laugardeginum og snemma leit út fyrir að smalar fengju ágætis veður og skyggni til smölunar. En fljótlega eftir að flestir voru komnir á sínar göngur og farnir að hóa læddist þoka um dali og fjöll og skyggði útsýnið svo mjög að hvarvetna smalaðist illa eða hreinlega að hætt var við smalamennsku þann daginn.
„Það var svo tilgangslaust að fara. Það var svartaþoka,“ segir Steinn Rögnvaldsson á Hrauni, gangnastjóri á Út-Skaga, en þar var göngum frestað fram á mánudag. „Við fórum á föstudaginn innst á svæðið, Sandfellið og Hafragilsfjall og smöluðum fram eins og við höfum alltaf gert fyrir Húnvetninga og fengum fínt veður þá en svo var dimmt á laugardeginum. Bjarnarfellið er eftir en ég held að það verði farið í það á morgun, [í dag miðvikudag] ef það verður bjart. Þetta kemur allt saman en hún er búin að tefja okkur þokan, það er ekkert við því að gera,“ segir Steinn.
Fleiri fréttir
-
Vonast til að FabLab-aðstaða verði opnuð í byrjun næsta árs
feykir.is Vestur-Húnavatnssýsla, Mannlíf, Lokað efni 28.11.2024 kl. 14.23Opið samráð um samfélagsmiðstöð í Félagsheimilinu Hvammstanga er kynnt á heima-síðu Húnaþings vestra. Feykir forvitnaðist aðeins um málið hjá Unni Valborgu Hilmarsdóttur sveitarstjóra og þar á meðal hvaða þjónustu hún sjái fyrir sér að verði veitt í miðstöðinni.Meira -
Öflugur landbúnaður er lykill að kröftugri byggð
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 28.11.2024 kl. 13.45Til að stuðla að farsæld og heilbrigðum vexti landbúnaðar og fæðutengdrar starfsemi þurfum við að hugsa fyrir framtíðinni í stærra samhengi en mér sýnist hafa verið gert hingað til. Opinber stuðningur skiptir augljóslega máli, en fleiri þurfa að leggja lóð sitt á vogaskálarnar.Meira -
Tækifærin í Norðvesturkjördæmi
feykir.is Skagafjörður, Austur-Húnavatnssýsla, Aðsendar greinar 28.11.2024 kl. 11.45Norðvesturkjördæmi er einstakt, þar sem stórbrotin náttúra, rík saga og menning mætast. Til að byggja upp öflugt samfélag og skapa jákvæðar framtíðarhorfur, verðum við að nýta þau tækifæri er hér felast. Við í Vinstri grænum leggjum áherslu á vel mannaða heilsugæslu, bættar samgöngur, fjölbreytta atvinnu og verndun náttúrunnar, því þannig leggjum við grunninn að öflugu samfélagi til langframa.Meira -
Ég vil vera sterkur málsvari fyrir ykkur
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 28.11.2024 kl. 09.17Það er búið að vera óendanlega gefandi vegferð að ferðast um Norðvesturkjördæmi síðastliðnar vikur. Það hefur verið magnað að heimsækja ykkur mörg og fylgjast með uppgangi nýsköpunar, frumkvöðlastarfs og vaxtar í bland við sterka og rótgróna atvinnuv...Meira -
Geymt en ekki gleymt | Leiðari 45. tbl. Feykis
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla, Lokað efni 28.11.2024 kl. 08.02Það er búið að gjósa en nú á að kjósa. Já, það styttist í kjördag, hann er á laugardaginn ef það skyldi hafa farið fram hjá einhverjum, og nú verða allir sem vettlingi geta valdið að nýta atkvæðisréttinn.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.