Gula viðvörunin nær aðeins fram á morgundaginn
Í gærmorgun var gul veðurviðvörun fyrir allt landið um helgina en eitthvað hefur útlitið breyst. komin appelsínugul viðvörun á sumum landsvæðum í dag og fram yfir hádegi á morgun. Það er helst Breiðafjörðurinn sem fær þennan skell en í dag verður einnig bálhvasst á miðhálendinu og suðausturlandi. Gul viðvörun tekur gildi á Norðurlandi vestra kl. 16 í dag og stendur til kl. fimm í nótt – annars er helgin litlaus á svæðinu þegar kemur að viðvörunum.
„Suðaustan 15-23 m/s með snörpum vindhviðum við fjöll. Úrkomulítið, en hláka. Varasöm akstursskilyrði vegna vinds og einnig hálku þar sem blaut svell eru á vegum,“ segir í spá Veðurstofunnar.
Veðurspár sveiflast talsvert fyrir helgina en væntanlega verður veðrið hvað verst hjá okkur frá því seinni partinn í dag og fram yfir hádegi á morgun, laugardag. Þannig er gert ráð fyrir 25 m/sek við Blönduós í kvöld þegar Gísli Marteinn er að hneppa að sér jakkanum í sjónvarpssal. Á sama tíma er spáð sama vindstyrk á Holtavörðu- og Öxnadalsheiði þannig að þá er betra að fara að öllu með gát, enda hálka á flestum vegum í umdæminu.
Í Skagafirði er spáð hvað hvössustu um fimm til sex í nótt, eða 25 m/sek að sunnan, en þá verður hitinn um tíu gráður. Það hægist á vindinum upp úr hádegi á morgun en hvessir á ný um miðnætti annað kvöld. Útlit er fyrir skaplegt veður á sunnudaginn á Norðurlandi vestra og þá er ekki gert ráð fyrir úrkomu á svæðinu nema mögulega í Vestur-Húnavatnssýslu um helgina.
Það stefnir síðan í umhleypingaveður frá helgi og fram í miðja viku; vindurinn sjaldnast undir 10 m/sek og ýmist snjókoma, slydda eða rigning. Eiginlega bara tóm drulla.
Fleiri fréttir
-
Dimitris til liðs við bróður sinn í liði Tindastóls
feykir.is Skagafjörður, Íþróttir, Lokað efni 31.01.2025 kl. 13.40Vísir.is sagði frá því í morgun að liði Tindastóls hefði bæst liðsstyrkur fyrir lokaátökin í Bónus deild karla. Um er að ræða Dimitris Agravanis, eldri bróðir Giannis sem spilar með liði Tindastóls, þaulreyndan þrítugan landsliðsmann Grikkja en hann hefur allan sinn feril spilað með stórliðum í Evrópu þrátt fyrir að hafa á sínum tíma verið valinn af Atlanta Hawks í NBA-deildinni.Meira -
Tveir þriðju félaga í Félagi eldri borgara í Húnaþingi vestra mættu á blót
feykir.is Vestur-Húnavatnssýsla, Mannlíf, Lokað efni 31.01.2025 kl. 12.56Það er líf og fjör á Facebook-síðu Félags eldri borgara í Húnaþingi vestra og nú um liðna helgi gaf að líta nokkrar myndir af prúðbúnum eldri borgurum á þorrablóti félagsins. Feykir spurði Guðmund Hauk Sigurðsson, formann félagsins, út í hvernig til hefði tekist og svaraði hann því til að 115 af 180 félögum hafi mætt á blótið. Ræðumaður kvöldsins var Helgi Björnsson í Huppahlíð en Rafn Benediktsson, formaður þorrablótsnefndar, stýrði samkomunni.Meira -
Húnabyggð mótmælir harðlega skerðingu byggðakvóta
feykir.is Austur-Húnavatnssýsla, Vestur-Húnavatnssýsla, Lokað efni 31.01.2025 kl. 11.44Byggðarráð Húnabyggðar mótmælir harðlega þeirri skerðingu sem orðið hefur á byggðakvóta til sveitarfélagsins og til nágrannasveitarfélaga síðustu ár. Samkvæmt úthlutun matvælaráðuneytisins fær Húnabyggð 15 þorskígildistonn af byggðakvóta á fiskveiðiárinu 2024/2025 en við það bætist eftirstöðvar á úthlutun fyrra árs þannig að ráðstöfunin á yfirstandandi fiskveiðiári er samtals 19,2 tonn. Húnabyggð hefur síðustu ár fengið 15 tonn úthlutað segir á huni.is.Meira -
Sveitarfélagið Skagaströnd tekur við rekstri Tónlistarskóla A-Hún
feykir.is Austur-Húnavatnssýsla, Vestur-Húnavatnssýsla, Lokað efni 31.01.2025 kl. 11.33Á heimasíðu Sveitarfélags Skagastrandar segir að nú um áramótin hafi verið breyting á rekstri Tónlistarskóla Austur Húnvetninga. Áður hafi hann verið rekinn af byggðasamlagi Húnabyggðar og Skagastrandar en er nú rekinn eingöngu af Sveitarfélaginu Skagaströnd. Skólinn mun áfram þjónusta sama starfssvæði og rekstur fer fram með mjög svipuðum hætti.Meira -
Opið bréf til sveitarstjóra og sveitarstjórnar Skagafjarðar
feykir.is Skagafjörður 31.01.2025 kl. 09.55Félag grunnskólakennara í Árskóla á Sauðárkróki sendir frá sér opið bréf til sveitastjóra og sveitastjórnar Skagafjarðar til að koma m.a á framfæri vonbrigðum að formaður fræðslunefndar Skagafjarðar sé meðal þeirra sem stefna Kennarasambandi Íslands fyrir ólögmætt verkefall. Bréfið í heild sinni má lesa hér að neðan.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.