Vatnavextir og skriðuföll á Norðurlandi vestra
Óvenju mikið vatnsveður hefur verið á Norðurlandi síðustu tvo daga og regninu hafa fylgt vatnavextir og skriðuföll. Feykir sagði frá því í gær að Siglufjarðarvegi hefði verið lokað milli Ketiláss og Siglufjarðar og er hann enn lokaður. Skriða féll í Hofsá rétt ofan göngubrúarinnar á Hofsósi og skriður hafa fallið á Reykjaströnd og í Vatnsdal.
Allir skorningar og farvegir eru sneisafullir af regnvatni sem gusast niður hlíðar og grundir á leið sinni til sjávar. Feykir fékk upplýsingar um skriðuföll á Reykjaströnd en það má segja að það hafi nánast verið skýfall í austanverðum Tindastólnum í rúman sólarhring. Úlfar Sveinsson bóndi á Ingveldarstöðum tjáði Feyki að töluverður fjöldi af skriðum hefðu fallið en þó ekki lokað veginum um Ströndina. Þá sagði hann að fallið hefði lítil skriða heim að Ingveldarstöðum en taldi að henni hefði ekki fylgt tjón að ráði.
Þá sendi Ingvar Daða á Hofsósi Feyki myndir af skriðunni sem þar féll í Hofsá en hún hefur skilið eftir sig töluvert sár á þessum fallega stað þar sem Hofsáin rennur að gömlu brúnni. Elvar hjá Björgunarsveitinni Gretti á Hofsósi tjáði Feyki að starfsmenn sveitarfélagsins hafi lokað svæðinu af fyrir ofan skriðuna með borðum. Aðspurður hvort svæðið væri enn hættulegt sagðist hann ekki geta sagt til um það. „Það er ekkert gáfulegt að vera að þvælast í brekkunum og við bakkana samt. Aldrei að vita hvort það falli meira fram eða fyllan í ánni fari af stað með einhverjum látum.“
Feykir fékk sömuleiðis fregnir af því að umtalsverð skriðuföll hafi orðið norðan við bæinn Hjallaland í Vatnsdalnum í Austur-Húnavatnssýslu. Að sögn Jóns bónda Gíslasonar á Hofi þá hefur verið býsna mikil rigning á svæðinu, örugglega mismikil og mjög staðbundin. Hann segir að það hafi örugglega rignt meira eftir því sem utar dró.
Rétt er að áminna fólk um að fara varlega þar sem jörð getur verið viðkvæm eftir allar þessar rigningar undanfarið, sérstaklega í hlíðum og nærri árfarvegum þar sem krafturinn í vatninu hefur verið mikill og vatnsmagnið sömuleiðis.
Fleiri fréttir
-
Skólastúlkur hársbreidd frá sigri í Keflavík
feykir.is Skagafjörður, Íþróttir, Lokað efni 20.11.2024 kl. 23.37Stólastúlkur fengu verðugt verkefni í kvöld þegar þær heimsóttu Íslandsmeistara Keflavíkur í Blue-höllina í sjöundu umferð Bónus deildar kvenna. Stelpurnar okkar stóðu vel fyrir sínu en á lokamínútunum dró örlítið af liðinu og meistararnir mörðu sigur með einu stigi. Lokatölur 90-89,Meira -
Kjördæmaþáttur RÚV í beinu streymi á Feyki
feykir.is Skagafjörður, Austur-Húnavatnssýsla, Vestur-Húnavatnssýsla 20.11.2024 kl. 17.30Klukkan 18:10 í kvöld hefst fundur oddvita allra framboða í Norðvesturkjördæmi sem bjóða fram til kosninganna 30. nóvember nk. Þátturinn verður sendur út frá Ráðhúsi Akraneskaupstaðar en umfjölluninni stýra fréttamenn Ríkisútvarpsins, Freyr Gígja Gunnarsson og Gréta Sigríður Einarsdóttir. Allir oddvitar hafa boðað komu sína.Meira -
Ragnhildur sigraði Söngkeppnina á Menningarkvöldi NFNV
feykir.is Skagafjörður, Austur-Húnavatnssýsla, Vestur-Húnavatnssýsla, Listir og menning, Lokað efni 20.11.2024 kl. 13.31Menningarkvöld NFNV var haldið sl. föstudagskvöld í Íþróttahúsinu á Sauðárkróki. Mikill metnaður var settur í að gera kvöldið sem allra flottast. Ekki verður hægt að segja að veðrið hafi verið með nemendum í liði þetta kvöld, því veturinn skall á með látum og víða óveður og vetrarfæri sem setti þó ekki meira strik í reikninginn en það að rétt tæplega tvöhundruð manns létu veðrið ekki stoppa sig.Meira -
Börn á Íslandi, best í heimi!
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 20.11.2024 kl. 13.16Ef marka má tímann sem fer í samfélagsumræðu fullorðins fólks um aðstæður, líf og framtíð barna og ungmenna mætti ætla að börn hefðu aldrei haft það betra og að það að vinna með börnum og ungmennum séu mikilvægustu störf þjóðarinnar. Að vera foreldri og sinna fjölskyldulífi með börnum og ungmennum sé sannkallað virðingarhlutverk en ekki baggi á atvinnulífinu sem þurfi að leysa á sem ódýrastan hátt.Meira -
Himnastiginn tók flugið á ný
feykir.is Austur-Húnavatnssýsla, Lokað efni 20.11.2024 kl. 11.33Feykir sagði í fyrra frá því stórskemmtilega verkefni í Húnabyggð að byggja stiga upp á Skúlahól í Vatnsdalnum. Nú í byrjun september fauk stiginn, sem er kallaður Himnastiginn, hins vegar í sunnan hvassviðri og brotnaði en honum var fljótlega komið fyrir á ný. Nú fyrir helgi var bálhvasst í Vatnsdalnum og himnastiginn tók flugið á ný – mætti halda að hann sé í samkeppni við flugfélögin í áætlanarflugi.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.