Bitlausir Stólar máttu sætta sig við jafntefli
Tindastóll tók á móti liði Hafnfirðingum í liði KÁ í gærdag í brakandi blíðu á Sauðárkróksvelli. Leikurinn var frekar bragðdaufur lengi vel en hiti færðist í kolin þegar leið að leikslokum en heimamönnum tókst ekki að knýja fram sigur þrátt fyrir nokkra pressu. Kom þar helst til hálf neyðarlegt bitleysi fyrir framan markið en Stólunum virðist algjörlega fyrirmunað að næla sér í eldheitan framherja. Lokatölur 1-1.
Leikurinn í heildina var frekar jafn og varnarleikur beggja liða traustur. Stólarnir voru heldur meira með boltann og sýndu oft ágæt tilþrif úti á vellinum en hraðann vantaði í spilið og fátt um opnanir – oft vantaði þó aðeins herslumuninn. Fyrsta mark leiksins kom á 21. mínútu en þá náðu Stólarnir að opna vörn gestanna hægra megin og Addi Ólafs skallaði góða fyrirgjöf glæsilega í netið. Eftir þetta gerðist í raun fátt markvert fram að hléi þrátt fyrir að bæði lið kæmu sér í ágæta stöðu.
KÁ-ingar komu ákveðnir til leiks í síðari hálfleik og ógnuðu jöfnunarmarki. Það kom á 58. mínútu eftir fast leikatriði en eftir smá klafs í teignum náði Bjarki Sigurjónsson góðu skoti sem hafnaði í marki heimamanna. Næstu mínútur reyndu bæði lið hvað þau gátu en þrátt fyrir mörg ágæt upphlaup heimamanna voru þeir ekki líklegir til að bæta við marki. Leikurinn opnaðist nokkuð þegar Dom Furness kom inn á þegar 20 mínútur voru til leiksloka og sóknarleikur Stólanna þyngdist. Bestu sénsarnir voru langskot en þrátt fyrir ótal fyrirgjafir og upphlaup upp kantana þá gekk illa að finna samherja fyrir framan markið.
Niðurstaðan því 1-1 jafntefli sem gerir lítið fyrir bæði liðin. Tindastóll er nú í fimmta sæti 4. deildar en á einn leik til góða sem gæti lyft liðinu upp í þriðja sæti ef hann vinnst. Ýmir og Hamar eru hins vegar sem stendur í efstu tveimur sætum deildarinnar með dágott forskot á liðin fyrir neðan. Næstu tveir leikir Tindastóls eru gegn liði Skallagríms. Þær viðureignir gáfu eitt stig í fyrra en ætli Stólarnir að blanda sér í toppbaráttu deildarinnar þá þurfa þeir að gera miklu betur.
Fleiri fréttir
-
Stólastúlkur óheppnar að taka ekki stig af toppliðinu
feykir.is Skagafjörður, Íþróttir 03.07.2024 kl. 00.25Tindastóll mætti toppliði Breiðabliks á Króknum í kvöld. Oftar en ekki hafa þessir leikir gegn Blikum reynst erfiðir enda Kópavogsliðið skipað toppleikmönnum í öllum stöðum í gegnum árin og lið Tindastóls fengið lítið að sjá af boltanum. Blikar byrjuðu leikinn frábærlega og fyrstu tíu mínúturnar höfðu örugglega margir stuðningsmenn áhyggjur af því hversu stór skellurinn yrði. Þá gerðist það sem aldrei hefur gerst áður í leikjum liðanna – Stólastúlkur tóku stjórnina og mega vera drullusvekktar að hafa ekki í það minnsta krækt í stig. Lokatölur svekkjandi 0-1 tap en heimaliðið má sannarlega leggjast stolt á koddann í kvöld.Meira -
Brauðtertusnillingar Norðurlands vestra athugið
feykir.is Skagafjörður, Austur-Húnavatnssýsla, Vestur-Húnavatnssýsla 02.07.2024 kl. 15.36Þar sem að ég veit að margir snillingar í brauðtertugerð leynast á Norðurlandi vestra er tilvalið að vekja athygli á þessari keppni. Því brauðtertunni verður fagnað sem aldrei fyrr í sumar þegar Íslandsmótið í brauðtertugerð fer fram. Ætlar þú ekki að vera með?Meira -
Von á Azamara Quest í heimsókn
feykir.is Skagafjörður 02.07.2024 kl. 15.06Fyrsta skemmtiferðaskipið þetta sumarið kemur til Sauðárkróks fimmtudaginn 4. júlí. Alls eru komur skemmtiferðaskipa til Sauðárkróks átta talsins í sumar og þar af þrjár með viðkomu í Drangey. Veðurguðirnir virðast ætla að spila með í þessari Íslandsupplifun ferðalanganna og stefna á að bjóða upp á alíslenskt sumarveður; vægan hita, alskýjað og ferska norðanátt.Meira -
Nauðsynlegar leiðréttingar | Friðbjörn Ásbjörnsson skrifar
feykir.is Skagafjörður, Aðsendar greinar 02.07.2024 kl. 14.06Síst af öllu vill FISK Seafood troða illsakir við eigendur smábáta í Skagafirði enda er fjölbreytileikinn í sjósókn okkar, eins og raunar allra landsmanna, afar mikilvægur. Þess vegna olli grein Magnúsar Jónssonar, formanns Drangeyjar, í Feyki í gær vonbrigðum. Bæði hallaði hann þar réttu máli og skautaði framhjá augljósum aðalatriðum. Til viðbótar hengir hann bakara fyrir smið þegar hann gerir FISK Seafood ábyrgt fyrir því að tillögur sveitarfélagsins um dreifingu byggðakvótans fáist ekki samþykktar af stjórnvöldum.Meira -
Sláttur hófst um helgina eftir stórundarlega tíð
feykir.is Skagafjörður, Austur-Húnavatnssýsla, Vestur-Húnavatnssýsla 02.07.2024 kl. 12.51Sláttur hófst í Skagafirði um sl. helgi eftir langa bið. Veðurfarið hefur ekki verið bændum í hag þetta árið og þegar Feykir skoðaði hvenær sláttur hófst síðustu ár hefur hann verið að byrja í kringum mánaðarmótin maí/júni og fram í miðjan júní. Það er því nánast ógerlegt að finna það út hvort sláttur hafi einhvertíma byrjað seinna en hann gerði í ár og væri gaman að heyra frá bændum hvenær og hvort þeir muni eftir tíð sem var jafn slæm og nú.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.