Leik lokið eftir 24 mínútur í Víkinni
Hamingjunni var misskipt á heimavelli Víkinga í gær sem oft er kenndur við hamingjuna. Þangað mættu Stólastúlkur í gærkvöldi en fyrstu mínútur leiksins hefði mátt halda að liðið hefði mætt til leiks í vöðlum í vætuna í Víkinni. Eftir sex mínútur voru heimastúlkur komnar í 2-0 og eftir 24 mínútur var staðan 4-0. Vont versnaði ekki mikið í síðari hálfleik þannig að Stólarútan silaðist norður í land með ljótt 5-1 tap á bakinu.
Þetta voru auðvitað ekki úrslitin sem vonast var eftir í næstsíðustu umferð Bestu deildarinnar en lið Tindastóls er nú í bullandi botnbaráttu eftir að hafa ekki náð vopnum sínum eftir að Gwen yfirgaf liðið um mitt sumar. Lengi vel leit reyndar út fyrir að dagurinn yrði algjört þrot fyrir lið Tindastóls því Keflavík, sem hefur vermt annað botnsætanna í allt sumar, var að gjörsigra FH-inga 3-0 í hálfleik og sigur hefði fleytt þeim upp að hlið Tindastóls. Hafnfirðingar komu hins vegar í stuði út í seinni hálfleikinn og tóku öll stigin í Keflavík í 3-4 sigri – takk FH!
Víkingar byrjuðu af krafti og Linda Líf Bouam gerði gott mark á 3. mínútu eftir að hafa sett Elise Ann á skauta. Svo sótti Tindastóll í þrjár mínútur, eða þangað til Víkingsliðið vann boltann, brunaði fram og enn á ný leit vörn Tindastóls illa út, Monica varði skot en boltinn barst á Lindu sem gerði annað mark sitt. Bergdís Sveinsdóttir gerði þriðja markið á 20. mínútu og Freyja Stefánsdóttir það fjórða á 24. mínútu og þá var í raun leik lokið. Gestirnir gáfust þó ekki upp og Jordyn komst í dauðafæri skömmu síðar en skaut framhjá og þá vildu Stólastúlkur fá víti eftir hálftíma leik þegar Elísa Bríet var tekin niður í teignum. Ekkert dæmt í það skiptið og staðan 4-0 í hálfleik.
Shaina Ashouri bætti við fimmta marki Víkings á 50. mínútu en hún fékk þá boltann í sig þegar gestirnir voru að reyna að hreinsa frá marki. Þegar stundarfjórðungur var til leiksloka átti Jordyn skot í samskeytin en eina mark Tindastóls leit loks dagsins ljós á 89. mínútu þegar Stólastúlkur fengu víti. Markamaskínan Jordyn gerði sig klára í að taka spyrnuna en þar sem það blæddi úr henni sendi dómarinn hana út af til aðhlynningar. Elise Ann tók því spyrnuna en markvörður heimastúlkna varði en Elísa Bríet var fyrst á boltann og skilaði honum í markið.
Næsti leikur Tindastóls, og jafnframt sá síðasti í deildinni áður en úrslitakeppnin hefst, verður sunnudaginn 25. ágúst en þá kemur botnlið Keflavíkur í heimsókn á Krókinn. Þá verða allir að mæta á völlinn! Áfram Tindastóll!
Fleiri fréttir
-
Á sterka minningu um boltaleik með langafa sínum
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 21.11.2024 kl. 16.33Ólafur Adolfsson er oddviti Sjálfstæðisflokksins í Norðvestur kjördæmi. Ólafur er í sambandi með Margréti Birgisdóttur lyfjafræðingi og á hann tvö uppkomin börn, tvö barnabörn og tvö stjúpbörn. Ólafur er alinn upp í Ólafsvík og hefur auk þess átt heima um skemmri eða lengri tíma á Akranesi, í Reykjavík og á Sauðárkróki og er í dag með lögheimili á Akranesi. Hann er lyfjafræðingur og lyfsali, á og rekur fjórar lyfjabúðir sem eru staðsettar á Akranesi, í Borgarnesi, í Ólafsvík og í Vesturbæ Reykjavíkur.Meira -
Rætt við Grím Rúnar í tilefni 100 ára afmælishátíðar Hvatar á laugardaginn
feykir.is Austur-Húnavatnssýsla, Listir og menning, Lokað efni 21.11.2024 kl. 14.46Það stendur mikið til á Blönduósi nú á laugardaginn því þá fagnar Ungmennafélagið Hvöt 100 ára afmæli sínu með pompi og prakt. Það er því við hæfi að leggja nokkrar spurningar fyrir formann félagsins en það er Grímur Rúnar Lárusson. Grímur er innfæddur Blönduósingar og býr þar, er löglærður fulltrúi sýslumanns að aðalstarfi en í hjáverkum er hann sveitarstjórnarfulltrúi í Húnabyggð og formaður Umf. Hvatar.Meira -
Rótarýklúbburinn býður til ókeypis jólahlaðborðs í tíunda sinn
feykir.is Skagafjörður, Austur-Húnavatnssýsla, Lokað efni 21.11.2024 kl. 13.55Það styttist í aðventuna og í Skagafirði verða ljós tendruð á jólatrénu á Kirkjutorgi laugardaginn 30. nóvember. Sama dag standa Rótarýfélagar fyrir jólahlaðborði í íþróttahúsinu en þangað er öllum boðið og borða saman hangikjöt eða hamborgarhrygg og annað sem nauðsynlegt er. „Okkur Rótarýfélögum finnst þetta afskaplega gefandi, skemmtilegt og mikilvægt verkefni þar sem við sýnum í verki að við viljum láta gott af okkur leiða fyrir samfélagið,“ segir Ómar Bragi Stefánsson, forseti Rótarýklúbbs Sauðárkróks, í spjalli við Feyki.Meira -
Óvissa í kjölfar niðurstöðu héraðsdóms varðandi undanþágu frá samkeppnislögum
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 21.11.2024 kl. 11.28Héraðsdómur Reykjavíkur komst að þeirri niðurstöðu sl. mánudag að breytingar á búvörulögum, þar sem framleiðendafélögum var veitt undanþága frá ákvæðum samkeppnislaga, sem samþykktar voru á Alþingi í mars síðastliðnum, hefðu strítt gegn áskildum fjölda umræðna á Alþingi og hafi af þeim sökum ekki lagagildi. Eins og greint hefur verið frá þá keypti Kaupfélag Skagfirðinga í kjölfarið Kjarnafæði - Norðlenska og var langt komið með að kaupa B.Jensen í Eyjafirði.Meira -
Horfði á alþingisrásina eftir skóla
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 21.11.2024 kl. 10.29María Rut Kristinsdóttir er oddviti Viðreisnar í Norðvestur kjördæmi. María er gift Ingileif Friðriksdóttur, eiga þær saman þrjú börn og einn hund. Búsettar í Reykjavík en alltaf með annan fótinn á Flateyri og Ísafirði. María hef starfað sem aðstoðarmaður formanns Viðreisnar síðan 2017 (með stuttu hléi).Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.