Slakur varnarleikur varð Stólastúlkum að falli gegn Fylki
Donni þjálfari var ekki par sáttur við sínar stelpur í dag eftir skell í Árbænum þegar Stólastúlkur sóttu Fylki heim. Árbæjarliðið sat á botni deildarinnar fyrir leikinn, höfðu ekki unnið leik síðan í maí, en eftir jafnan fyrri hálfleik tók heimaliðið völdin og vann sanngjarnan 4-1 sigur.
Þetta var fyrsti leikur Tindastóls án Gwen Mummert sem hefur verið frábær í vörninni bæði í fyrrasumar og í sumar. Maria Del Mar sem kom í hennar stað sat á bekknum í dag og kom ekki við sögu í leiknum. Ljóst er að lið Tindastóls þarf að finna lausnir á varnarleiknum í kjölfarið á brotthvarfi Gwen en varnarleikur liðsins var ekki í lagi í dag.
Stólastúlkur hófu leikinn vel og náðu forystunni strax á 10. mínútu. Þá átti Elísa Bríet góða sendingu á Jordyn Rhodes sem hafði nógan tíma inni á vítateig Fylkis og skoraði gott mark. Lið Tindastóls hefði getað bætt við marki í framhaldinu en það voru heimastúlkur sem jöfnuðu leikinn á 38. mínútu. Abigail Boyan fékk þá boltann og sótti að marki Tindastóls, vörnin bakkaði undan henni án þess að setja á hana pressu og hún fékk nægan tíma til að smella óverjandi skoti á mark Monicu.
Lið Fylkis hóf síðari hálfleik af krafti og eftir nokkrar hornspyrnur þá fékk Helga Guðrún Kristinsdóttir boltann ein og óvölduð á fjærstöng og skallaði boltann glæsilega í markið. Þrátt fyrir góða baráttu tókst Stólastúlkum ekki að skapa sér almennileg færi en alltof oft sköpuðu heimastúlkur sér álitlegar stöður og upp úr einni slíkri kom þriðja mark þeirra á 70. mínútu. Þá skoraði Guðrún Karítas Sigurðardóttir mark eftir fyrirgjöf af hægri kanti. Gestirnir bættu í sóknina og hefðu getað minnkað muninn en enn var háspenna lífshætta í varnarleiknum. Á 88. mínútu kórónaði Kolfinna Baldursdóttir góðan leik Fylkis þegar hún komst á auðan sjó inni á vítateig Tindastóls og renndi boltanum framhjá Monicu í markinu.
„Fyrri hálfleikurinn góður, seinni hálfleikurinn ömurlegur, það er ekkert flóknara en það,“ sagði Donni þjálfari við Vísi að leik loknum. Aðspurður um hvort liðið hefði saknað Gwen sagði hann: „Við söknuðum að sjálfsögðu Gwendolyn, eðlilega. Ég held að öll lið hefðu saknað Gwendolyn sama á móti hverjum og hvenær sem er. Við skrifum þetta samt ekkert á einn leikmann, bara heildarframmistaða liðsins var ömurleg í seinni hálfleik og það er eitthvað sem við þurfum að gera betur gegn töluvert sterkara liði í næsta leik,“ en nú strax á miðvikudaginn koma meistarar Vals í heimsókn á Krókinn. Lið Tindastóls er nú í áttunda sæti deildarinnar með 11 stig en Fylkir og Keflavík eru bæði með níu stig.
Fleiri fréttir
-
Allir geta verið stoltir af liði Tindastóls, segir Donni
feykir.is Skagafjörður, Íþróttir 07.09.2024 kl. 23.57Feykir spurði Donna, þjálfari Stólastúlkna, hvort hann væri stoltur af liðinu sínu eftir mikilvægan sigur á Fylki. „Ég er í skýjunum með frammistöðuna í dag þegar allt var undir. Stelpurnar stóðust pressuna alveg eins og ég vissi að þær gætu gert. Þær gerðu það sama í fyrra og í raun hefðu mörkin í dag getað verið jafn mörg og þá,“ sagði hann og vísaði í 7-3 sigur á ÍBV í fyrra við svipaðar kringumstæður.Meira -
Stólastúlkur áfram á meðal þeirra Bestu!
feykir.is Skagafjörður, Íþróttir 07.09.2024 kl. 22.05Mikilvægasti leikur sumarsins var spilaður í dag á Sauðárkróksvelli þar sem Tindastóll og Fylkir mættust í nokkurs konar úrslitaleik um sæti í Bestu deild kvenna. Með sigri Fylkis hefðu þær jafnað Stólastúlkur að stigum og átt botnlið Keflavíkur í síðustu umferðinni í úrslitakeppni neðri liða á meðan lið Tindastóls hefði sótt Stjörnuliðið heim. Frá fyrstu mínútu réðu hins vegar heimastúlkur ferðinni, spiluðu í raun hinn fullkomna leik og unnu lið gestanna 3-0 – og tryggðu þar með sætið í Bestu deildinni. Til hamingju Stólastúlkur!Meira -
Fjölmennt í Síkinu þegar Stólarnir lögðu Þórsara
feykir.is Skagafjörður, Íþróttir 07.09.2024 kl. 19.28Fyrsti æfingaleikur karlaliðs Tindastóls í körfubolta fór fram í gærkvöldi en það voru Þórsarar sem þræddu þjóðveginn úr Þorlákshöfn alla leið í Síkið eina og sanna. Ekki er nema um vika síðan allir leikmenn Stólanna komu fyrst saman til æfinga en samkvæmt Körfunni.is þá leiddu heimamenn frá fimmtu mínútu og allt til leiksloka. Lokatölur 95-83.Meira -
„Að skrifa ljóð, texta og rapp er eins og sálfræðimeðferð fyrir sjálfan mig“ / INGI SIGÞÓR
feykir.is Skagafjörður, Tón-Lystin 07.09.2024 kl. 11.31Þá er það Ingi Sigþór Gunnarsson sem teikar Tón-lystar-vagninn að þessu sinni. Það er reyndar bannað að teika og því ekki til eftirbreytni. Ingi Sigþór býr í Fellstúninu á Króknum, er árgangur 2000 sem er auðvitað mjög þægilegt ef menn þurfa að gefa upp aldur – svo lengi sem menn vita hvað ár er. „Ég er alfarið alinn upp á Króknum og er sonur Elvu Bjarkar Guðmundsdóttur og Gunnars Braga Sveinssonar,“ segir Ingi. „Ég kann eitthvað smá á gítar en annars treysti ég mest á röddina sem og kunn-áttu mína á hljóðvinnsluforrit.“Meira -
Tóku fyrri sláttinn með 3ja daga áhlaupi
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 07.09.2024 kl. 09.00Rúnar Aðalbjörn Pétursson, býr í Hólabæ í Langadal ásamt Auði Ingimundardóttur sambýliskonu og börnunum þeirra Pétri Inga og Lilju Björgu. Rúnar er starfandi bóndi með búfræðimenntun og sveinspróf í húsasmíði. Þau búa á blönduðu búi með tæplega 40 mjólkandi kýr og 400 vetrarfóðraðar kindur. Ásamt því vinnur Auður sem ráðunautur hjá Ráðgjafamiðstöð landbúnaðarins.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.