Snilldarleikur Stólastúlkna í stórsigri á ÍBV
Það varð ánægjuleg fótboltaveisla sem Norðvestlendingum var boðið upp í dag en mikilvægir leikir fóru fram bæði á Blönduósi og á Króknum. Stólastúlkur voru ekki öruggar með sæti sitt í Bestu deild kvenna fyrir leik sinn í dag en þær stóðu þó best að vígi af þeim þremur liðum sem enn voru í fallhættu. Þegar til kom þá hefði Donni þjálfari ekki einu sinni geta látið sig dreyma um aðra eins snilldar frammistöðu og hann, og aðrir sem fylgdust með leiknum, urðu vitni að. Það voru allir að rifna úr stolti í stúkunni yfir spilamennsku liðsins og áræðni. Lokatölur í baráttuleik um sæti í Bestu deildinni? Jú, 7-2.
Aðstæður voru fínar á Króknum, völlurinn enn sem nýr, miðstöðin ekki í gangi og því enginn blástur en vægur hiti. Það var hins vegar dágóður regnúði þannig að flesta leikmenn og fjölmarga áhorfendur mátti vinda að leik loknum. Áður en leikurinn hófst var mínútuþögn til minningar um Violetu, leikmann Einherja, sem lést að slysförum á Vopnafirði.
Leikurinn hófst svo með látið og liðin búin að gera sitt hvort markið áður en þrjár mínútur voru liðnar. Fyrst Murr með hörkuskalla eftir hornspyrnu Laufeyjar og í næstu sókn jafnaði Helena Hekla Hlynsdóttir á meðan Stólastúlkur voru enn að fagna. Heimastúlkur náðu strax undirtökunum í kjölfarið og það lá við að hætta skapaðist í hverri einustu sókn liðsins. Murr kom Stólastúlkum yfir eftir stundarfjórðung, lúrði á fjærstöng og frábær fyrirgjöf Aldísar rataði beint á ennið á henni. Á 22. mínútu var það síðan Aldís María sem fékk sendingu frá Laufeyju og kláraði af harðfylgi. Fimm mínútum síðar skallaði Melissa Garcia hornspyrnu frá Hönnuh í slána og inn og á 35. mínútu átti Aldís aftur sendingu fyrir sem Murr skilaði í markið. Staðan 5-1 og tíu mínútur til leikhlés og nú tóku heimastúlkur fótinn örlítið af bensíngjöfinni. Það hefði þó varla verið hægt að segja mikið þó staðan hefði verið 10-1 í hléi en stúkan var að stærstum hluta sátt við stöðuna.
Það var ljóst í hléi að ÍBV varð að gera betur í síðari hálfleik, helst vinna leikinn, ef þær ætluðu að hanga uppi, því Keflavík var komið yfir gegn liði Selfoss. Þær mættu því nokkuð ákveðnar til leiks en vonir þeirra urðu að engu eftir fimm mínútna leik þegar Murr strauaði varnarmann á vinstri kanti, sendi góða sendingu fyrir sem Aldís missti af en á bak við hana var María Dögg sem tók boltann á lofti og flengdi honum í markið. Eftir þetta róaðist leikurinn nokkuð en Murr gerði fjórða mark sitt á 78. mínútu. Fékk þá stungu inn fyrir frá Hugrúnu og var á auðum sjó, setti boltann í þverslána og inn. Á 80. mínútu klóruðu gestirnir í bakkann með skondnu marki því Margrét Rún var aðeins búin að vera í markinu í 15 sekúndur þegar Kristín Erna Sigurlásdóttir skoraði eftir kæruleysi í vörninni.
Þar með var nú hasarinn búinn og hamingjusamir heimamenn fögnuðu Stólastúlkum í leikslok, enda liðið búið að tryggja áframhaldandi veru í Bestu deildinni sem var jú meginmarkmið sumarsins. Liðið spilaði glimrandi vel í dag, jafnvel sinn besta leik frá upphafi, en að öðrum ólöstuðum þá áttu Murr, Beatriz, Aldís María og Laufey Harpa örugglega sinn besta leik í sumar. Hannah Cade var hins vegar kvödd í leikslok en hún virðist hafa ákveðið að halda á önnur mið. Hún hefur heldur betur reynst sterkur liðsmaður í hópi Stólastúlkna. Lið Tindastóls endaði því sumarið í Bestu deildinni í sjöunda sæti með 26 stig – vel gert!
