Stólastúlkur kræktu í sjöunda sætið
Síðasta umferðin í deildarkeppni Bestu deildar kvenna fór fram í dag og fyrir umferðina var ljóst að lið Tindastóls, Keflavíkur, ÍBV og Selfoss yrðu í botnsætunum fjórum. Til að bæta stöðu sína í úrslitakeppninni þurftu liðin að næla í stig en í dag var lið Tindastóls eina liðið sem nældi í stig – reyndar bara eitt en það var í fyrsta sinn sem Stólastúlkur ná í stig gegn Akureyringum. Liðin mættust í blíðuveðri á Króknum og úr varð æsispennandi markalaust jafntefli.
Stigið dugði til að færa lið Tindastóls upp í sjöunda sæti deildarinnar sem verður að teljast flott hjá liðinu og nú þarf að halda vel á spöðunum í úrslitakeppninni þar sem Tindastóll spilar tvo heimaleiki og einn útileik. Stigin sem nást í úrslitakeppninni bætast við stigafjöldann sem liðin hafa að lokinni deildarkeppninni.
Leikurinn í dag var fjörugur en þó var ekki mikið um dauðafæri, liðin vörðust bæði vel og markverðir beggja liða vörðu það sem á markið kom. Strax á 2. mínútu leiksins komst leikmaður Þórs/KA upp með að teika og toga í Murr á miðlínu þegar hún var að sleppa inn fyrir en einhverra hluta veifaði dómarinn ekki gulu spjaldi – hann átti eftir að veifa því síðar í leiknum fyrir mun minna tog. Lið gestanna var skeinuhættara framan af leik en um miðjan fyrri hálfleik komst betri taktur í leik heimaliðsins og á 29. mínútu fékk Aldís María dauðafæri, komst ein inn fyrir og átti bara eftir að koma boltanum framhjá Melissu í marki gestanna en hún náði að gera sig stóra og varði með tilþrifum. Sandra María skoraði síðan mark fyrir hlé sem sennilega var dæmt af vegna rangstæðu. Staðan 0-0 í hálfleik.
Það hefði mátt halda að Donni hefði gefið stelpunum sínum skúffuköku í hálfleik því þær virkuðu þungar og á eftir í flesta bolta fyrstu mínútur síðari hálfleiks. Gestirnir pressuðu stíft en vörn Tindastóls hélt og augljóst að það yrði barist með kjafti og klóm til síðustu mínútu. Síðasta stundarfjörðunginn eða svo þá opnaðist leikurinn örlítið og bæði lið hefðu getað skorað. Enn var það Aldís sem fékk besta færi Stólastúlkna en hafði ekki erindi sem erfiði.
Niðurstaðan sem fyrr segir markalaust jafntefli. Lið Þórs/KA er ansi sterkt þó það hafi aðeins endað sæti ofar en lið Tindastóls. Það hefur líka jafnan reynst erfitt viðureignar og nokkuð ljóst að Akureyringar gefa sig allar í leiki gegn liði Tindastóls – enda vilja þær halda í montréttinn í Norðurlandsslagnum.
Úrslitakeppnin hefst um næstu helgi og verða allir sex leikirnir sem liðin fjögur leika spilaðir á laugardögum (með viku millibili, tveir hvern laugardag). Fyrst fá Stólastúlkur lið Keflvíkinga í heimsókn, síðan sækja þær Selfoss heim og mæta síðan ÍBV í lokaumferðinni. Tindastóll endaði tímabilið með 19 stig, fimm stigum meira en í Pepsi Max deildinni 2021, og hefur stigsforskot á ÍBV og tveggja stiga forskot á Keflavík en slakari markatölu en þau bæði. Botnsætið vermir Selfoss sem hlaut aðeins 11 stig og þarf á meiriháttar kraftaverki að halda til að halda sér í Bestu deildinni.
