Laufléttur sigur í Síkinu
Tindastóll fékk framlágt lið Snæfells í heimsókn í Síkið í kvöld og unnu stórsigur eins og vænta mátti. Stólarnir náðu strax góðri forystu og það var augljóst frá fyrstu mínútu að gestirnir voru ekki líklegir til að veita mikla mótspyrnu. Staðan í hálfleik var 49-21 og hálfgerð þolraun fyrir áhorfendur að komast í gegnum seinni hálfleikinn sem var óspennandi með öllu. Lokatölur 100-57.
Stólarnir komust í 10-2 og keyrðu upp hraðann í byrjun leiks. Þá pressuðu þeir gestina og gerðu þeim erfitt fyrir að koma með boltann upp völlinn. Björgvin spilaði hrikalega sterka vörn á Sefton Barrett, Kana þeirra Snæfellinga, sem verið hefur þeirra langöflugasti leikmaður. Nú sá hann ekki til sólar og var orðinn ævintýralega svekktur strax í öðrum leikhluta. Það segir mikið um vörnina sem spiluð var á hann að hann endaði leikinn með fjögur stig og fimm fráköst en meðal stigaskor hans fyrir leikinn í kvöld var vel yfir 20 stigum. Þar sem hann var tekinn út úr leiknum var fátt um fína drætti hjá gestunum. Þeir voru undir 26-10 eftir fyrsta leikhluta og aðeins spurning hvort Stólarnir næðu að halda einbeitingunni. Sem var nú varla raunin því liðið tapaði 24 boltum í leiknum, þremur fleiri en lið Snæfells! En það var auðvitað verið að reyna erfiðar sendingar og menn voru kærulausir á boltanum. Staðan í hálfleik var 49-21.
Eitthvað hefur Ingi Þór náð að blása smá eldmóði í sína menn í hálfleik því þeir komu beittari til leiks – það var í það minnsta ekki sami uppgjafarsvipurinn á mönnum. Þeir náðu að halda í við Stólana en munurinn þó yfirleitt 25-30 stig. Hannes Ingi setti niður tvo þrista og Helgi Margeirs einn og munurinn skreið yfir 30 stigin undir lok þriðja leikhluta. Mesti móðurinn var runninn af gestunum í fjórða leikhluta og bæði lið fóru að spara byrjunarliðsmennina. Helgi Margeirs setti niður þrjá þrista í þremur skotum á rúmlega tveggja mínútna kafla og það kveikti vel í stúkunni. Þá vakti Svabbi mikla lukku þegar hann, örugg vítaskyttan, misnotaði þrjú vítaskot í röð en var fagnað ákaflega þegar hann setti það fjórða niður.
Þetta var að sjálfsögðu góður sigur hjá liði Tindastóls sem er nú með átta stig eftir sex leiki í Dominos-deildinni. Þessi leikur segir hinsvegar lítið um styrk liðsins en vörnin var sterk í fyrri hálfleik. Mamadou Samb, sem fékk þungan dóm hjá spekingunum í Dominos-kvöldi eftir síðustu umferð, var stigahæstur með 24 stig og átta fráköst, en þolinmæðin gagnvart honum í stúkunni virðist minnka með hverjum leiknum og ljóst að margir geta ekki beðið eftir að sjá kappann hverfa á braut. Caird var með 16 stig og sjö fráköst en síðan voru Björgvin og Helgi Margeirs með 12 stig hvor og Björgvin með flest fráköst eða 10 stykki. Pétur var með tíu stig í leiknum og tíu stoðsendingar.
Í liði gestanna var Viktor Alexandersson stigahæstur með 11 stig og næstur honum kom Maciej Klimaszewski með 10 stig. Lið Tindastóls tók 45 fráköst í leiknum en Snæfellingar 27.
Fleiri fréttir
-
Nýtt upphaf – í þjónustu við þjóðina | Arna Lára Jónsdóttir skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 27.11.2024 kl. 11.54Við í Samfylkingunni óskum eftir þínum stuðningi til að leiða breytingar sem nauðsynlegar eru fyrir Ísland. Við höfum átt í innihaldsríku samtali við þjóðina síðastliðin tvö ár og því ætlum við að halda áfram. Það að vera í þjónustu við þjóðina þýðir að hlusta og rækta samband við fólkið í landinu. Það höfum við gert og ætlum að gera áfram. Þetta samtal er grunnurinn að stefnu Samfylkingarinnar fyrir þessar kosningar sem birtist í Planinu, þremur útfærðum tillögum í efnahagsmálum, velferðarmálum og atvinnu- og innviðamálum.Meira -
Baráttusigur Stólastúlkna í Hveragerði
feykir.is Skagafjörður, Íþróttir, Lokað efni 27.11.2024 kl. 09.10Kvennalið Tindastóls í Bónus deildinni tók þátt í enn einum spennuleiknum í gærkvöldi þegar liðið sótti Hamar/Þór heim í Hveragerði. Eftir leik sem lengstum var hnífjafn, liðin skiptust 13 sinnum á um að hafa forystuna og 14 sinnum var allt jafnt, þá voru það gestirnir sem reyndust grimmari á lokakaflanum. Þær voru níu stigum undir þegar fimm mínútur voru til leiksloka en snéru taflinu við og unnu leikinn 103-105.Meira -
Jólatónleikar Tónlistarskóla Austur-Húnvetninga
feykir.is Austur-Húnavatnssýsla, Listir og menning, Lokað efni 26.11.2024 kl. 16.07Tónlistarskóli Austur-Húnvetninga heldur sína árlegu jólatónleika í desember. Um er að ræða þrenna tónleika sem fara fram í Blönduóskirkju og Hólaneskirkju.Meira -
Sungið af hjartans lyst
feykir.is Skagafjörður, Listir og menning, Lokað efni 26.11.2024 kl. 12.06Senn kemur út bókin Sungið af hjartans lyst en þar skráir Sölvi Sveinsson sögu Friðbjörns G. Jónssonar söngvara. Það er Sögufélag Skagfirðinga sem gefur bókina út. Feykir lagði nokkrar spurningar fyrir Sölva í tilefni af útgáfu bókarinnar og byrjaði að biðja hann um að segja deili á viðfangsefninu.Meira -
Nemendur FNV á faraldsfæti
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 26.11.2024 kl. 11.55Dagana 13.-17. nóvember fór hópur nemenda frá FNV til Uherské Hradiště í Tékklandi í Eramsus+ ferð. Í frétt á vef FNV segir að um hafi verið að ræða hluta af verkefninu INCLUSION: A human right and opportunity for all (Mannréttindi og tækifæri fyrir alla) þar sem áhersla er lögð á stuðning og samleið þeirra sem þurfa stuðning vegna ýmissa þátta, líkt og að nota hjólastól, skerðing á sjón eða heyrn, sem og aðrar andlegar eða líkamlegar skerðingar.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.