Tóku fyrri sláttinn með 3ja daga áhlaupi
Rúnar Aðalbjörn Pétursson, býr í Hólabæ í Langadal ásamt Auði Ingimundardóttur sambýliskonu og börnunum þeirra Pétri Inga og Lilju Björgu. Rúnar er starfandi bóndi með búfræðimenntun og sveinspróf í húsasmíði. Þau búa á blönduðu búi með tæplega 40 mjólkandi kýr og 400 vetrarfóðraðar kindur. Ásamt því vinnur Auður sem ráðunautur hjá Ráðgjafamiðstöð landbúnaðarins.
Rúnar og Auður keyptu jörðina í lok árs 2018 af foreldrum Rúnars, þeim Pétri og Þorbjörgu, sem enn þann dag í dag aðstoða þau mikið við bústörfin og segja þau það algjörlega ómetanlegt. „Árið 2016 var allt endurnýjað í fjárhúsum og geldneytafjós var tekið í gagnið árið 2017. Það var því búið að gera mikið þegar við kaupum jörðina. Nú standa einnig yfir framkvæmdir, þar sem við erum að byggja nýtt 780 m2 lausagöngufjós með mjaltaþjóni. Stefnt er á að taka það í notkun í nóvember á þessu ári.“
Nú er tíðarfarið búið að vera alls konar í sumar, hvernig er staðan hjá ykkur? „Árið 2024 er búið að vera krefjandi í búskapnum veðurfarslega séð. Vorið lét bíða eftir sér sem hafði í för með sér tafir á vorverkum, svo sem skítkeyrslu, jarðvinnslu og áburðardreifingu og svo setti kuldakastið í byrjun júní stórt strik í reikninginn þar sem búið var að koma nánast öllu lambfé út á græn grös en við ákváðum þá að hýsa nánast allt féð aftur sem endaði í tæpum fimm sólarhringum. Þetta er tími sem mun seint gleymast.“
Var fyrri sláttur seinni í ár en fyrri ár? „Fyrri sláttur var aðeins seinni á ferðinni í ár en í fyrra en vegna yfirstandandi framkvæmda ákváðum við að taka hann með áhlaupi og með hjálp góðra nágranna náðist að klára hann á þremur sólarhringum frá því að sláttur hófst og þangað til allar rúllur voru komnar í stæðu.“
Finnur þú mun á sprettu? „Sprettan var mjög hæg framan af og leit ekki vel út með heyfeng í byrjun sumars. Við sluppum þó tiltölulega vel frá kalskemmdum þó eitthvað hafi borið á blettakali í túnum.“ Sérðu fram á minni hey? „Heyfengur í ár verður í meðallagi en við búum ágætlega að því að árið í fyrra var metár í uppskeru hjá okkur og eigum því töluverðar fyrningar.“
Staðan á seinni slætti? „Þessa dagana [síðustu vikuna í ágúst] er verið að vinna í að taka seinni slátt og grænfóður og er sprettan mjög góð en helsta vandamálið hefur verið votviðrið síðustu daga og vikur. Má þó segja að við séum ágætlega heppin með það að öll tún eru vel fær þrátt fyrir úrhelli síðustu daga. Vonum að veðurguðirnir verði okkur hliðhollir svo við náum að klára seinnislátt fyrir göngur sem hefjast um mánaðamótin.“
Eru þið bjartsýn á framhaldið? „Já, við erum ágætlega bjartsýn á framhaldið. Við stöndum í þeirri meiningu að íslenskur landbúnaður og íslenskar landbúnaðarafurðir standi framarlega á heimsvísu með tilliti til dýravelferðar og heilnæmi afurða og getum við því verið stolt af þeim vörum sem við erum að framleiða.“
Fleiri fréttir
-
Æfingar hefjast hjá Skagfirska kammerkórnum.
feykir.is Skagafjörður, Austur-Húnavatnssýsla, Vestur-Húnavatnssýsla 16.09.2024 kl. 14.50Miðvikudaginn 11.september hóf Skagfirski kammerkórinn æfingar á ný eftir sumarfrí og heldur inn í sitt tuttugasta og fimmta starfsár.Meira -
Hvaðan kemur verðbólgan? | Hjörtur J. Guðmundsson skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 16.09.2024 kl. 14.35Tveir helztu drifkraftar verðbólgunnar hér á landi undanfarin misseri hafa annars vegar verið kostnaður vegna húsnæðis og hins vegar innflutt verðbólga. Aðallega frá ríkjum Evrópusambandsins enda mest flutt inn þaðan. Verðbólga jókst þar ekki vegna aukinna umsvifa heldur fyrst og fremst vegna glórulausra ákvarðana evrópskra ráðamanna í orkumálum sem varð til þess að ófá ríki sambandsins urðu háð orku frá Rússlandi. Þegar loks var brugðist við í þeim efnum, þó enn sé flutt inn mikið af rússneskri orku, leiddi það til hærra orkuverðs, þar með hærri framleiðslukostnaðar og loks hærra vöruverðs sem síðan skilaði sér hingað.Meira -
Oddviti Húnabyggðar ósáttur við vinnubrögð Vegagerðarinnar
feykir.is Austur-Húnavatnssýsla 16.09.2024 kl. 10.24„Ég ætla bara að ítreka það að við erum búin að standa við okkar. Við erum búin að sameina og mér finnst það asskoti hart að fá svona í bakið fyrir mitt samfélag. Við erum að reyna að sameina samfélög, við gerum það ekki með því að búa til óeiningu milli hverfa í okkar samfélagi,“ sagði Guðmundur Haukur Jakobsson, oddviti Húnabyggðar, í samtali við RÚV í gær.Meira -
30 milljónir settar í undirbúning fyrir Fljótagöng
feykir.is Skagafjörður 16.09.2024 kl. 09.23Stjórnvöld hafa ákveðið að flýta rannsóknum fyrir jarðgöng úr Fljótum og til Siglufjarðar og er nú stefnt að því að borun fyrir jarðgöng geti hafist árið 2026. Þrjátíu milljónum verður varið í að undirbúa gerð jarðganga úr Skagafirði í Fjallabyggð sem myndi leysa af hólmi veg um Almenninga en hann hefur farið illa í veðrum og jarðhreyfingum undanfarin ár og er talinn hættulegur vegfarendum.Meira -
Kormákur/Hvöt hélt sæti sínu í 2. deild þrátt fyrir tap í lokaumferðinni
feykir.is Austur-Húnavatnssýsla, Íþróttir, Vestur-Húnavatnssýsla 15.09.2024 kl. 19.07Það var hart barist í síðustu umferð 2. deildarinnar í tuðrusparkinu í gær. Hvorki hafði gengið né rekið hjá Kormáki/Hvöt í síðustu leikjum og útlitið ekki verulega gott fyrir lokaleikinn; erfiður andstæðingur í Ólafsvík á meðan lið KF spilaði heima á Ólafsfirði gegn Hetti/Huginn sem hafði tapað fimm leikjum í röð og virtust hættir þetta sumarið. Það eina sem spilaði með Húnvetningum var að þeir höfðu stigi meira en lið KF fyrir síðustu umferðina og það reyndist heldur betur mikilvægt þar sem bæði lið töpuðu og bættu því ekki við stigasafnið. Kormákur/Hvöt náði því í raun þeim frábæra árangri að halda sæti sínu í 2. deild og það voru víst ekki margir sem veðjuðu á það fyrir mót.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.