Tindastólsmenn lyftu bikarnum eftir góðan sigur á Einherja
Lið Tindastóls gulltryggði efsta sætið í 3. deildinni í dag þegar strákarnir unnu öruggan sigur á liði Einherja frá Vopnafirði. Stólarnir byrjuðu leikinn af krafti og voru komnir yfir eftir rétt rúma mínútu. Eftir það var aldrei spurning hvorum megin sigurinn lenti og staðan í hálfleik 3-0, sem urðu reyndar lokatölur leiksins. Að leik loknum var Tindastólsliðinu afhentur bikar.
Það var enn og aftur fallegur sumardagur á Sauðárkróksvelli í dag og leikmenn léku ágæta knattspyrnu í glampandi sól og smá norðan andvara. Sem fyrr segir fengu Stólarnir óskabyrjun og voru komnir yfir á 2. mínútu en þá höfðu leikmenn Einherja ekki enn komið við boltann. Eftir laglega sókn féll boltinn fyrir Kenneth Hogg sem dúndraði á markið og Oskars Dargis réði ekki við skotið. Tindastólsmenn léku á alls oddi eftir þetta. Enn á ný sundurspiluðu þeir vörn gestanna á 11. mínútu þegar Ragnar Gunnarsson komst upp að endamörkum og gaf fyrir, vörn Einherja skóflaði boltanum út fyrir teig en þar kom Stephen Walmsley á fullri ferð og hamraði boltann í markið.
Eftir þetta buðu Stólarnir upp á skotveislu og negldu hverju skotinu af öðru af löngu færi á mark gestanna. Sérstaklega var Ragnar iðinn við kolann og hefur ekki svona skotglaður leikmaður skeiðað um Sauðárkróksvöll í treyju Tindastóls síðan stórskyttan Guðbrandur Guðbrandsson, núverandi vallarþulur, var upp á sitt al besta á síðustu öld. Ekki gekk þó að koma boltanum í markið fyrr en Konráð Sigurðsson tók aukaspyrnu utan af vinstri kanti. Bæði Fannar og Bjarki reyndu að skalla en náðu ekki til boltans sem endaði í bláhorninu. Þetta var á 33. mínútu og heldur róaðist leikurinn eftir þetta og 3-0 í hléi.
Stólarnir voru áfram mun sterkari aðilinn í síðari hálfleik og hefðu getað bætt við mörkum en gestirnir voru einbeittari í varnarleiknum og í raun fátt um fína drætti í hálfleiknum. Lið Einherja fékk einn til tvo sénsa á að laga stöðuna en í þau skipti sem vörn Tindastóls gaf færi á sér þá gerði Brenton Muhammad vel í markinu og hélt enn einu sinni hreinu, Eins og oftast áður í sumar hélt hann sínum mönnum vakandi í vörninni með góðum talanda og tilsögn.
Tindastólsmenn fögnuðu innilega í leikslok og fengu verðlaunapeninga fyrir sigurinn í 3. deild og lyftu meistarabikarnum og að sjálfsögðu með tilheyrandi. Eftir að hafa tapað fyrsta leiknum í deildinni í sumar hefur liðið nú unnið 15 leiki í röð og enn eru tvær umferðir eftir. Það er örugglega enginn að gæla við að taka það rólega?
Feykir óskar Tindastólsmönnum til hamingju með titilinn. Áfram Tindastóll!
Fleiri fréttir
-
Niðurgreiðum raforku til grænmetisræktar | Eyjólfur Ármannsson skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 27.11.2024 kl. 13.17Ísland er eyja í norður Atlantshafi. Sú staðsetning gerir það að verkum að þegar kemur að grænmeti þá höfum við tvo valkosti í boði. Við getum annaðhvort flutt það inn með skipum eða flugi, og borgað mikla álagningu fyrir vöru sem er ekki fersk, eða nýtt okkar grænu orku og hreina vatn til að rækta fyrsta flokks grænmeti á Íslandi.Meira -
Nýtt upphaf – í þjónustu við þjóðina | Arna Lára Jónsdóttir skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 27.11.2024 kl. 11.54Við í Samfylkingunni óskum eftir þínum stuðningi til að leiða breytingar sem nauðsynlegar eru fyrir Ísland. Við höfum átt í innihaldsríku samtali við þjóðina síðastliðin tvö ár og því ætlum við að halda áfram. Það að vera í þjónustu við þjóðina þýðir að hlusta og rækta samband við fólkið í landinu. Það höfum við gert og ætlum að gera áfram. Þetta samtal er grunnurinn að stefnu Samfylkingarinnar fyrir þessar kosningar sem birtist í Planinu, þremur útfærðum tillögum í efnahagsmálum, velferðarmálum og atvinnu- og innviðamálum.Meira -
Baráttusigur Stólastúlkna í Hveragerði
feykir.is Skagafjörður, Íþróttir, Lokað efni 27.11.2024 kl. 09.10Kvennalið Tindastóls í Bónus deildinni tók þátt í enn einum spennuleiknum í gærkvöldi þegar liðið sótti Hamar/Þór heim í Hveragerði. Eftir leik sem lengstum var hnífjafn, liðin skiptust 13 sinnum á um að hafa forystuna og 14 sinnum var allt jafnt, þá voru það gestirnir sem reyndust grimmari á lokakaflanum. Þær voru níu stigum undir þegar fimm mínútur voru til leiksloka en snéru taflinu við og unnu leikinn 103-105.Meira -
Jólatónleikar Tónlistarskóla Austur-Húnvetninga
feykir.is Austur-Húnavatnssýsla, Listir og menning, Lokað efni 26.11.2024 kl. 16.07Tónlistarskóli Austur-Húnvetninga heldur sína árlegu jólatónleika í desember. Um er að ræða þrenna tónleika sem fara fram í Blönduóskirkju og Hólaneskirkju.Meira -
Sungið af hjartans lyst
feykir.is Skagafjörður, Listir og menning, Lokað efni 26.11.2024 kl. 12.06Senn kemur út bókin Sungið af hjartans lyst en þar skráir Sölvi Sveinsson sögu Friðbjörns G. Jónssonar söngvara. Það er Sögufélag Skagfirðinga sem gefur bókina út. Feykir lagði nokkrar spurningar fyrir Sölva í tilefni af útgáfu bókarinnar og byrjaði að biðja hann um að segja deili á viðfangsefninu.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.