Þá má geta þess að endingu að 147 þúsund krónur söfnuðust til handa fjölskyldu Violetu sem verður að teljast dágott. Vel að verki staðið.
Fleiri fréttir
-
Á sterka minningu um boltaleik með langafa sínum
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 21.11.2024 kl. 16.33Ólafur Adolfsson er oddviti Sjálfstæðisflokksins í Norðvestur kjördæmi. Ólafur er í sambandi með Margréti Birgisdóttur lyfjafræðingi og á hann tvö uppkomin börn, tvö barnabörn og tvö stjúpbörn. Ólafur er alinn upp í Ólafsvík og hefur auk þess átt heima um skemmri eða lengri tíma á Akranesi, í Reykjavík og á Sauðárkróki og er í dag með lögheimili á Akranesi. Hann er lyfjafræðingur og lyfsali, á og rekur fjórar lyfjabúðir sem eru staðsettar á Akranesi, í Borgarnesi, í Ólafsvík og í Vesturbæ Reykjavíkur.Meira -
Rætt við Grím Rúnar í tilefni 100 ára afmælishátíðar Hvatar á laugardaginn
feykir.is Austur-Húnavatnssýsla, Listir og menning, Lokað efni 21.11.2024 kl. 14.46Það stendur mikið til á Blönduósi nú á laugardaginn því þá fagnar Ungmennafélagið Hvöt 100 ára afmæli sínu með pompi og prakt. Það er því við hæfi að leggja nokkrar spurningar fyrir formann félagsins en það er Grímur Rúnar Lárusson. Grímur er innfæddur Blönduósingar og býr þar, er löglærður fulltrúi sýslumanns að aðalstarfi en í hjáverkum er hann sveitarstjórnarfulltrúi í Húnabyggð og formaður Umf. Hvatar.Meira -
Rótarýklúbburinn býður til ókeypis jólahlaðborðs í tíunda sinn
feykir.is Skagafjörður, Austur-Húnavatnssýsla, Lokað efni 21.11.2024 kl. 13.55Það styttist í aðventuna og í Skagafirði verða ljós tendruð á jólatrénu á Kirkjutorgi laugardaginn 30. nóvember. Sama dag standa Rótarýfélagar fyrir jólahlaðborði í íþróttahúsinu en þangað er öllum boðið og borða saman hangikjöt eða hamborgarhrygg og annað sem nauðsynlegt er. „Okkur Rótarýfélögum finnst þetta afskaplega gefandi, skemmtilegt og mikilvægt verkefni þar sem við sýnum í verki að við viljum láta gott af okkur leiða fyrir samfélagið,“ segir Ómar Bragi Stefánsson, forseti Rótarýklúbbs Sauðárkróks, í spjalli við Feyki.Meira -
Óvissa í kjölfar niðurstöðu héraðsdóms varðandi undanþágu frá samkeppnislögum
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 21.11.2024 kl. 11.28Héraðsdómur Reykjavíkur komst að þeirri niðurstöðu sl. mánudag að breytingar á búvörulögum, þar sem framleiðendafélögum var veitt undanþága frá ákvæðum samkeppnislaga, sem samþykktar voru á Alþingi í mars síðastliðnum, hefðu strítt gegn áskildum fjölda umræðna á Alþingi og hafi af þeim sökum ekki lagagildi. Eins og greint hefur verið frá þá keypti Kaupfélag Skagfirðinga í kjölfarið Kjarnafæði - Norðlenska og var langt komið með að kaupa B.Jensen í Eyjafirði.Meira -
Horfði á alþingisrásina eftir skóla
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 21.11.2024 kl. 10.29María Rut Kristinsdóttir er oddviti Viðreisnar í Norðvestur kjördæmi. María er gift Ingileif Friðriksdóttur, eiga þær saman þrjú börn og einn hund. Búsettar í Reykjavík en alltaf með annan fótinn á Flateyri og Ísafirði. María hef starfað sem aðstoðarmaður formanns Viðreisnar síðan 2017 (með stuttu hléi).Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.