Grafið ær-fille er gott að eiga um jólin
„Um jólin er gaman að bjóða upp á eitthvað sem er alla jafna ekki á boðstólum, brjóta upp hið daglega mynstur í mat og drykk, gott dæmi er maltið og appelsínið sem við blöndum saman um jólin en færri gera það í annan tíma þó svo hvort tveggja sé auðvitað til staðar allt árið um kring. Það er t.d. alveg gráupplagt að versla sér góðan slatta af ær-fille (hryggvöðva) og grafa það. Þá er ekki átt við í kartöflugarðinum, heldur grafa það í salti, kryddum og í rauninni hverju því sem hugurinn og ímyndunaraflið býður hverjum og einum. Eftirfarandi er gott dæmi um grafið ær-fille sem þykir nokkuð gott á okkar heimili og er afar einfalt í framkvæmd,“ sögðu Vignir Kjartansson og Áslaug Helga Jóhannsdóttir á Sauðárkróki sem voru matgæðingar vikunnar í 48. tbl. Feykis árið 2016.
Grafið ær-fille
ær-fille
gróft salt
Kryddblanda:
1 hluti þriðja kryddið
1 hluti rósmarín
1 hluti estragon
1 hluti sinnepsfræ
1 hluti sítrónupipar
1 hluti basil
1 hluti oregano
2 hlutar sykur
3 hlutar dill
1½ hluti heill rósapipar
Sósa:
sýrður rjómi
majónes
hunang
dill
Dijon sinnep
smá svartur pipar
Meðlæti:
Ristað brauð eða snittubrauð penslað með basilolíu
gul melóna
Aðferð:
Kafsaltað með grófu salti í eldfast mót t.d. Plastfilma sett yfir og geymt í ísskáp í tvo tíma.
Svo er útbúin kryddblanda, ekki gleyma að grípa með sér eins og einn jólabjór úr ísskápnum og dreypa á, þetta er tveggja tíma bið! Best að halda áfram með kryddblönduna. Blandið kryddunum saman af kostgæfni.
Að tveimur tímum liðnum er ketið tekið úr ísskápnum, allt saltið skafið af, vel og vandlega, ekkert hálfkák. Þarna er við hæfi að kæla sig niður með einum litlum jólabjór, en bara litlu, enga frekju. Nú er komið að því að maka kjötið allt saman með kryddblöndunni, það þarf að passa að allt kjöt sé undir kryddi svo þetta fari allt fallega. Það er best að pakka svo hverjum bita í plastfilmu, og svona er þetta geymt í ísskáp í tvo sólarhringa.
Að tveimur sólarhringum liðnum er ketið tekið úr ísskápnum, það er algjörlega frjálst val um hvað ber að gera næst, það má skafa allt kryddið af, eða bara leyfa því að vera. Því næst er ketið fryst. Nú er ekki úr vegi að fá sér einn þeldökkan jólabjór af stærstu tegund og ekki skemmir fyrir að hafa með hið dásamlega jóla-ákavíti sem danskurinn hefur gefið okkur af miskunn sinni og náð, og er að mínu mati eitt það skásta sem þeir dönsku hafa lagt til veraldarinnar.
Best er að skera ketið hálffrosið, þá er auðveldara að ná þunnum sneiðum. Með þessu er afbragð að hafa ristað brauð, og það má hræra saman í sósuna hér að ofan og eða hafa með þessu sýrðan rjóma og hindberjasultu. Svo er líka ágætt að hafa með þessa gula melónu. Ef á að hafa þetta alveg rosalega fínt er alveg upplagt að skera snittubrauð, pensla það með fínni olíu, basílolíu t.d. og skutla brauðinu í ofninn eða á grillið í smástund, setja svo fínskornar sneiðarnar ofan á brauðið, þunna sneið af gulri melónu og svo passlegt magn af sósu.
Verði ykkur að góðu.
Fleiri fréttir
-
"Finnst mjög gaman að skapa fyrir barnabörnin"
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni, Handverk 26.12.2024 kl. 13.58Helga Þorbjörg Hjálmarsdóttir fædd og uppalinn á Tunguhálsi ll í Tungusveit býr með Guðmundi Guðmundssyni frá Fossum í Svartárdal á Lækjarbrekku á Steinsstöðum. Þau byggðu sér hús þar árin 1994-1995 og ólu upp sín fjögur börn sem öll eru flogin úr hreiðrinu, eiga sjö barnabörn og eitt á leiðinni. Helga starfar sem stuðningsfulltrúi í Varmahlíðarskóla og við heimaþjónustu í Skagafirði.Meira -
Aðsend Jólasaga - „Anna litla og tuskudúkka“ | Rúnar Kristjánsson
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 26.12.2024 kl. 13.00Anna litla sat úti í einu horninu á litlu lóðinni kringum húsið og lék sér með tuskudúkkuna sína. Það var sólskin og blíða og hún var þarna ein að dunda sér. Henni fannst svo mikils virði að fá að vera í friði með sín hugðarefni. Það var svo sjaldan hægt að fá frið, því systkinin voru mörg og oft svo hávaðasamt á heimilinu. Eldri bræður hennar þóttust orðnir heilmiklir karlar og litu á hana sem smábarn og stóra systir gat stundum verið svo mikil skessa við hana. Önnu litlu fannst hún oft vera ein í heiminum. Það var eins og enginn skildi hana eða vildi gefa sér tíma til að sinna henni.Meira -
Héldu glöð, ánægð og hrærð út í kvöldhúmið
feykir.is Skagafjörður, Lokað efni 25.12.2024 kl. 10.00Kirkjukór Glaumbæjarprestakalls lagði land undir fót í aðdraganda aðventu í byrjun nóvember og hélt til Þýskalands til að syngja á menningarnótt í Rheinsberg þar í landi. Ferðin var farin ári á eftir áætlun og Feykir hafði samband við Gunnar Rögnvaldsson á Löngumýri og bað hann að segja okkur ferðasöguna.Meira -
Fyrst New York Times og nú Feykir
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 25.12.2024 kl. 09.00Ragnheiður Sjöfn Jóhannsdóttir er fædd á Landsspítalanum að morgni 27. júlí 1955 og flaug sína fyrstu flugferð tíu daga gömul til Sauðárkróks, með kjörforeldrum sínum, en hún er kjördóttir þeirra Jóhanns Sólbergs Þorsteinssonar mjólkursamlagsstjóra og Áslaugar Sigfúsdóttur og hefur verið Sauðkrækja síðan. Ragnheiður segist þurfa að búa á landsbyggðinni og bjó lengi í Borgarnesi og svo Mosfellsbæ áður en hún flutti á Hvammstanga þar sem hún býr í dag með manni sínum Guðmundi Hauki Sigurðssyni.Meira -
Gleðileg jól
feykir.is Skagafjörður, Austur-Húnavatnssýsla, Vestur-Húnavatnssýsla 24.12.2024 kl. 18.00Steikin inn í ofninum og spennan stöðugt vex, allir bíða eftir því að klukkan slái sex, eins og segir í textanum, nú þarf ekki lengur að bíða þess og óskar Feykir lesendum og landsmönnum öllum gleðilegra jóla og farsældar á komandi ári með kærri þökk fyrir það liðna.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.