Miðar á leik Vals og Tindastóls tættust út
„Miðarnir hreinlega tættust út – bæði miðar gestaliðsins og okkar miðar. Þessi rimma er þannig að allir og ömmur þeirra vilja vera á svæðinu,“ sagði Valsarinn Grímur Atlason þegar Feykir spurði hvernig hefði gengið að selja miða á leikinn sem hefst í Origo-höllinni kl. 19:15 í kvöld. Raunar hafði Feykir hlerað að miðar Stólanna hefðu klárast á tveimur mínútum og því betra að gleyma sér ekki við uppvaskið eða önnur nauðsynjaverk þegar miðarnir í úrslitaeinvíginu fara í sölu.
Grímur, sem heldur utan um þessa viðburði hjá Val, hefur ekki í öllum tilfellum glatt stuðningsmenn Stólanna þegar þeir hafa mætt vígreifir og glaðbeittir á Hlíðarenda og því kannski rétt að spyrja hvort það sé ekki gaman að fá stuðningsfólk Stólanna í Origo-höllina. „Langflest stuðningsfólk Tindastóls er til fyrirmyndar þegar það mætir til okkar,“ segir Grímur. „Taka til eftir sig í stúkunum og sýna starfsfólki og sjálfboðaliðum kurteisi. Það eru alltaf einhver læti og einhverjir einstaklingar fara fram úr sér en það er algjör minnihluti.“
Hvernig ertu stemmdur þegar þessi úrslitaeinvígi eru í gangi? „Svona rimmur eru spennuþrungnar og lætin í húsinu með þeim hætti að maður getur ekki annað en hrifist með. Ég er gamalreyndur viðburðahaldari og því er ég talsvert í því hlutverki á þessum leikjum í Origo höllinni og því kannski öðruvísi spenntur en þegar ég þarf ekki að hugsa um 1000 smáatriði í tengslum við utanumhald leiksins.
Mættirðu í Síkið á síðasta leik? „Ég fór ekki í Síkið síðast en reynsla mín frá úrslitakeppninni vorið 2022 er sú að Skagfirðingar kunna betur en flestir að búa til stemmingu og viðburð. Það er greinilegt að þeir hafa hlustað vel á mig þegar ég var í sveit í Skagafirði á áttunda áratugnum.“
Hvernig heldurðu að einvígið endi og hver er spáin fyrir kvöldið? „Þetta er algjörlega 50/50 einvígi. Ósk mín er sjálfsögðu að Valur sigri og ég ætla að spá okkur sigri. Vinnum í kvöld, töpum í framlengingu í Síkinu á mánudaginn en tökum oddaleikinn með fimm stigum. Ósk eða spá – það á síðan bara eftir að koma í ljós.“
Hvað heldurðu að ráði úrslitum? „Smáatriði og spennustig. Þegar lið eru komin þetta langt og þekkja hvert annað út og inn er þetta annað hvort stöngin út eða stöngin inn.“
Það er kristaltært að bæði lið vilja sigur í kvöld og megi betra liðið sigra. Ljóst er að í það minnsta þarf fjóra leiki til að útkljá einvígi liðanna og verður fjórði leikurinn í Síkinu á mánudaginn. Útlit er fyrir að Valsmenn verði að setja keðjurnar undir rútuna því stundum snjóar í maí – en það er auðvitað allt annað mál.
Fleiri fréttir
-
Hressandi að skella sér í sjósund
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 17.15Ingibjörg Davíðsdóttir er oddviti Miðflokksins frá bænum Arnbjargarlæk í Þverárhlíð í Borgarbyggð, fædd á Akranesi 1970 og á einnig ættir að rekja til Breiðafjarðareyja, Reykhóla og Múla á Barðaströnd. Ingibjörg á eina uppkomna dóttur og á heima í sveitinni og Garðabæ. Hún er sendiherra og stjórnarformaður Íslenska fæðuklasans. Hefur starfað í utanríkisþjónustunni í ríflega 25 ár, meðal annars sem sendiherra Íslands í Noregi, ráðgjafi forsætisráðherra í utanríkismálum ásamt því að starfa í sendiskrifstofum Íslands í Genf, Vínarborg og London. Ingibjörg tók sér leyfi frá utanríkisþjónustunni í fyrra og stofnaði Íslenska fæðuklasann.Meira -
Það sem maður veitir athygli vex og dafnar
feykir.is Skagafjörður, Listir og menning, Lokað efni 23.11.2024 kl. 12.09Það er margt í mörgu, sagði einhver einhverntímann, og hitti þar mögulega naglann rækilega á höfuðið. Greinarskrifari rak nýlega augun í viðburði í sveitinni sem komu honum svolítið spánskt fyrir sjónir; Kakóstund og 9D BreathWork. Það er Þóra Kristín Þórarinsdóttir frá Frostastöðum í Blönduhlíðinni sem stendur að baki þessum viðburðum. Það var ekkert vit í öðru en að kynna sér málið aðeins og senda Þóru nokkrar spurningar og rétt að byrja á því að spyrja hvað hún sé að gera þessa dagana.Meira -
Ætlaði að verða prestur
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 11.37Eldur Smári er oddviti Lýðræðisflokksins í Norðvesturkjördæmi og er fæddur á Sauðárkróki í nóvember 1979. Foreldrar hans eru Edda Lilja Hjalta-dóttir, frá Keflavík og Kristinn Jónas Björnsson frá Nýjabæ á Hofsósi. Hann er giftur Stuart Grahame Deville sem fæddur er í Lower Hutt á Nýja-Sjálandi. Þeir giftu sig í Ráðhúsinu í Kaupmannahöfn 2019. Þeir eru barnslausir en miklir dýravinir.Meira -
Afmælisveisla Hvatar er einmitt í dag!
feykir.is Austur-Húnavatnssýsla, Mannlíf, Lokað efni 23.11.2024 kl. 09.45Félagar í Ungmennafélaginu Hvöt á Blönduósi fagna í dag stórafmæli félagsins en í dag eru nákvæmlega 100 ár og tveir dagar frá stofnun þess árið 1924. Af þessu tilefni verður afmælishátíð í Íþróttamiðstöðinni á Blönduósi og hefst dagskráin kl. 13:00 og verður margt til gamans gert.Meira -
Eflum ferðaþjónustu í Norðvesturkjördæmi | Heiðdís Rós Eyjólfsdóttir skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 23.11.2024 kl. 09.45Ferðaþjónustan hefur verið ein af leiðandi ástæðum fyrir vaxtaþrótti íslensks samfélags undanfarin ár og eftirspurn eftir íslenskri ferðaþjónustu hefur vaxið af miklum krafti þótt jarðhræringarnar á Reykjanesskaga hafi leitt til ákveðinnar hnignunar. Þrátt fyrir allt hefur fjöldi erlendra ferðamanna á fyrstu níu mánuðum ársins verið lítillega yfir fjölda síðasta árs en fjöldi gistinátta hefur hins vegar dregist saman. Eins og kemur fram í þjóðhagsspá Hagstofunnar í nóvember er búist við því að fjöldi erlendra ferðamanna haldist stöðugur á næsta ári í 2,3 milljónum.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.