Munu Erlendur, Freyja, Hörður og Ari Þór dúkka upp?
„Glæpakviss er fyrir alla þá sem hafa gaman af að lesa glæpasögur og hafa eitthvað fylgst með íslenskri glæpasagnaútgáfu. Svo er auðvitað ekki verra að hafa gaman af spurningakeppni,“ segir Fríða Eyjólfsdóttir hjá Héraðsbókasafni Skagfirðinga en hún og Siva Þormóðsdóttir hyggjast spyrja þátttakendur spjörunum úr í Glæpakvissi sem fram fer í Gránu á Sauðárkróki fimmtudaginn 5. september og hefst kl. 17:00. Feykir yfirheyrði Fríðu stuttlega um málið.
Tróna íslenskar glæpasögur á toppi vinsældalista Héraðsbókasafns Skagfirðinga? „Ég er nú ekki með útlánstölur alveg á hreinu en víst er að margar íslensku glæpasögurnar eru þar ofarlega á lista og ég tel nokkuð öruggt að glæpasögur vinsælustu höfundanna vermi efstu sætin.“
Liggur mikil vinna að baki þess að semja spurningar í Glæpakviss? „Nú verð ég víst að gera þá játningu að við komum hvergi nálægt því að semja spurningarnar þó vissulega hefði verið gaman að slá um sig með því. Við fáum þær sendar frá Hinu íslenska glæpafélagi sem stendur fyrir þessari keppni á landsvísu í tilefni 25 ára afmælis félagsins.“
Þarf fólk að koma vel undirbúið til leiks, lesa allan Arnald til upprifjunar svo dæmi sé tekið? „Eins og ég sagði áður þá komum við ekki nálægt því að semja spurningarnar og höfum ekki fengið þær í hendur enn svo ég get ekki gefið almennilegt svar við þessari spurningu. Ég tel þó að allir þeir sem eitthvað hafa lesið af bókum þessara helstu höfunda okkar eigi fullt erindi á Glæpakvissið.“
Eru Fríða og Siva miklir aðdáendur íslenskra glæpasagna? „Já, ég held það sé óhætt að segja að við séum aðdáendur íslenskra glæpasagna, þá kannski Siva enn frekar en ég þar sem ég les mun meira af þýddum glæpasögum. Þrátt fyrir að Sivu finnist Edda hennar Jónínu Leósdóttur langskemmtilegasti rannsakandinn, eru Napóleonsskjölin hans Arnaldar og Ég man þig eftir Yrsu mest spennandi glæpasögurnar. Ég sjálf á enga uppáhalds íslenska glæpasögu en ég held að af íslensku höfundunum sé Eva Björg Ægisdóttir í mestu eftirlæti.“
Man einhver hvað gerist í glæpasögum, er þetta ekki bara stundarfróun og mest allt gleymt þegar bókinni er lagt að loknum lestri? „Trúlega er það nú oft þannig en það er samt ótrúlegt hvað getur rifjast upp hjá lesendum þegar á þarf að halda.“
Hvernig væri týpísk spurning í Glæpakvissi? „Ég fer nú ekki að ljóstra því upp – enda veit ég það ekki enn!“ segir Fríða, sakleysið uppmálað, að lokum og nokkuð ljóst að yfirheyrslan nær ekki lengra að sinni enda neita yfirkvissarar sök – komu ekki nálægt því að semja spurningar Glæpakvissins.
Fleiri fréttir
-
Jólatvenna í Lýtó á laugardegi
feykir.is Skagafjörður, Listir og menning, Lokað efni 22.11.2024 kl. 19.26Það verður jólastemning í Lýtó á morgun, laugardag 23. nóvember, en þá stendur Sigrún á Stólhóli fyrir Jólamarkaði Rúnalistar í Hlöðunni og Rúnalist Gallerí. Opið verður frá 13-17 og sama dag verið Kaffihúsið Starrastöðum opið frá 14-18. Þessu má enginn missa af enda alltaf gaman að renna fram í Lýtó.Meira -
Þráði að verða ballettdansari
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 22.11.2024 kl. 18.16Guðmundur Hrafn Arngrímsson er 51 árs, faðir fimm barna á aldrinum 6-26 ára. Er frá Seljanesi við Ingólfsfjörð og ólst upp í Bolungarvík. Guðmundur er oddviti Sósíalista í Norðvestur kjördæmi. Guðmundur hefur haldið heimili í Reykjavík og búið þar að mestu leyti frá því hann flutti heim úr námi árið 2007. Síðustu 15 árin hefur hann starfað við landslagshönnun, torf- og grjóthleðslur og fræðslu og kennslu í útinámi, samhliða því hef hann undanfarin þrjú ár verið for-maður Leigjendasamtakana.Meira -
Miðflokkurinn opnar kosningaskrifstofu á Sauðárkróki
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 22.11.2024 kl. 15.49Miðflokkurinn opnar kosningaskrifstofu á Mælifelli ,Aðalgötu 7 Sauðarkroki, laugardaginn 23. nóvember kl. 20.00. Allir eru velkomnir.Meira -
Flutti frá Eyjum gosnóttina
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 22.11.2024 kl. 10.02Eyjólfur Ármannsson er oddviti Fólks flokksins í Norðvesturkjördæmi. Eyjólfur er fæddur í Vestmannaeyjum, sonur hjónanna Guðjóns Ármanns Eyjólfssonar frá Vestmannaeyjum og fv. skólastjóra Stýrimannaskólans í Reykjavík og Aniku Jónu Ragnarsdóttur, húsmóður og sjúkraliða. Hann er þriðji í röð fjögurra systkina. Gosnóttina flutti fjölskyldan frá Eyjum til Reykjavíkur þegar hann var þriggja og hálfs og ólst hann þar upp.Meira -
Mynd Óskars Páls, Árnar þagna, sýnd í Króksbíó
feykir.is Skagafjörður, Listir og menning, Lokað efni 22.11.2024 kl. 09.00Óskar Páll Sveinsson ætlar að koma á heimaslóðir og bjóða Skagfirðingum í bíó. Næstkomandi mánudag kl. 20. sýnir hann í Sauðárkróksbíói heimildamyndina Árnar þagna sem fjallar um áhrif sjókvíaeldis á laxi á lífríki og afkomu fjölskyldna í sveitum Íslands og Noregs sem hafa byggt lífsafkomu sína á hlunnindum af sjálfbærum stangveiðum í margar kynslóðir.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.