Stólarnir sigldu með himinskautum á heimaslóðum
Skagafjörðurinn er orðinn frægur fyrir að brydda upp á geggjuðustu körfuboltaveislum sem völ er á og leikurinn í gærkvöldi var engin undantekning. Veislan hófst á planinu sunnan við Síkið þar sem öllu var tjaldað til – þar með talið veislutjaldi – og stuðningsmenn voru farnir að streyma að þremur tímum fyrir leik og hituðu sig upp með lifandi tónlist, hömmurum og svaladrykkjum í 12 stiga hita og Krókslogni. Húsið fylltist síðan fljótt og var nánast fullt þegar leikmenn mættu í Síkið en talið er að um 1500 manns hafi verið á leiknum. Algjör snilld!
Stólarnir fóru vel af stað en enginn þó betur en Taiwo Badmus sem var á eldi. Stólarnir náðu undirtökunum, komust í 9-2, en hlutirnir breytast oft hratt í körfunni og Keflvíkingar voru snöggir að brúa bilið. Þegar átta mínútur voru liðnar var staðan 21-20 en fimm stig frá Pétri og tvö víti frá Tai sáu til þess að Stólarnir höfðu ágætt forskot eftir fyrsta leikhlutann. Staðan 28-21. Lið Tindastóls hélt frumkvæðinu fyrst um sinn í öðrum leikhluta en Keflvíkingar náðu að draga úr hraða leiksins og Stólarnir duttu niður um tvo þrjá gíra og það var ekki góðs viti. Gestirnir jöfnuðu metin, 34-34, um miðjan leikhlutann en komust þó ekki yfir fyrr en David Okeke lagði boltann í körfuna þegar tæp mínúta var til hálfleiks. Arnar svaraði með silkiþristi og kom Stólunum í 43-42 en Igor Maric svaraði að bragði og gestirnir því með tveggja stiga forystu í hálfleik. Staðan 43-45.
Þriðji leikhluti var síðan lyginni líkastur hjá liði Tindastóls þar sem vörnin small og allir í takti, hvort sem var í vörn eða sókn. Keflvíkingar voru ráðvilltir og náðu ekkert að hægja á heimamönnum sem unnu leikhlutann 37-14 og höfðu því 21 stigs forystu fyrir lokaátökin. Milka gerði fyrstu sex stigin í fjórða leikhluta en heimamenn voru snöggir að rétta kúrsinn og næstu mínútur leiksins náðu gestirnir stuttum áhlaupum sem Stólarnir svöruðu fljótt fyrir. Á tæplega tveggja mínútna kafla skömmu fyrir leikslok náðu heimamenn 12-0 kafla áður en handklæðinu var endanlega kastað inn á og leikurinn þá í raun löngu afgreiddur af hálfu heimamanna.
Þau voru mörg glæsitilþrifin í þessum leik en pjakkarnir hans Pavels spiluðu þrjá leikhluta af fjórum nánast óaðfinnanlega og var þjálfarinn bersýnilega hinn ánægðasti í leikslok. Verkefninu er þó ekki lokið og menn verða að vera snöggir niður á jörðina því næsti leikur er í Keflavík nk, miðvikudag. Það má reikna með að heimamenn vilji hefna fyrir ófarirnar í gærkvöldi og koma sér inn í einvígið á ný.
Taiwo Badmus var magnaður í leiknum en hann gerði 25 stig, tók sjö fráköst og fiskaði ellefu villur á gestina. Þá var Arnar í banastuði en hann gerði 22 stig og var með sex þrista í sjö skotum. Keyshawn gerði 21 stig, Pétur 15 og Siggi 10 en allt lið Tindastóls var flott í kvöld og örugglega ekki margir leikir í Síkinu þar sem Stólarnir hafa sýnt jafn góðan leik. Enginn leikmaður Keflvíkinga gerði meira en tuttugu stig en Milka var stigahæstur með 17 stig en hann tók aðeins þrjú fráköst að þessu sinni.