Fleiri fréttir
-
Hressandi að skella sér í sjósund
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 17.15Ingibjörg Davíðsdóttir er oddviti Miðflokksins frá bænum Arnbjargarlæk í Þverárhlíð í Borgarbyggð, fædd á Akranesi 1970 og á einnig ættir að rekja til Breiðafjarðareyja, Reykhóla og Múla á Barðaströnd. Ingibjörg á eina uppkomna dóttur og á heima í sveitinni og Garðabæ. Hún er sendiherra og stjórnarformaður Íslenska fæðuklasans. Hefur starfað í utanríkisþjónustunni í ríflega 25 ár, meðal annars sem sendiherra Íslands í Noregi, ráðgjafi forsætisráðherra í utanríkismálum ásamt því að starfa í sendiskrifstofum Íslands í Genf, Vínarborg og London. Ingibjörg tók sér leyfi frá utanríkisþjónustunni í fyrra og stofnaði Íslenska fæðuklasann.Meira -
Það sem maður veitir athygli vex og dafnar
feykir.is Skagafjörður, Listir og menning, Lokað efni 23.11.2024 kl. 12.09Það er margt í mörgu, sagði einhver einhverntímann, og hitti þar mögulega naglann rækilega á höfuðið. Greinarskrifari rak nýlega augun í viðburði í sveitinni sem komu honum svolítið spánskt fyrir sjónir; Kakóstund og 9D BreathWork. Það er Þóra Kristín Þórarinsdóttir frá Frostastöðum í Blönduhlíðinni sem stendur að baki þessum viðburðum. Það var ekkert vit í öðru en að kynna sér málið aðeins og senda Þóru nokkrar spurningar og rétt að byrja á því að spyrja hvað hún sé að gera þessa dagana.Meira -
Ætlaði að verða prestur
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 23.11.2024 kl. 11.37Eldur Smári er oddviti Lýðræðisflokksins í Norðvesturkjördæmi og er fæddur á Sauðárkróki í nóvember 1979. Foreldrar hans eru Edda Lilja Hjalta-dóttir, frá Keflavík og Kristinn Jónas Björnsson frá Nýjabæ á Hofsósi. Hann er giftur Stuart Grahame Deville sem fæddur er í Lower Hutt á Nýja-Sjálandi. Þeir giftu sig í Ráðhúsinu í Kaupmannahöfn 2019. Þeir eru barnslausir en miklir dýravinir.Meira -
Afmælisveisla Hvatar er einmitt í dag!
feykir.is Austur-Húnavatnssýsla, Mannlíf, Lokað efni 23.11.2024 kl. 09.45Félagar í Ungmennafélaginu Hvöt á Blönduósi fagna í dag stórafmæli félagsins en í dag eru nákvæmlega 100 ár og tveir dagar frá stofnun þess árið 1924. Af þessu tilefni verður afmælishátíð í Íþróttamiðstöðinni á Blönduósi og hefst dagskráin kl. 13:00 og verður margt til gamans gert.Meira -
Eflum ferðaþjónustu í Norðvesturkjördæmi | Heiðdís Rós Eyjólfsdóttir skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 23.11.2024 kl. 09.45Ferðaþjónustan hefur verið ein af leiðandi ástæðum fyrir vaxtaþrótti íslensks samfélags undanfarin ár og eftirspurn eftir íslenskri ferðaþjónustu hefur vaxið af miklum krafti þótt jarðhræringarnar á Reykjanesskaga hafi leitt til ákveðinnar hnignunar. Þrátt fyrir allt hefur fjöldi erlendra ferðamanna á fyrstu níu mánuðum ársins verið lítillega yfir fjölda síðasta árs en fjöldi gistinátta hefur hins vegar dregist saman. Eins og kemur fram í þjóðhagsspá Hagstofunnar í nóvember er búist við því að fjöldi erlendra ferðamanna haldist stöðugur á næsta ári í 2,3 milljónum.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.