Tólf útileikir hjá yngri flokkum Tindastóls um helgina
Fyrir helgi fóru þrjú lið frá yngri flokkum Tindastóls af stað út fyrir Skagafjörðinn að spila alls tólf leiki og voru þetta 8. fl. stúlkna, 8.fl. drengja og svo MB11 strákar. Af þessum tólf leikjum voru fimm sigrar og sjö töp þar sem allir gerðu sitt besta og voru sér og Tindastól til sóma.
Strákarnir í MB11 lögðu af stað til Grindavíkur á föstudaginn á fjölliðamót þar sem þeir áttu fjóra leiki í c-riðli í HS Orku höllinni. Spilað var tvo leiki á laugardeginum og tvo á sunnudeginum og var gist í skólanum í Grindavík. Að sjálfsögðu var stuð á drengjunum og komu þeir heim með tvo sigra og tvö töp eftir mikla baráttuleiki. Þeir stóðu sig afburðar vel ásamt þjálfaranum þeirra, Friðriki Hrafni Jóhannssyni, sem stýrði strákunum á mótinu. Næsta fjölliðamót verður 4.-5. febrúar í Grafarvoginum hjá Fjölni og verður gaman að fylgjast með þeim þar.
Úrslit leikjanna:
Tindastóll – Valur b 39-36
Tindastóll – Fjölnir b 31-16
Tindastóll – Haukar b 27-30
Tindastóll – Valur b 29-32
8.fl. stúlkna brunaði svo í Borgarnes og átti þar fjóra leiki í d-riðli, tvo á laugardeginum og tvo á sunnudeginum. Þær töpuðu því miður öllum sínum leikjum en eru að sýna miklar framfarir í hverjum leik sem spilað er. Þarna eru á ferðinni flottar stelpur sem eiga framtíðina fyrir sér og eiga þær næstu leiki 4.-5. febrúar.
Úrslit leikjanna:
Tindastóll – Grindavík 17-31
Tindastóll – KR b 17-29
Tindastóll – Skallagrímur 2-15
Tindastóll – Þór Ak/Samherjar 29-33
Í Kennaraháskólanum í Reykjavík spiluðu 8. fl. drengja fjóra leiki í d-riðli um helgina, tvo á laugardeginum og tvo á sunnudeginum. Þeir unnu þrjá leiki og töpuðu einum. Þeir hafa unnið sjö leiki af ellefu þar sem af er vetri og eru í harðri baráttu við að komast upp í c-riðil. Flottir strákar hér á ferð sem eiga einnig næstu leiki helgina 4.-5. febrúar.
Úrslit leikjanna:
Tindastóll – Ármann 40-35
Tindastóll – Þór Ak. B 30-26
Tindastóll – Selfoss 53-34
Tindastóll – Keflavík 20-43
Áfram Tindastóll!
Fleiri fréttir
-
Hressandi að skella sér í sjósund
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 17.15Ingibjörg Davíðsdóttir er oddviti Miðflokksins frá bænum Arnbjargarlæk í Þverárhlíð í Borgarbyggð, fædd á Akranesi 1970 og á einnig ættir að rekja til Breiðafjarðareyja, Reykhóla og Múla á Barðaströnd. Ingibjörg á eina uppkomna dóttur og á heima í sveitinni og Garðabæ. Hún er sendiherra og stjórnarformaður Íslenska fæðuklasans. Hefur starfað í utanríkisþjónustunni í ríflega 25 ár, meðal annars sem sendiherra Íslands í Noregi, ráðgjafi forsætisráðherra í utanríkismálum ásamt því að starfa í sendiskrifstofum Íslands í Genf, Vínarborg og London. Ingibjörg tók sér leyfi frá utanríkisþjónustunni í fyrra og stofnaði Íslenska fæðuklasann.Meira -
Það sem maður veitir athygli vex og dafnar
feykir.is Skagafjörður, Listir og menning, Lokað efni 23.11.2024 kl. 12.09Það er margt í mörgu, sagði einhver einhverntímann, og hitti þar mögulega naglann rækilega á höfuðið. Greinarskrifari rak nýlega augun í viðburði í sveitinni sem komu honum svolítið spánskt fyrir sjónir; Kakóstund og 9D BreathWork. Það er Þóra Kristín Þórarinsdóttir frá Frostastöðum í Blönduhlíðinni sem stendur að baki þessum viðburðum. Það var ekkert vit í öðru en að kynna sér málið aðeins og senda Þóru nokkrar spurningar og rétt að byrja á því að spyrja hvað hún sé að gera þessa dagana.Meira -
Ætlaði að verða prestur
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 11.37Eldur Smári er oddviti Lýðræðisflokksins í Norðvesturkjördæmi og er fæddur á Sauðárkróki í nóvember 1979. Foreldrar hans eru Edda Lilja Hjalta-dóttir, frá Keflavík og Kristinn Jónas Björnsson frá Nýjabæ á Hofsósi. Hann er giftur Stuart Grahame Deville sem fæddur er í Lower Hutt á Nýja-Sjálandi. Þeir giftu sig í Ráðhúsinu í Kaupmannahöfn 2019. Þeir eru barnslausir en miklir dýravinir.Meira -
Afmælisveisla Hvatar er einmitt í dag!
feykir.is Austur-Húnavatnssýsla, Mannlíf, Lokað efni 23.11.2024 kl. 09.45Félagar í Ungmennafélaginu Hvöt á Blönduósi fagna í dag stórafmæli félagsins en í dag eru nákvæmlega 100 ár og tveir dagar frá stofnun þess árið 1924. Af þessu tilefni verður afmælishátíð í Íþróttamiðstöðinni á Blönduósi og hefst dagskráin kl. 13:00 og verður margt til gamans gert.Meira -
Eflum ferðaþjónustu í Norðvesturkjördæmi | Heiðdís Rós Eyjólfsdóttir skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 23.11.2024 kl. 09.45Ferðaþjónustan hefur verið ein af leiðandi ástæðum fyrir vaxtaþrótti íslensks samfélags undanfarin ár og eftirspurn eftir íslenskri ferðaþjónustu hefur vaxið af miklum krafti þótt jarðhræringarnar á Reykjanesskaga hafi leitt til ákveðinnar hnignunar. Þrátt fyrir allt hefur fjöldi erlendra ferðamanna á fyrstu níu mánuðum ársins verið lítillega yfir fjölda síðasta árs en fjöldi gistinátta hefur hins vegar dregist saman. Eins og kemur fram í þjóðhagsspá Hagstofunnar í nóvember er búist við því að fjöldi erlendra ferðamanna haldist stöðugur á næsta ári í 2,3 milljónum.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.