Kormákur/Hvöt hélt sæti sínu í 2. deild þrátt fyrir tap í lokaumferðinni
Það var hart barist í síðustu umferð 2. deildarinnar í tuðrusparkinu í gær. Hvorki hafði gengið né rekið hjá Kormáki/Hvöt í síðustu leikjum og útlitið ekki verulega gott fyrir lokaleikinn; erfiður andstæðingur í Ólafsvík á meðan lið KF spilaði heima á Ólafsfirði gegn Hetti/Huginn sem hafði tapað fimm leikjum í röð og virtust hættir þetta sumarið. Það eina sem spilaði með Húnvetningum var að þeir höfðu stigi meira en lið KF fyrir síðustu umferðina og það reyndist heldur betur mikilvægt þar sem bæði lið töpuðu og bættu því ekki við stigasafnið. Kormákur/Hvöt náði því í raun þeim frábæra árangri að halda sæti sínu í 2. deild og það voru víst ekki margir sem veðjuðu á það fyrir mót.
Það byrjaði ekki gæfulega hjá Húnvetningum í Ólafsvík því heimamenn náðu forystunni strax á þriðju mínútu með marki Luke Williams. Luis Ocerin bætti við öðru marki á 14. mínútu og staðan 2-0 í hálfleik. Ingvi Rafn gaf gestunum von með marki á 51. mínútu en tíu mínútum síðar gerði markamaskínan Gary Martin út um leikinn. Lokatölur því 3-1 og nú þurfti að treysta á Höttur/Huginn kæmi til bjargar Húnvetningum.
Sem þeir, nokkuð óvænt, gerðu. Lið KF lenti undir strax eftir sex mínútur og síðan áttu gestirnir eftir að bæta við tveimur mörkum. Það væri ólíkt KF að gefast upp og þeir minnkuðu muninn í 2-3 með tveimur mörkum á fimm mínútna kafla og þá voru enn um 40 mínútur eftir. Fleiri urðu mörkin þó ekki og Húnvetningar því áfram í 2. deild. Lið KF spilar hins vegar í 3. deild að ári líkt og Tindastóll.
Fyrir lokaumferðina hafði lið Selfoss tryggt sér sæti í Lengjudeildinni en þrjú lið börðust um að fylgja þeim upp. Þau unnu öll leiki sína og þar sem Völsungur Húsavík stóð þeirra best fyrir leiki gærdagsins þá fylgja þeir Selfyssinum upp eftir ótrúlegan 3-8 sigur á KFA.
Þess má geta að áður en bolta var sparkað í vor stóð Fótbolti.net fyrir spá fyrirliða og þjálfara liðanna í deildinni og þar lenti lið Kormáks/Hvatar langneðst. Það má því segja að lið Húnvetninga hafi komið skemmtilega á óvart og sat raunar aldrei í fallsæti allt tímabilið. En fyrst og síðast; til hamingju Húnvetningar með sætið í 2. deildinni!
Fleiri fréttir
-
Frítt í landsbyggðarstrætó á bíllausa daginn
feykir.is Skagafjörður, Austur-Húnavatnssýsla, Vestur-Húnavatnssýsla 18.09.2024 kl. 15.03Vegagerðin tekur virkan þátt í Evrópsku samgönguvikunni, meðal annars með því að hafa frítt í landsbyggðarstrætó á bíllausa daginn, sunnudaginn 22. september. Á netsíðu Vegagerðarinnar segir að borgir og bæir á Íslandi hafi tekið þátt í Evrópsku samgönguvikunni frá árinu 2002. Samgönguvikan er samstillt átak sveitarfélaga í Evrópu sem er ætlað að ýta undir sjálfbærar samgöngur.Meira -
Skólafólk nestaði sig inn í nýtt skólaár
feykir.is Skagafjörður, Austur-Húnavatnssýsla, Vestur-Húnavatnssýsla, Mannlíf 18.09.2024 kl. 15.01Haustþing Kennarasambands Norðurlands vestra fór fram í Miðgarði í Varmahlíð þann 30. ágúst síðastliðinn. Formaður KSNV er Álfhildur Leifsdóttir kennari við Árskóla á Sauðárkróki og hún féllst á að svara nokkrum spurningum Feykis um þingið og eitt og annað tengt skólamálum.Meira -
Hefur sennilega aldrei slegið garð foreldranna jafn oft
feykir.is Austur-Húnavatnssýsla, Íþróttir, Vestur-Húnavatnssýsla 18.09.2024 kl. 13.43Feykir heyrði síðast hljóðið í Ingva Rafni Ingvarssyni, þjálfara Kormáks/Hvatar í 2. deildinni í knattspyrnu þegar um sex umferðir voru eftir af mótinu. Þá stóðu Húnvetningar ansi vel, voru í áttunda sæti með 18 stig og virtust nokkuð öruggir með sætið í deildinni. Ingvi Rafn vonaðist eftir sex stigum í næstu tveimur leikjum og það átti að fara langt með að tryggja sætið. Liðið vann ekki einn einasta leik frá þeim tíma en slapp við fall í síðustu umferðinni þar sem KF náði ekki að vinna sinn leik.Meira -
Stundum líður manni eins og við séum að spila berfætt á grýttum malarvelli
feykir.is Austur-Húnavatnssýsla, Mannlíf 18.09.2024 kl. 10.44„Framundan er árleg vinna við fjárhagsáætlun sem á sér fastan sess í dagatali sveitarfélagsins. Sameining við Skagabyggð er nýlega formfest og nú er hafin vinna við að sameina fjáhag sveitarfélaganna en þau verða gerð upp sem eitt á þessu ári,“ segir Pétur Bergþór Arason, sveitarstjóri Húnabyggðar, þegar Feykir gabbar hann í að svara nokkrum spurningum tengdum Húnabyggð. Sveitarfélagið Húnabyggð varð til við sameiningu Blönduóss og Húnavatnshrepps sumarið 2022 og Pétur því fyrsti sveitarstjórinn.Meira -
Sálfélagsleg þjónusta við börn og ungmenni efld hjá HSN með nýju geðheilsuteymi barna
feykir.is Skagafjörður, Austur-Húnavatnssýsla 18.09.2024 kl. 10.16Eins og tilkynnt hefur verið mun þjónusta sem barna- og unglingageðteymi (BUG) hefur veitt á Sjúkrahúsinu á Akureyri (SAk) færast til Heilbrigðisstofnunar Norðurlands (HSN) frá og með 1. október. Verður hún hluti af sálfélagslegri þjónustu HSN sem hefur sinnt grunnþjónustu (vægum til miðlungs vanda) við börn og fullorðna og sinnt einstaklingum með alvarlegri og flóknari vanda innan geðheilsuteymis fullorðinna.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.