Takk fyrir skemmtunina – áfram Tindastóll!
Fleiri fréttir
-
Hressandi að skella sér í sjósund
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 17.15Ingibjörg Davíðsdóttir er oddviti Miðflokksins frá bænum Arnbjargarlæk í Þverárhlíð í Borgarbyggð, fædd á Akranesi 1970 og á einnig ættir að rekja til Breiðafjarðareyja, Reykhóla og Múla á Barðaströnd. Ingibjörg á eina uppkomna dóttur og á heima í sveitinni og Garðabæ. Hún er sendiherra og stjórnarformaður Íslenska fæðuklasans. Hefur starfað í utanríkisþjónustunni í ríflega 25 ár, meðal annars sem sendiherra Íslands í Noregi, ráðgjafi forsætisráðherra í utanríkismálum ásamt því að starfa í sendiskrifstofum Íslands í Genf, Vínarborg og London. Ingibjörg tók sér leyfi frá utanríkisþjónustunni í fyrra og stofnaði Íslenska fæðuklasann.Meira -
Það sem maður veitir athygli vex og dafnar
feykir.is Skagafjörður, Listir og menning, Lokað efni 23.11.2024 kl. 12.09Það er margt í mörgu, sagði einhver einhverntímann, og hitti þar mögulega naglann rækilega á höfuðið. Greinarskrifari rak nýlega augun í viðburði í sveitinni sem komu honum svolítið spánskt fyrir sjónir; Kakóstund og 9D BreathWork. Það er Þóra Kristín Þórarinsdóttir frá Frostastöðum í Blönduhlíðinni sem stendur að baki þessum viðburðum. Það var ekkert vit í öðru en að kynna sér málið aðeins og senda Þóru nokkrar spurningar og rétt að byrja á því að spyrja hvað hún sé að gera þessa dagana.Meira -
Ætlaði að verða prestur
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 11.37Eldur Smári er oddviti Lýðræðisflokksins í Norðvesturkjördæmi og er fæddur á Sauðárkróki í nóvember 1979. Foreldrar hans eru Edda Lilja Hjalta-dóttir, frá Keflavík og Kristinn Jónas Björnsson frá Nýjabæ á Hofsósi. Hann er giftur Stuart Grahame Deville sem fæddur er í Lower Hutt á Nýja-Sjálandi. Þeir giftu sig í Ráðhúsinu í Kaupmannahöfn 2019. Þeir eru barnslausir en miklir dýravinir.Meira -
Afmælisveisla Hvatar er einmitt í dag!
feykir.is Austur-Húnavatnssýsla, Mannlíf, Lokað efni 23.11.2024 kl. 09.45Félagar í Ungmennafélaginu Hvöt á Blönduósi fagna í dag stórafmæli félagsins en í dag eru nákvæmlega 100 ár og tveir dagar frá stofnun þess árið 1924. Af þessu tilefni verður afmælishátíð í Íþróttamiðstöðinni á Blönduósi og hefst dagskráin kl. 13:00 og verður margt til gamans gert.Meira -
Eflum ferðaþjónustu í Norðvesturkjördæmi | Heiðdís Rós Eyjólfsdóttir skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 23.11.2024 kl. 09.45Ferðaþjónustan hefur verið ein af leiðandi ástæðum fyrir vaxtaþrótti íslensks samfélags undanfarin ár og eftirspurn eftir íslenskri ferðaþjónustu hefur vaxið af miklum krafti þótt jarðhræringarnar á Reykjanesskaga hafi leitt til ákveðinnar hnignunar. Þrátt fyrir allt hefur fjöldi erlendra ferðamanna á fyrstu níu mánuðum ársins verið lítillega yfir fjölda síðasta árs en fjöldi gistinátta hefur hins vegar dregist saman. Eins og kemur fram í þjóðhagsspá Hagstofunnar í nóvember er búist við því að fjöldi erlendra ferðamanna haldist stöðugur á næsta ári í 2,3 milljónum.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.