Húnvetningar töpuðu gegn Elliða og Aco lætur af störfum
Í síðustu viku lutu Húnvetningar í sundpollinn í Garði þegar lið Víðis hafði betur og þá var ákall frá fréttaritara heimasíðu Kormáks/Hvatar um færri víti og færri spjöld. Ekki virtust hans menn hafa lesið pistilinn því spjöld og víti voru meðal annars uppskera Kormáks/Hvatar þegar liðið tók á móti Árbæingum í Elliða í óvenju þéttri suðvestanátt með tilheyrandi rigningarslettum á Sauðárkróksvelli. Niðurstaðan 1-3 tap og áfram gakk.
Heimaliðið í skarpbleiku hafði vart hreyft legg eða lið þegar gestirnir voru komnir í forystu en Nikulás Ingi Björnsson skoraði strax á fyrstu mínútu. Framan af leik stungu Elliðar boltanum oftar en ekki inn fyrir vörn Kormáks/Hvatar og áður en hálfleikurinn var hálfnaður höfðu þrír varnarsveinar Húnvetninga fengið að líta gula spjaldið. Lið Elliða uppskar vítaspyrnu þegar þriðja spjaldið leit dagsins ljós og úr henni skoraði Pétur Óskarsson á 24. mínútu. Eftir þetta fór heimaliðið að ná betra valdi á aðstæðum og það var sanngjarnt að þeir minnkuðu muninn á 40. mínútu með marki úr aukaspyrnu sem Lazar Cordasic tók. Áfram sóttu leikmenn Kormáks/Hvatar og uppskáru hornspyrnu á 43. mínútu. Í kjölfar hennar varð mikið klafs í teignum og menn lágu í valnum og síðan sperrtu menn stél þannig að dómarinn varð að sýna tveimur köppum gula spjaldið, einum úr hvoru liði. Það var óheppilegt fyrir Húnvetninga því Sigurður Bjarni fyrirliði fékk þar með að líta sitt síðara gula spjald sem varð því rautt. Staðan 1-2 í hálfleik.
Húnvetningar sóttu að marki gestanna í síðari hálfleik og sköpuðu sér færi sem ekki nýttust. Gestirnir svöruðu sem fyrr með skyndisóknum og uppskáru þriðja mark sitt á 69. mínútu.
Aco Pandurevic lætur af störfum
Svekkjandi tap því staðreynd hjá liði Kormáks/Hvatar en varnarleikurinn hefur verið svolítill höfuðverkur þar sem meiðsli hafa herjað á mannskapinn. Horfir þar víst til betri vegar.
Á heimasíðunni góðu, þar sem finna má magnaða leiklýsingu, er einnig greint frá því að Aco Pandurevic hafi látið af störfum sem þjálfari bleikra en hann stýrði liðinu því í síðasta sinn í gær. Hann tók við þjálfarakeflinu af Ingva Rafni Ingvarssyni fyrir leiktímabilið 2022 og stýrði liðinu í níunda sæti í 3. deildinni síðasta sumar en liðið er einmitt í sama sæti nú að þremur umferðum loknum.
Fleiri fréttir
-
Hressandi að skella sér í sjósund
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 17.15Ingibjörg Davíðsdóttir er oddviti Miðflokksins frá bænum Arnbjargarlæk í Þverárhlíð í Borgarbyggð, fædd á Akranesi 1970 og á einnig ættir að rekja til Breiðafjarðareyja, Reykhóla og Múla á Barðaströnd. Ingibjörg á eina uppkomna dóttur og á heima í sveitinni og Garðabæ. Hún er sendiherra og stjórnarformaður Íslenska fæðuklasans. Hefur starfað í utanríkisþjónustunni í ríflega 25 ár, meðal annars sem sendiherra Íslands í Noregi, ráðgjafi forsætisráðherra í utanríkismálum ásamt því að starfa í sendiskrifstofum Íslands í Genf, Vínarborg og London. Ingibjörg tók sér leyfi frá utanríkisþjónustunni í fyrra og stofnaði Íslenska fæðuklasann.Meira -
Það sem maður veitir athygli vex og dafnar
feykir.is Skagafjörður, Listir og menning, Lokað efni 23.11.2024 kl. 12.09Það er margt í mörgu, sagði einhver einhverntímann, og hitti þar mögulega naglann rækilega á höfuðið. Greinarskrifari rak nýlega augun í viðburði í sveitinni sem komu honum svolítið spánskt fyrir sjónir; Kakóstund og 9D BreathWork. Það er Þóra Kristín Þórarinsdóttir frá Frostastöðum í Blönduhlíðinni sem stendur að baki þessum viðburðum. Það var ekkert vit í öðru en að kynna sér málið aðeins og senda Þóru nokkrar spurningar og rétt að byrja á því að spyrja hvað hún sé að gera þessa dagana.Meira -
Ætlaði að verða prestur
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 11.37Eldur Smári er oddviti Lýðræðisflokksins í Norðvesturkjördæmi og er fæddur á Sauðárkróki í nóvember 1979. Foreldrar hans eru Edda Lilja Hjalta-dóttir, frá Keflavík og Kristinn Jónas Björnsson frá Nýjabæ á Hofsósi. Hann er giftur Stuart Grahame Deville sem fæddur er í Lower Hutt á Nýja-Sjálandi. Þeir giftu sig í Ráðhúsinu í Kaupmannahöfn 2019. Þeir eru barnslausir en miklir dýravinir.Meira -
Afmælisveisla Hvatar er einmitt í dag!
feykir.is Austur-Húnavatnssýsla, Mannlíf, Lokað efni 23.11.2024 kl. 09.45Félagar í Ungmennafélaginu Hvöt á Blönduósi fagna í dag stórafmæli félagsins en í dag eru nákvæmlega 100 ár og tveir dagar frá stofnun þess árið 1924. Af þessu tilefni verður afmælishátíð í Íþróttamiðstöðinni á Blönduósi og hefst dagskráin kl. 13:00 og verður margt til gamans gert.Meira -
Eflum ferðaþjónustu í Norðvesturkjördæmi | Heiðdís Rós Eyjólfsdóttir skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 23.11.2024 kl. 09.45Ferðaþjónustan hefur verið ein af leiðandi ástæðum fyrir vaxtaþrótti íslensks samfélags undanfarin ár og eftirspurn eftir íslenskri ferðaþjónustu hefur vaxið af miklum krafti þótt jarðhræringarnar á Reykjanesskaga hafi leitt til ákveðinnar hnignunar. Þrátt fyrir allt hefur fjöldi erlendra ferðamanna á fyrstu níu mánuðum ársins verið lítillega yfir fjölda síðasta árs en fjöldi gistinátta hefur hins vegar dregist saman. Eins og kemur fram í þjóðhagsspá Hagstofunnar í nóvember er búist við því að fjöldi erlendra ferðamanna haldist stöðugur á næsta ári í 2,3 milljónum.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.