Keðjan jafn sterk og veikustu hlekkirnir

Grunnur er hluti byggingar sem við í mannvirkjagerðinni þekkjum vel. Við lærum strax mikilvægi þess að hann standi réttur og sterkur til að framhaldið verði vandað og endingargott. Með því að tileinka sér þessa hugsjón í öllu sem við gerum búum við til vegferð sem skilar sér margfalt til baka.

Grunnstoðir eru forsenda fyrir því að samfélagið geti gengið. Við verðum að hafa gott mennta-, íþrótta- og tómstundastarf fyrir alla. Fjölbreytt atvinnulíf og almenna þjónustu í lagi. Við þurfum sértæka þjónustu og störf fyrir fólk sem þarf á því að halda, ásamt öflugri þjónustu fyrir eldra fólkið okkar sem á það svo sannarlega inni hjá samfélaginu.

Þessi málefni telja flest framboð mikilvæg í okkar samfélagi og sum þeirra hafa talað fyrir þeim í gegnum mörg kjörtímabil. Af einhverjum ástæðum stöndum við samt eftir með sömu umræðuna og oft á tíðum sömu vandamálin sem veltast um í kerfinu í mörg ár.

Mygluvandamál í byggingum, yfirálag á starfsfólki, aðstöðuleysi margra greina, skortur á sérfræðiþjónustu og svo mætti lengi telja.

Vandamál eru ekkert annað en verkefni sem finna þarf lausnir á. Við styrkjum ekki keðjuna með fleiri hlekkjum ef þeir veiku halda sér. Má sem dæmi nefna nýjar leikskólabyggingar án starfsfólks og möguleg uppbygging mannvirkja án rekstargrundvallar.

Við eigum það til að elta skottið á okkur við að grípa verkefnin þegar þau hellast yfir okkur með tilheyrandi kostnaði, sem getur verið töluvert meiri en hann þarf að vera. Skuldasöfnun er ekkert leyndarmál og hafa skuldir aukist mikið á síðustu árum. Þar verðum við að sýna ábyrgð og stýra verkefnum með réttum hætti. Sinna viðhaldi áður en það verður um seinan og styrkja lýðheilsu fólks til að bæta starfsumhverfi þess, svo dæmi séu tekin.

Jöfnun þjónustu eru réttindi á hvaða sviði sem er. Ljósleiðaravæðing í dreifbýli hefur verið til fyrirmyndar en nú er löngu tímabært að klára þéttbýlið þar sem sums staðar er treyst á 4G netkerfi. Einnig þarf að þrýsta á bætt raforkuöryggi á sömu slóðum og víðar, sérstaklega með tilkomu rafbílavæðingar.
Jöfnun þjónustu í skólamálum, í þjónustu við eldri borgara, í sértækri þjónustu og fleiri þjónustum má segja að sé efni í nýja grein.

Tilfinningin er að lengi hefur okkur vantað framtíðarsýn og markmið hvert við viljum stefna með samfélagið okkar. Við megum ekki falla í þá gryfju að horfa til byggðaþróunar til að segja okkur hvað við eigum að áætla í fjölgun fólks í héraðinu. Setjum markið hátt og skipuleggjum framtíðina. Að auka íbúafjölda kallar á skipulag þéttbýliskjarna til langs tíma með fjölbreyttum íbúða-, atvinnu- og þjónustuhverfum. Með því að skilgreina lóðir með öllum húsgerðum búum við til vöru sem er aðdráttarafl fyrir samfélagið. Þetta gildir um alla þéttbýliskjarna, hvernig við viljum sjá þá stækka.

Langt er síðan að heilt íbúðahverfi var deiliskipulagt í héraðinu líkt og nú með Sveinstúni á Sauðárkróki. Í framhaldinu þarf að setja tímamörk og fara strax í deiliskipulag á næsta hverfi. Undirbúningsvinna er sparnaður til lengri tíma og spornar við að missa eftirspurn eftir lóðum annað. Hönnun þjónustumannvirkja þarf að taka mið af þessum markmiðum með mögulegum stækkunum. Með það í huga verðum við einnig að virkja betur þekkingu fólksins á gólfinu inn í hönnunarferlið til að nýting mannvirkja verði sem best. Þarna er gott að grípa tækifærið með skólabyggingu í Varmahlíð, sundlaug á Sauðárkróki og íþróttahúsi á Hofsósi.

Sveitarfélagið okkar er nú þegar að stækka. Akrahreppur hefur sameinast með styrk sem gefur okkur tækifæri til að eflast enn frekar. Burtfluttir Skagfirðingar ásamt nýjum hafa ratað heim. Til okkar hefur flutt fjöldi fólks af erlendum uppruna og bætt bæði samfélag og atvinnulíf. Bændastéttin er auðlind sem hefur alla burði til að stækka enn frekar og ferðaþjónustan er rétt að byrja sína vegferð. Tækifærin í menntamálum á svæðinu eru mun meiri en fólk gerir sér grein fyrir. Við þurfum að byggja þessa góðu vegferð upp til framtíðar og sameinast í að virkja hvert annað til góðra verka.

Framtíðin er björt en birtist ekki nema að við séum tilbúin að taka á móti henni.

Eyþór Fannar Sveinsson
Höfundur skipar 3. sæti ByggðaListans