Marokkóskur lambapottréttur og Súkkulaði-ávaxta-rjómi Birtu
Matgæðingar vikunnar í 14. tbl. Feykis árið 2016 voru þau María Ösp Ómarsdóttir og Jónas Þorvaldsson á Skagaströnd. Þau buðu upp á girnilegar uppskriftir af Marokkóskum lambapottrétti og Nan-brauði í aðalrétt og svokallaðan Súkkulaði-ávaxta-rjóma Birtu í eftirrétt.
Aðalréttur
Marokkóskur lambapottréttur og Nan-brauð fyrir 4-5
1½ msk smjör og 1½ msk ólívuolía blandað saman
2 laukar, skornir í litla bita
1-2 tsk túrmerik
1 tsk engifer
2 tsk kanill
1 kg lambakjöt (t.d. úrbeinað læri skorið í munnbita)
250 g mjúkar steinlausar döðlur, skornar í litla bita
1 msk hunang
salt og pipar
hnetur og fersk steinselja eftir smekk
Aðferð:
Smjörið og olían er hitað saman í stórum potti. Laukurinn svo settur út í og brúnaður. Næst er túrmerik, engifer og kanil hrært saman við. Þegar þetta hefur blandast vel er kjötið sett í pottinn og allt hrært saman, svo er vatn sett í út í þannig að það fljóti aðeins yfir kjötið. Suðan er látin koma upp og þá er lækkað undir og látið malla í einn og hálfan klukkutíma. (Tilvalið að henda í Nan-deig á meðan rétturinn mallar). Hunanginu og döðlunum er bætt í pottinn eftir einn og hálfan tíma og allt látið malla í hálftíma í viðbót. Þá mælum við með því að pipra vel og salta eftir smekk, við notum piparinn óspart á okkar heimili og þolir þessi réttur vel af honum. (Tilvalið að steikja Nan-brauðið á meðan rétturinn klárar að malla).
Það er mjög gott að rista nokkrar hnetur eða möndlur á pönnu og merja svo yfir réttinn þegar hann er kominn á diskinn og einnig smá ferska steinselju.
Borið fram með Nan-brauði, góðu fersku salati og couscous. Ef þið viljið bæta smá sætu og sterku við þá er um að gera að hafa slettu af sterku mango chutney á disknum.
Meðlæti
Nan-brauð, 6-8 brauð
6 dl hveiti
2 tsk lyftiduft
1 tsk salt
2 dl hrein eða grísk jógúrt
2 tsk ólívuolía
3-4 dl volgt vatn
hvítlaukssmjör og gróft salt eftir smekk
Aðferð:
Þurrefni eru hrærð saman í skál (hrærivél). Jógúrti, olíu og einum desilítra af vatni er blandað við og hrært áfram. Vatni bætt við þar til deigið helst saman án þess að það verði þó of blautt. Látið hrærivélina hnoða deigið í 2-3 mínútur. Skiptið deiginu svo í 6-8 jafnar kúlur og látið bíða undir hreinum klút þar til þið steikið brauðið.
Hitið pönnu á hæsta hita, fletjið kúlurnar út í þunnar kökur og skellið á pönnuna. Gott er að fylgjast vel með á meðan brauðið er steikt og passa að það brenni ekki á heitri pönnunni. Snúið við og steikið hina hliðina. Gott er að pensla brauðið með hvítlaukssmjöri og strá grófu salti yfir á meðan það er enn heitt. Best að bera það fram strax en einnig hægt að setja það á disk og hreinan klút yfir til að halda því heitu og mjúku.
Eftirréttur
Súkkulaði-ávaxta-rjómi Birtu
Bökuð súkkulaðikaka eftir smekk (t.d. brownie eða skúffukaka)
rjómi, þeyttur
jarðaberjagrautur
ber að eigin vali og heit súkkulaðisósa
Aðferð:
Bakið súkkulaðiköku, tilvalið er að nýta afganga (ef einhvern tímann er afgangur af köku), notið skeið og skóflið henni í eldfast mót. Rjómi er þeyttur og jarðaberjagraut hrært varlega saman við hann (eftir smekk). Skellið rjómanum svo í mótið með kökunni og hrærið varlega en vel saman. Ber eru svo sett ofan á og gott er að hafa heita súkkulaðisósu með.
Verði ykkur að góðu!
Fleiri fréttir
-
Hressandi að skella sér í sjósund
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 17.15Ingibjörg Davíðsdóttir er oddviti Miðflokksins frá bænum Arnbjargarlæk í Þverárhlíð í Borgarbyggð, fædd á Akranesi 1970 og á einnig ættir að rekja til Breiðafjarðareyja, Reykhóla og Múla á Barðaströnd. Ingibjörg á eina uppkomna dóttur og á heima í sveitinni og Garðabæ. Hún er sendiherra og stjórnarformaður Íslenska fæðuklasans. Hefur starfað í utanríkisþjónustunni í ríflega 25 ár, meðal annars sem sendiherra Íslands í Noregi, ráðgjafi forsætisráðherra í utanríkismálum ásamt því að starfa í sendiskrifstofum Íslands í Genf, Vínarborg og London. Ingibjörg tók sér leyfi frá utanríkisþjónustunni í fyrra og stofnaði Íslenska fæðuklasann.Meira -
Það sem maður veitir athygli vex og dafnar
feykir.is Skagafjörður, Listir og menning, Lokað efni 23.11.2024 kl. 12.09Það er margt í mörgu, sagði einhver einhverntímann, og hitti þar mögulega naglann rækilega á höfuðið. Greinarskrifari rak nýlega augun í viðburði í sveitinni sem komu honum svolítið spánskt fyrir sjónir; Kakóstund og 9D BreathWork. Það er Þóra Kristín Þórarinsdóttir frá Frostastöðum í Blönduhlíðinni sem stendur að baki þessum viðburðum. Það var ekkert vit í öðru en að kynna sér málið aðeins og senda Þóru nokkrar spurningar og rétt að byrja á því að spyrja hvað hún sé að gera þessa dagana.Meira -
Ætlaði að verða prestur
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 11.37Eldur Smári er oddviti Lýðræðisflokksins í Norðvesturkjördæmi og er fæddur á Sauðárkróki í nóvember 1979. Foreldrar hans eru Edda Lilja Hjalta-dóttir, frá Keflavík og Kristinn Jónas Björnsson frá Nýjabæ á Hofsósi. Hann er giftur Stuart Grahame Deville sem fæddur er í Lower Hutt á Nýja-Sjálandi. Þeir giftu sig í Ráðhúsinu í Kaupmannahöfn 2019. Þeir eru barnslausir en miklir dýravinir.Meira -
Afmælisveisla Hvatar er einmitt í dag!
feykir.is Austur-Húnavatnssýsla, Mannlíf, Lokað efni 23.11.2024 kl. 09.45Félagar í Ungmennafélaginu Hvöt á Blönduósi fagna í dag stórafmæli félagsins en í dag eru nákvæmlega 100 ár og tveir dagar frá stofnun þess árið 1924. Af þessu tilefni verður afmælishátíð í Íþróttamiðstöðinni á Blönduósi og hefst dagskráin kl. 13:00 og verður margt til gamans gert.Meira -
Eflum ferðaþjónustu í Norðvesturkjördæmi | Heiðdís Rós Eyjólfsdóttir skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 23.11.2024 kl. 09.45Ferðaþjónustan hefur verið ein af leiðandi ástæðum fyrir vaxtaþrótti íslensks samfélags undanfarin ár og eftirspurn eftir íslenskri ferðaþjónustu hefur vaxið af miklum krafti þótt jarðhræringarnar á Reykjanesskaga hafi leitt til ákveðinnar hnignunar. Þrátt fyrir allt hefur fjöldi erlendra ferðamanna á fyrstu níu mánuðum ársins verið lítillega yfir fjölda síðasta árs en fjöldi gistinátta hefur hins vegar dregist saman. Eins og kemur fram í þjóðhagsspá Hagstofunnar í nóvember er búist við því að fjöldi erlendra ferðamanna haldist stöðugur á næsta ári í 2,3 milljónum.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.